Meng sa tal bac võ brei ka urang jakar, urang lin di Bộ Chỉ huy Quân sự tỉnh, tal harei ini hu cak rok patagok jeng 13 kalup kapul võ thuật dalam bol lin tỉnh Đồng Nai. Bruk njauk biai nan lac langiu di dom urang likei, kumei sĩ quan, urang lin chuyên nghiệp, urang likei dân quân tự vệ, dom kalup kapul, daok pachreih hu biak rilo urang lin kumei “Sao vuông” jeng hu mbaok tame pathram. Khaol drei duah thau tapa kadha vak di Thế Anh – Vinh Quang, Urang pambuak bruk haong Jabat daok di TP.HCM:

Yaok adit, di harei Angar saong harei Jip, 13 kalup kapul võ thuật dalam  bol lin vũ trang (LLVT) tỉnh Đồng Nai pataom gauk peih bruk pathram tui jalan pato tacei hu ba tabiak ngak meng tỉnh tal puk palei.

Nguyễn Thị Kiều Diễm, urang kamei dân quân thun ka 3 di Ban CHQS xã Phước Hiền, huyện Nhơn Trạch, tỉnh Đồng Nai hu mbaok tame pathram võ thuật hu labaih sa thun ini mai. Meng hatai saneng lac sa urang lin dalam kapul dân quân tự vệ, pathtam võ thuật daong ka rup pabap nyu khang kadang jang; gam haong bruk pachreih tui di baoh sang, gauk gar, urang kamei lin dân quân hu pabak prein khang, dak harei dak takre pathram: "Drei pathram môn võ ini, dalam sang thei jeng pachreih tui. Tuk bhian randap haongbruk pathram, adei mboh takre jang saong patagok bruk pathram, paglaong pren yava piah daong dak padang saong pacang khik palei negar".

Ngan haong dom urang kumei dân quân tự vệ, bruk pathram võ thuật di dom kalup kapul tukvak akaok mereip gaok biak rilo kan kandah ka pren yava, ka hatai kham merat. Tukvak pathram hu rilo manuac urang karei di gauk, meng dom urang oh ka thau hagait ka võ thuật, tal dom urang hu mbaok tame blaoh pathram dalam bol lin, atau di dom kalup kapul võ thuật di gah langiu. Kayua yau nan ye, MBan pato pathram dom kalup kapul biak sangka tal asal kadha, danak dak, ba tabiak giáo án ka nyu laghaih ngan haong prein yava di yaok urang, abih di nyu lac ngan haong dom sa-ai  kumei prong thun, hu pasang likei, hu anek bhik. Asal kadha pato pathram hu gam võ Vovinam saong võ Quân đội, 35 thế liên quyền. Urang kamei lin dân quân Nguyễn Thị Ngọc Huyền, Ban CHQS xã Phú Hữu, huyện Nhơn Trạch, tỉnh Đồng Nai khan lac: "Akaok meti nan lac padang hu bruk kham merat saong khang hatai jia tame rup drei ngak hu dom bruk hu jao brei, jeng yau halar hatian taduan mek saong salih ka dom urang likei dân quân dalam bruk khik ramik  an ninh trật tự tuk hu jao bruk".

Sa-ai Phan Minh Tiến, Phaok Akaok klup kapul võ thuật bol lin bhap bani huyện Nhơn Trạch, tỉnh Đồng Nai brei thau: "Dalam tukvak pato pathram, kuhria gam dom adei sa-ai kamei jeng yau dom sa-ai hu parabha bruk pathram dalam klup kapul võ thuật ye hatai sahneng biak glaong, kham merat pathram. Tukvak anak tal, dom urang  pathram siam ye hu ba tame pathram haong đội tuyển piah hu mbaok tame dom danak dak nyaom pakacah, hội thao"

Klah rabha dom kan kanda glaih glar di dom urang kamei lin bhap bani tuk hu mbaok tame pathram võ thuật, Đảng ủy, Bộ CHQS tỉnh Đồng Nai hu daong palagaih di abih gah cơ sở vật chất, pandap panda piah pathram, ramik veik vaktu ka nyu laghaih piah ka dom adei sa-ai gam ngak siam bruk ngak di jabat, iek glang tani tanat baoh sang di drei, gam hu mbaok tame pathram dalam bui sambai chreih chrai, hu jak jeng glaong. Đại tá Vũ Văn Điền, Chỉ huy trưởng Bộ CHQS tỉnh Đồng Nai brei thau: "Bộ Chỉ huy hu jak ba saong daongpalaghaih ka dom adei sa-ai kumei hu mbaok tame piah pathram pren yava, taphia di nan hu thau ka võ thuật, paglaong ilamu dalam tukvakngak bruk. Khaol dahlak tuk halei jeng pambuak haong bruk pakacah saong tuk dom urang kamei dân quân tự vệ pathram, nao pakacah mek hu thành tích ye jeng hu ba angan tabiak dahlau piah pilih ruah chiến sĩ thi đua, pok meyaom tapa dom mbang ngak bruk. Yau nan, meda jul patagok bruk adei sa-ai kumei pathram biak chreih chai".

Dom thun tapa, bol lin bhap bani tỉnh Đồng Nai tuk halei jeng mek hu hạng glaong dalam dom mbang pakacah, hội thao võ thuật pakat tỉnh saong pakat Quân khu, dalam bol lin, dalam nan hu bruk hu mbaok di dom urang likei, kumei dân quân tự vệ. Urak ini, Bộ CHQS tỉnh Đồng Nai hu Tỉnh ủy, UBND tỉnh jao brei peih ngak danak dak ngan haong yaom phun jien abih tih labaih 30 tỷ đồng piah padang ngak cơ sở vật chất, blei pandap panda piah pathram. Nan lac bruk siam laghaih piah ka jabat paglaong bruk ngak di dom klup kapul saong pambak tabiak bruk pathram võ thuật tal taong abih bhap bani dalam tỉnh dalam tukvak anak tal./.