Mesup tame gilai, jala pandiak tagok puh, bier harei sup tagok tal bac, glaih glar yau nan min meng hatai caong bac hu, vak hu akhar haroh nan ye thei jeng chraih chrai nao tal tal bac pato akhar huruh ini. Daok dom cei gru, anai gru melam melam ba akhar tagok ceik jeng mek bruk chreih chrai meng tal bac piah ngak jeng bruk bui sambai, pachreih ba ka drei. Kadha vak di Đoàn Sĩ – Urang vak di rayo sap ndem VN daok di TP.HCM hu ndem ka tal pato akhar haroh ka mikva bangsa Raglai daok di xã Vĩnh Hải, huyện Ninh Hải, tỉnh Ninh Thuận.  

 Meng akaok bilan 11 tal urak ini, tal biar harei sup harei som, harei but, harei suk, di dua labik Sang bac Tiểu học Ngô Quyền daok di palei Đá Hang saong Sang bac Tiểu học Vĩnh Hy daok di palei Cầu Gãy, dalam xã Vĩnh Hải, huyện Ninh Hải, tỉnh Ninh Thuận jeng mboh hadah gom piah duh ka dom tal pato akhar ka mikva bangsa Raglai daok di labik tapen ceik dalam bhum taphia bein pakat negar Núi Chúa. 8 tal bac hu parabha jeng 2 ka 2 labik sang bac ngan haong dom urang bac lac labaih 70 urang.

Thun ini umo 70 thun, amuk Lâm Thị Tiềm jeng daok chreih chrai nao tal sang bac. Amuk Tiềm brei thau, luac rai di drei oh thau akhar, tok thau tame gilai ngak apuh, nan ye drei njauk ngak kreih camin ka anek taco ngak tui: "Drei bahrau nao mac min mboh takre lo. Kayua meta bhang nan ye maong iek suai damuai. Bac haong dom taco ka nyu bui sambai."

  Daok saai Mấu Văn Trùng, daok di palei Đá Hang, xã Vĩnh Hải, huyện Ninh Hải jeng brei mboh bruk bui sambai tuk hu mbaok tame tal bac pato akhar ka dom urang oh thau akhar di labik Sang bac Tiểu học Ngô Quyền: "Tame tal bac mboh hatai chreih chrai, anai gru, cei gru abih hatai tacei pato vak akhar, ngak toán. Kol dahlak hulin bac hu rilo ilamo, piah mai pato veik ka anek di drei."

Atah di labik Sang bac Tiểu học Ngô Quyền labaih 20 km jalan mbuan ceik kan kandah lac labik Sang bac Tiểu học Vĩnh Hy daok di palei Cầu Gãy. Di pak ini, jaik 30 urang bac lac urang Raglai daok tui bac tal pato akhar huruh.  

 Sang saai Cao Văn Kênh atah di sang bac jaik 10 km, min meng harei tal bac pato akhar huruh hu peih tabiak, saai ka oh padeih harei halei. Bruk njauk mayai nan lac saai jaoh sa gah takai meng sit, bruk nao mai biak kan kandah, njauk pandar gam dua gah tangin, min meng hatai kham marat bac akhar, saai Kênh jeng kham marat nao tal sang bac, tal labik bac: "Meng nan tapa ini jaik 10 mbaik jalan, mayah nao yau urang ye samar, daok dahlak nao suai damuai, gam nao gam padeih. Meng sit mai oh thau akhar, urak ini hu nao bac dahlak biak sambai."

Jaik 15 thun pato bac di labik Sang bac Tiểu học Ngô Quyền daok di Palei Đá Hang, anai gru Châu Thị Hoàng Dung hu bhian randap haong bruk kan kandah, glaih glar tuk daok di bhum ceik. Dom harei camriep, anai gru huac rilo, abih di nyu nan lac tuk melam, vil val lac sa sambo jhuk, hu gam sap preo manyi di athur glai meng atah danei mai. Yaom lac huac min nai gru oh klaak sang bac, oh klaak tal bac: " Raidiuk kan kandah, bruk ngak jeng glaih glar min tuk nao tal tal bac, urang jeng daok chraih chrai, bui sambai saong biak takre bac da-a, ngak ka anai gru jeng mboh sambai saong abih hatai pato tacei. Nan ye drei biak sambai tuk pato di tal bac ini, caong mikva  bac hu akhar saong khang hatai jia jang dalam raidiuk."

 Piah peih hu tal pato akhar ini, gah pato magru pambuak haong karja palei saong dom kapul padang Mban tacei jalan pato magru, jak ba mikva nao bac. Hadei di labaih 2 adit peih tal bac, dom manuac bac daok khik tani tanat lac 10 urang sa tal bac. Ong Lê Đặng Huỳnh Sơn, Phó Akaok Jabat Pato magru huyện Ninh Hải, tỉnh Ninh Thuận ndem lac: "Urak ini drei pato ye urang daok ngak krein randap. Peih hu tal bac ini meda palahik hu bruk oh thau akhar ka mikva bangsa. Mikva biak takre, hu mbaok tame bac gam gam."

Meng hatai caong bac hu, vak cambaih piah mai sang pato veik ka anek bhik, dom urang bac yaom lac jar var atau glaih glar tal halei jeng kham marat nao tal sang bac. Daok dom cei gru, anai gru, yaom lac rambah rambup glaih glar min meng hatai anit bruk ngak, hatai ranam di mikva hu pabak prein khang, pachreih ba urang kham marat, daong ka mikva Raglai daok di bhum taphia Bein pakat negar Núi Chúa thau akhar piah khang hatai jia jang dalam raidiuk./.