Hadei di 14 thun ngak di Công ty Trách nhiệm hữu hạn Pouyuen Việt Nam, quận Bình Tân, TP.HCM, dalam mbang cakak trun urang ngak di Cty di bilan 5/2023, saai Lê Thị Bích Trâm, palei daok di Sóc Trăng njauk padeih ngak. Saai Trâm jeng hu nao likau bruk ngak min dom bruk ngak haong yaom jien bilan tui hatai caong ye saai oh hu taduan tame ngak, kayua umo tapa 40 thun. Daok dom bruk ngak karei ye jien bilan bier jang jien bilan klak, nan ye saai ngak harak likau mbang bảo hiểm oh hu bruk ngak, blaoh cang suak mek jien bảo hiểm xã hội sa mbang:

 “Adei daok kuhria suak mek jien bảo hiểm sa mbang. Urak ini daok pak sang piah sangka ka anek nao bac, oh nao ngak di Cty veik, nan ye oh kak tame. Tuk dahlau, adei tame ngak bruk di Cty ye jeng sahaneng lac piah mbang jien hưu ye oh sahaneng lac suak mek jien min urak ini adei suak mek”.

Urak ini rilo urang ngak karei jeng daok lahik bruk ngak di doanh nghiệp klak, oh nao duah bruk ngak di labik karei bo cang ngak harak taduan jien bảo hiểm lahik bruk ngak, cang suak mek jien bảo hiểm xã hội sa mbang. Yaom lac hu rilo sàn giao dịch bruk ngak hu peih tabiak, min urang ngak jeng ka oh duah hu bruk ngak lagaih. Saai Trần Thị Hà, umo 39 thun, dahlau daih ngak di Công ty TNHH PouYuen Việt Nam hu mbaok tame sàn giao dịch bruk ngak di quận Bình Tân brei thau:  "Bruk ngak phổ thông lac dahlak jeng ngak hu abih, min urak ini tok daok gar lac daok mbang jien bảo hiểm lahik bruk ngak min. Dahlak jeng daok sa bruk ngak lagaih min kayua daok taduan bảo hiểm lahik bruk ngak nan ye ka oh hu Cty halei lagaih. Kayua taong abih dom công ty jeng njauk đóng bảo hiểm hadei di tuk tame ngak hu sa bilan”.

Puac bilan 11 meng blaoh, Pasak Jit vu bruk ngak TP.HCM pambuak haong 13 tinh, ban di Bhum taneran kraong Cửu Long peih san jao jit bruk ngak pambuak bhum, min dom urang lahik bruk ngak hu mbaok tame pilih ruah lac biak takik. Rilo doanh nghiệp caga dahlau bruk pambuak haong dom urang tut angan tame min jeng taduan hu panuac javap jaloi lac tok mai taduan jien bảo hiểm ye ka oh hu hatai caong duah bruk ngak.

Dalam tuk urang ngak lahik bruk ngak ka oh caong duah bruk ngak bahrau, ye doanh nghiệp lac daok caong urang ngak. Công ty cổ phần Pandap mbang Cholimex, huyện Bình Chánh, TP.HCM bhian pilih ruah dom bruk ngak hu tangin gheih ngak saong daok caong pilih ruah yaok ratuh urang ngak phổ thông piah pabak ka bruk ngak di Cty. Min, Cty jeng oh mbuan dalam bruk pilih ruah urang ngak. Amuk Lê Thị Kim Liên, gah nhân sự di Cholimex khan lac: “Urak ini dom labik ngak kong di palei jeng hu rilo nan ye urang ngak takre ngak bruk jaik sang piah trun manieng dom jien sahui tuk daok pak ban raya. Nan ye hatai caong bo dom urang ngak kuhria mai palei piah ngak bruk lac biak glaong. Taphia di nan, gah ngak bruk bo dom urang pilih ruah ngak jeng mbuan jang, pagap yau jhik manyim atau kalik takhaok, điện tử”.

Bilan 5 meng blaoh, Sở Lao động- Thương binh saong Xã hội TP.HCM peih bruk pasang iek 2.429 urang dalam abih tih dom urang ngak njauk cakak trun ye hu labaih 50% caong mai palei, jaik 33% oh hu hatai caong tacei jalan ba bruk ngak saong bac bruk ngak, labaih 4% hu hatai caong bac bruk ngak saong duah bruk ngak, 12% hu hatai caong duah bruk ngak...

Bahrau ini tuk rik panuac ka Dự thảo Hukum bruk ngak (pasiam veik), hu rilo panuac di dom gah chức năng brei thau lac, njauk patakik dom urang hu taduan jien daong lahik bruk ngak, abih di nyu nan lac dom urang oh lac biak njauk lahik bruk ngak. Tui adat urak ini, mayah urang ngak njauk brei padeih mbang tui jien daong lahik bruk ngak kayua makna lac 2 mbang oh khin nao ngak bo Pasak jit vu bruk ngak yaih khan bo oh hu makna hagait, ye meda oh hu khik viek tukvak daok gilac piah mbang tui jien Bảo hiểm lahik bruk ngak. Nan ye, njauk hu jalan langyah ka dom urang jaik abih tukvak mbang tui bảo hiểm lahik bruk ngak./.