Di mangaok sruh ghe gilai nduac nao xã kaoh pulao Thạnh An, rahra bui sambai ndem mayai ka raidiuk dak harei dak salih bahrau. Ong Lê Văn Dũng (umo 54 thun), urang ruak bahrau nduac thận di Pasak Y tế huyện Cần Giờ jeng chreih chrai rik tame dom bruk bui sambai. Labaih 3 bilan ini mai, ong hu nduac than pak di huyện Cần Giờ, oh daok yam tapa ngin riyak atah biyah tame tal pasak TP.HCM.  Gam suak yava dalam hangin tasik, gam maong tame ia tasik hijao jangaih, ong Lê Văn Dũng hadar veik bruk nao nduac thận.

Yaok adit 3 mbang, ong Dũng nao tapa 2 mbang ndik ghe gilai piah tal Sang iek ruak Quận 8 nduac thận. Diuk ong lahik 4 thun ini mai, anek praong tok diuk tok pasang blaoh nao daok karei, anek likei taluac daok dalam ban raya, sa drei ong Dũng nao mai biak joa. Tết ini, ong Dũng meda chreih chrai haong mikva puk paga, ramik caga piah bui sambai haong anek taco:“Thun ini, thei jeng ndem lac mboh dahlak khang kadang jang, karei jang dom thun blaoh. Thun blaoh mbaok mata dahlak hijao, kanjik, rilo ruak kik, dahlak haduh hatai ka ruak kik blaoh sang danaok, anek taco ini deih. Urak ini, jumpataom, daok haong anek bik ka nyu bui sambai”.

Jeng di mangaok sruh ghe gilai ini, hu sa urang ruak nduac thận karei hu mikva urang daok di Thạnh An anit ranam saong sangka iek glang. Nan lac Huỳnh Tấn Tài, umo 34 thun, saai công an abih hatung hatian di xã kaoh pulao. Lac sa urang hu prein yava khang kadang, menuac ngak raong sang, hadei di tuk thau drei njauk ruak suy thận tukvak puac, Tài biak haduh hatai. Meng hu bruk pachreih ba di gauk gar dalam sang, saai nao nduac than piah khik suan diuk.

Jalan nao tame ban raya piah nduac thận ngan haong saai Tài lac biak glaih glar. Meng bier harei dahlau, saai saong amaik tagok ghe gilai tame ban sit Cần Thạnh pah sang ndih tapa malam. Luac melam sa-ai ndih oh hu, cang tal mesup page piah samu tagok radaih nao tal Sang iek ruak Nguyễn Tri Phương (quận 5). Gam nao gam mai, saai lahik abih 25 maong, mayah kuhria harei ye lahik dua harei piah nao jalan atah 90 km. Saai Huỳnh Tấn Tài khan lac:“Dahlau deih jeng duh hatai lo. Harei Tết tok dom harei bo drei tagok sang iek ruak piah nduac than. Anek bik daok di sang jeng oh hu mbang tet saong gauk, biak haduh hatai, huac ka anek mbang tet oh bui, kurang hatai anit ranam dalam sang. Min meng tuk hu nduac than pak Cần Giờ, adei hu rilo tukvak piah daok pak sang jang, blaoh jeng mbang manyum hu”.

Xã kaoh pulao Thạnh An daok di kreh tasik atah, bruk bo rahra pak ini huac di abih oh lac bruk eik lipa, rambah rambup, bo lac bruk nao jalan atah piah iek ruak, taong ruak. Kan kandah yau nan, nan ye hu oh takik menuac ruak suy thận trak klak bruk taong ruak mateh dhi.

Thau hu bruk kan kadah, glaih glar di dom menuac daok pak xa kaoh pulao Thạnh An jeng yau di huyện Cần Giờ, meng harei 18/10/2023, gah nduac thận nhân tạo kayua Sang iek ruak Lê Văn Thịnh (ban Thủ Đức) daong, hu peih tabiak. Urak ini, Cần Giờ hu 41 urang ruak nduac thận ye hu 17 urang ruak tut angan tame nduac than pak ini. Urak ini, rahra daok pak xã kaoh pulao Thạnh An bui sambai tuk hu nduac thận pak di Pasak Y tế huyện Cần Giờ. Ong Phạm Quang Triệu, urang daok jaik sang saai Tài brei thau:“Dahlau deih urang ruak yau Tài njauk tagok ban raya, nao ghe gilai biak kan kandah, jien ndo oh hu. Sang Tài biak kan. Kamuan Tài daok ranaih bo njauk ruak suy thận tukvak puac, drei huac lac kamuan nao mai rilo bo oh tapa truh, bo urak ini hu khang hadang lac biak uan tabuan. Mikva puk paga jeng biak uan tabuan,biak bui sambai”

Urak ini, sruh ghe gilai meng huyện Cần Giờ mai xa pulao kaoh Thạnh An yau samar jang, chreih chrai jang. Dhar mai, phun cúc pak ini jeng kanjik katam jang dalam mata maong di urang ruak nduac thận nhân tạo. Yaom lac harei Tết, rang ini jeng oh klak bruk halang dahrah, min urang jeng hu pataom mbaok gauk mbang huak, nan lac pandap hadaih Tết biak praong prang, biak hu yaom glaong./.