Tỉnh Bình Dương lac labik lagaih piah buh jien tame ngak mbang, dui pachreih hu rilo doanh nghiep negar langiu (FDI). Dalam dom harei tapa, bruk klah rabha, daong ka mikva gah Barak gaok rabuk, ia sua hu pambak tabiak khang dalam dom doanh nghiep FDI di tỉnh.

 Taphia bruk daong meng jien, rilo doanh nghiep dalam tỉnh jeng hu daong meng kaya pandap. Pagap yau Kong ti Cổ phần Kaya pandap mbang saong Ia Menyum Nam Việt di ban Dĩ An hu daong yaok rituh tấn kaya pandap yau brah, mì tôm, ia menyum, pandap pandar yaok harei…gam haong dom pandap di kong ti, haong yaom jien abih tih jien tagok tal 9,3 tỷ đồng. Taong abih jien nan hu kaoh tabiak meng jien mek tame, jien laba di kong ti. Taong abih pandap hu kong ti pajeng ba nao tal dom tỉnh bhum ceik gah Barak yau Tuyên Quang, Lào Cai, Yên Bái, Phú Thọ…

Amuk Trần Thị Nhung, Phaok Taong yam ndok tacei ba Kong ti Nam Việt brei thau: Taong abih urang jakar, urang ngak dalam kong ti hu brei mboh hatai gul pataom biak njauk pok meyaom. Urang yau var mbang, var ndih piah rami ramik kaya pandap, tame paok yaok thùng kaya pandap, haong hatai caong ba tal mikva bhum ia sia dom pok pandap siam di abih.

 “Tui jalan ngak lac, taong abih brei ka mikva atah bayah bhum ia sua, kol dahlak meda ndom lac yau nan. Kayua taong abih urang ngak, meng akaok yaok gah, yam ndok saong urang pan akaok pakat glaong jeng pataom tame papaok yaok blah khan, ngak tabiak yaok pandap saong halan hatian ngak langiu tukvak, nao ngak harei adit. Jeng hu urang ba menuac dalam sang yau diuk, pasang, anek di langiu tame kong ti piah daong prein, cagaka ka mbang ngak pahla ini."

Langiu di bruk rik tame Kadung jien daong kayua Ủy mban MTTQ Việt Nam tỉnh Bình Dương peih tabiak, rilo doanh nghiep daok nao ravang, klah rabha kan kandah haong gauk tian di urang ngak gaok khat lahik trak kayua rabuk ia sua. Ong Trịnh Như Khoa, Akaok Công đoàn Kông ti TNHH Pung Kook Sài Gòn 3 brei thau:

  “Bruk patui veik lac daok cang gah nhân sự pasang iek gilac dom bruk hu sang daok di bhum ia sua, abih di nyu lac gah Barak, dom urang saong gaok kan kandah yau habar piah hu jalan daong samar drah. Taong abih urang đoàn, mban pan akaok kong ti jeng pachreih tui jalan di drei kayuasamar drah, tani tanat”

Tal tuk ini, hadei di peih tabiak, Ủy ban MTTQ tỉnh Bình Dương taduan hu labaih 47 tỷ đồng meng dom urang menuac, doanh nghiep saong urang ngak. Jien ini hu kaoh tabiak meng harei ngak di urang ngak saong dom jien rik daong halan hatian. Dalam nan, rilo doanh nghiep daong jien praong yau: Taong Kong ti Becamex IDC daong 5 tỷ đồng; Kong ti Cổ phần Đại Nam 5 tỷ đồng; Tập đoàn Kim Oanh Group 3,2 tỷ đồng; Kong ti TNHH Pambuak Labik Kong nghiep Việt Nam-Singapore 2 tỷ đồng; Kon ti Thanh Lễ 2 tỷ đồng…

Ong Nguyễn Tấn Đạt, Phaok akoak Liên đoàn Lao động tỉnh Bình Dương brei thau: Liên đoàn Lao động hu ieu dom doanh nghiep ba gauk klah rabha haong bhap bini drei gaok kan kandah di rabuk ia sua:

 “Anak tal, Liên đoàn Lao động tỉnh Bình Dương hu pambuak bruk haong Liên đoàn Lao động dom tỉnh, ban gaok bala, ia sua piah hu daong samu tal dom adei sa-ai urang ngak kong daok ngak di Bình Dương. Meng nan, daong dom adei sa-ai hu pabak prein, hatai jia piah patui veik nao ngak”

Dom bruk ngak siam gheih di dom doanh nghiep Bình Dương hu rik tame oh sit ka bruk daong mikva bhum ia sua samar drah tani tanat raidiuk. Bruk ngak ini oh lac brei mboh trách nhiệm xã hội di doanh nghiep bo daok pambak tabiak hatai “anit ranam daong gauk” dalam bol bhap./.