Thun bac bahrau 2023-2024 ini, sang bac Tiểu học saong THCS Phan Dũng, xã Phan Dũng, huyện Tuy Phong hu abih tih 226 anek saih di 2 pakat bac. Tal urak ini, bilik bac, pandap bac di 4 labik sang bac pabak hu bruk pato bac.

Phan Dũng lac xã bhum ceik di huyện Tuy Phong, rilo meng lac urang Raglei saong anek saih hu daong jien bac 200.000 sa bilan dalam 9 bilan bac tui sarak 04 di HĐND tỉnh thun 2021. Bruk pato meda lac hu tani tanat, min bruk bac jeng daok rilo duh hatai tuk jak ba anek saih nao bac oh lac mbuan.

Ong Nguyễn Trung Kiên, Hiệu trưởng Sang bac Tiểu học saong THCS Phan Dũng brei thau, di tuk padeih hè, dom adei bhian tui amaik ame tagok puh, urak ini ieu pataom dom adei tabiak bac biak kan. Akaok thun bac halei jeng yau nan, sang bac pambuak bruk haong karja palei, kapul pachreih bac nao tal yaok sang piah jak ba anek saih nao bac: “Min tal harei bac biak saong hadei di tuk peih thun bac bahrau, dom kamuan tabiak bac halei oh, daok kayua rilo kadha, abih di nyu lac kayua amaik ame. Sang hu sangka pambuak bruk haong sang bac ba dom adei tabiak bac ye siam. Daok oh ba tabiak, sang bac meda peih ngak dom bruk patui di nan. Dalam nan, sangka harei abih bhap bini ba uranaih tal sang bac, tal dom labik daok di bhap bini piah jak ba dom kamuan tabiak bac ka nyu siam mekre”.

Sang bac THCS Phan Thanh, huyện Bắc Bình, labik hu rilo anek kamuan urang Cam tui bac, thun ini hu 671 anek saih di 18 tal bac. . Amuk Phạm Thị Thanh Vân, Hiệu trưởng Sang bac THCS Phan Thanh brei thau, sang bac hu caga blaoh blai ka bruk pato saong bac, urak ini tok daok cang anek saih mai bac: “Bruk kan kandah abih ngan saong sang bac lac bruk jak ba anek saih tabiak bac akaok thun. Abih di nyu nan lac dalam thun bac ini meda mek jien bac tui adat bahrau. Yaom jien bac di sang bac dalam dom thun bac dahlau lac 270.000 đồng sa anek saih sa thun bac, yaom bahrau urak ini lac 450.000 đồng sa anek saih sa thun. Yaom jien bac klak jeng biak kan kandah duk saong sang di mikva bangsa, urak ini tui yaom bahrau ini, lac kan kandah jang”.

Huyện Bắc Bình lac labik hu rilo bhap bini bangsa takik di tỉnh Bình Thuận haong 7 xã harat urang bangsa dalam 18 xã, ban sit di huyện. Dalam nan hu 3 xã lac urang Cam saong 4 xã urang K’ho, Raglei. Dalam thun bac bahrau 2023-2024 ini, dalam huyện hu 67 sang bac di dom pakat, haong abih tih 27.352 anek saih. Amuk Lê Thị Kim Hoa, Akaok Jabat Pato Megru huyện Bắc Bình, tỉnh Bình Thuận brei thau, caga ka thun bac bahrau, huyện hu buh tabiak jaik 15 tỷ đồng piah ramik pasiam sang bac, tal bac, labik daok, blei pandap bac bahrau: “Dalam nan biak caik hatai sangka tal dom sang bac di bhum atah bayah, bhum bhap bini bangsa takik yau sang bac Tiểu học saong THCS Sơn Lâm, Sang bac THCS Phan Thanh, Sang bac Tiểu học saong THCS Phan Tiến saong Sang bac Tiểu học Phan Điền meda padang 2 pakat bac lac Tiểu học saong THCS Phan Điền piah duh ka anek saih bangsa takik daok di xã Phan Điền”.

Tui Sở Pato Megru tỉnh Bình Thuận, dalam thun bac bahrau 2023-2024 ini, dalam tỉnh hu labaih 311.100 anek saih (4 pakat bac) haong 9.772 tal bac. Piah plaih bruk mek rilo janih jien di akaok thun bac saong dalam thun bac, puac bilan 7 meng blaoh, Sở Pato Megru hu harak payua UBND dom huyện, ban sit saong dom sang bac THPT công lập piah peih ngak njauk bruk mek dom janih jien dalam thun bac, njauk tui bruk ba tabiak di adat. 

Daok yaom jien bac dalam thun bac bahrau ini, gah pato megru ngak tui Sarak ka 05 di HĐND tỉnh Bình Thuận, dalam nan tabiak bruk mek jien bac tui yaom biar abih di sarak 81, harei 27/8/2021 di Thủ tướng Rajaei. 

Tui amuk Nguyễn Thị Toàn Thắng, Yam ndok Sở Pato Megru tỉnh Bình Thuận, yaom biar abih ini jeng glaong jang duk haong thun bac 2022- 2023. Yaom tagok meng 3 tal 5 mbang tui labik, tui bhum, nan ye meda lac kan kandah ka anek saih bhum bhap bini bangsa takik.

“Urak ini, Sở Pato Megru jeng hu harak likau Mintri pato Megru brei adat lac anak meta mek tui yaom di thun bac 2021-2022, lac yaom oh ka tagok. Anak tal, Sở Pato Megru brei tui iek, cang pang meng Mintri Pato Megru piah hu panuac khan cambaih laih ka amaik ame di anek saih dalam tỉnh thau.”

Thun bac bahrau 2023- 2024 daok jaik tal, piah klah rabha binah halei kan kandah haong bhap bini bhum bangsa takik, dom ban, ngành, kapul nyaom, dom urang ngak pahla dalam saong langiu tỉnh Bình Thuận daok ba gauk jak ba alin hadiah khan ao đồng phục, pandap bac ta-a, bảo hiểm y tế... brei ka anek saih sang kan kandah, daong ka dom adei sahanang hatai nao bac./.