Kadha vak di urang vak Nguyên Nhung:

Rilo thun ini mai, oh takik puk palei, hamu, puh di dom bhum bhap bini bangsa takik hu jeng labik ravang iek dui pachreih tuai dalam taneh ia saong langiu dunya. Langik tasik mekre, siam, dom ilamu meng kan, dom adat cambat tanarakun hadah krah di 53 bangsa takik adei sa-ai, hu jeng janih gheih mekre karei, jeng pandap hu yaom glaong di du lịch Việt Nam. Yau panuac khan di ong Tráng A Cao, bản Hua Tạt, huyện Vân Hồ tỉnh Sơn La: “Vân Hồ lac palei la-an, njam patam baoh kraoh bilan halei jeng hu, yau ye mận đào.. Tuai mai ravang iek saong eng drei kaoh, paik di bein, saong caong blei rilo. Urang nao veik Hà Nội ieu phone mai caong blei ye kol dahlak paik payua tui radaih pajeng tuai tabiak Hà Nội ka urang”

Dom labik “tự cung tự cấp” dahlau daih, urak ini hu pambuak jalan pablei salih mbuan lagaih, jeng dom bhum pala njam patam, baoh krah, phun jru. Kein lagaih di labik bhum ceik, bhap bini bangsa dak hu cakrok yaom glaong tuk dom bruk yau ye: jalan điện, sang bac, bilai iek ruak, dịch vụ viễn thông...dak harei dak hu siam tagok. Kuhria dalam vaktu 2011 - 2020, Rajaei brei buh tabiak dahlau meng kadung jien Karja brei ka dom huyện kathaot, xã, puk, palei biak kan kandah di bhum Tây Bắc, Tây Nguyên, Tây Nam bộ jaik 1.700 tỷ đồng, meyah kuhria gam dom pok jien daong saong iek pataom dalam bhap bini tagok tal labaih 16 rabau 700 tỷ đồng. Tal puac thun 2020, hu yaok pluh ribau bruk hạ tầng hu padang ngak, ba tame pandar, taong abih dom xã hu jalan radaih ô tô nao tal pasak xã, yaok pluh rabau km jalan dom janih nao tal yaok puk, palei hu ngak salah... Raidiuk di bhap bini daok dak harei dak hu glaong tagaok, rilo bhum hu jeng labik dui pachreih urang buh jien tame ngak mbang. Yau sang ong Ngin xã Đăk Yă, huyện Mang Yang, Gia Lai:  “Dahlau daih sang dahlak jeng biak kan kandah, meng hu mesraiy phun jien di gilang pariak sarak karja, jeng hu mbang pato pasram, iek glang phun pala yau ye phun cà phê saong raong lamo, sang jeng hu ginup meda jang, ngak kinh tế siam jang.”

 Dom jalan ngak di Đảng, sarak di Karja cakrok bhum bhap bini bangsa takik tukvak tapa hu ba mai dom siam mekre cambaih laih. Bruk patagok kinh tế bhum bangsa takik tukvak 2016-2018 mek hu 7% saong tagok jang tapa yaok thun, glaong jang kuhria rah tapa di taneh ia. Hu 27 huyện dalam bhum urang bangsa takik saong bhum ceik di 31 tỉnh, ban ngak salah bruk padang ngak palei pala bahrau. Dalam taneh ia hu 316 sang bac Phổ thông Bangsa gam bac gam daok haong labaih 109.000 anek saih. Tukvak 2016-2020, hu labaih 800 rabau bhap bini bangsa takik hu pato bruk ngak, ba brei bruk ngak ka yaok ratuh rabau menuac.

Tal urak ini, dom sarak daong bhap bini bangsa takik saong bhum ceik hu pataom pablak tame dalam danak dak bruk ngak negar patagok KTXH bhum bhap bini bangsa takik saong bhum ceik tukvak 2021 – 2030 piah cakrok abih gah KTXH bhum bhap bini bangsa takik. Tui kuhria, abih tih phun jien peih ngak Danak dak meng ini tal thun 2025 lac labaih 137 rabau tỷ đồng.

Ong Hầu A Lềnh - Akaok Mintri, Chủ nhiệm UB Bangsa brei thau: “Danak dak bruk ngak negar patagok KTXH bhum bhap bini bangsa takik saong bhum ceik tukvak 2021-2030 hu padang ngak haong 10 danak dak binah sit, hu peih tabiak di labaih 51 tỉnh bhum bhap bini bangsa takik saong bhum ceik tui jalan pataom veik dom sarak vaktu 2016-2020 saong vaktu dahlau daih piah peih ngak siam, ngak njauk ka dom bhum kan kandah di abih dalam dom nyaom bangsa hu điều kiện biak karei saong bhum bhap bini bangsa takik.”

Meng dom sarak siam lagaih dalam rilo thun tapa di Đảng, Karja daok rik daong paglaong raidiuk, bruk ngak mbang, ngak huak saong hatai sahneng di bhap bini, ngak jeng prein khang piah ka bhum bhap bini bangsa takik hu hadah hadai tagok, rik daong tame bruk cakrok patagok KTXH di dalam taneh ia./.