Muk  Châu Thị Xéo, Yam ndok HTX ngak nong Châu Rế, xã Phước Hải, huyện Ninh Phước, Ninh Thuận

Hadei di tuk hu Cục khik caga phun pala pasang iek chất lượng kaya pandap song brei  mã số bhum pala, măng tây di Ninh Thuận hu pala di pasak ngak  nong công nghệ glong Nha Hố mbang camereip hu pablei tapa drak pasa Hàn Quốc. Kỹ sư Nguyễn Văn Nam, Akaok jabat pablei salih, Pasak ngak nong  Công nghệ glong  Nha Hố, Ninh Thuận brei thau: “Kol dahlak pablei tabiak negar langiu hu ka 2 doanh nghiệp prong di  Hàn Quốc. Ni jeng lac mbang camereip, peih jalan ka harei hadei duah dom drak pasa karei yau  Japon, Châu Âu piah doanh nghiệp song bhum pala dalam tỉnh Ninh Thuận patagok, pataom tame pablei tabiak negar langiu. Yau nan,jien mek tame di doanh nghiệp song urang ngak meng glaong hu.”

Labaih sa thun ngak công nhân iek glang măng tây di Pasak  ngak nong  Công nghệ glong Nha Hố, meng măng tây hu pablei tabiak negar langiu, nan ye jien bilan  di saai  Đạo Thị Mỹ Diêm daok di palei  Lương Tri, Xã Nhơn Sơn, huyện Ninh Sơn, Ninh Thuận hu tagok 6 triệu đồng/ sa bilan, glong jang  sa  triệu đồng dut song dahlau deih. Kayua măng tây hajao  di pak ni hu ngak tui jalan  công nghệ glong, nan ye dom pandap klaak tabiak hadei di tuk cakak, kaoh mek, hu ngak jeng khak  hữu cơ buh ka phun dalam dom thun patui di nan. Oh lac ta-eng saai Diêm  bo rilo urang ngak lac mik va  Chăm di palei  Lương Tri jeng hu jien bilan tani tanat meng bruk iek glang măng tây piah pablei tabiak negar langiu, Sa-ai Đạo Thị Mỹ Diêm khan lac: “Hulin ngak măng tây meng hu bruk ngak, bo hu jien rong anek...”

Di bhum pala măng tây hajao di  HTX Châu Rế, xã Phước Hải, huyện Ninh Phước, bhap bini hu salih tapa ngak tui jalan hữu cơ di mblang hamu prong, hu pambuak bruk song dom doanh nghiệp blei veik abih pandap nan ye măng tây hu pablei tabiak rilo tỉnh, ban dalam taneh ia. Muk  Châu Thị Xéo, Yam ndok HTX ngak nong Châu Rế, xã Phước Hải, huyện Ninh Phước, Ninh Thuận brei thau: “Dahlau deih  măng takik  drei pablei dalam tỉnh. Urak ni drei ngak mblang hamu prong…   

Tui  ong Trương Khắc Trí, Phaok Yam ndok Sở ngak nong song patagok palei pala  Ninh Thuận, gah ngak nong Ninh Thuận dok ba tabiak bruk dong ka urang nong pala tui jalan ngak nong  hữu cơ tui tanut chuẩn Vietgap, Globalgap, saong brei thau dom danak dak tacei pato  khik iek jit palai kaik  tui jalan IPM di mangaok 5 janih phun pala praong, abih di nyu nan lac, dom janih phun pala hu prein khang pablei tabiak negar langiu yau: Nho, medar, măng tây, nha đam:“Ninh Thuận hu  10 janih phun pala hu brei  mã số bhum pala pabak ka bruk pablei tabiak negar langiu  ngan song taneh prong  80ha song dom janih phun meng kan  di tỉnh yau  Nha đam, măng tây, dưa lưới, nho, am riak…Ni lac, jalan pabak ka bruk pablei tabiak negar langiu dalam tuk vak anak tal, song peih prong bhum pala, meng bruk doanh nghiệp pambuak song urang nong  atau dom  HTX, piah peih prong bhum pala song patagok pandap ngak tabiak. 

Taphia di bruk daong pabak brei  mã số bhum pala, Ninh Thuận dok patagok pasang iek bruk ngak tabiak, chất lượng pandap song duah thau hu asal pandap, phun pala, khik kajap dom bruk hacih saat pandap mbang, piah peih prong drak pasa, rik dong patagok jien mek tame ka urang nong./.

Urang lang: Hani Pha – 06/10