Bruk glut jaleih taneh tapen kraong daok jeng bruk samar drah ngan haong bhap bini bhum kraong ribaong Cà Mau

Kreh bilan 6, dom bruk glut jaleih tapen kraong di puk palei gam gam hu pathau khan mai mBan Chỉ huy pacang caga bala saong daong duah urang njauk bala tỉnh Cà Mau. Hu harei dalam sa huyện hu tal dom bruk. Bruk glut jaleih taneh dak harei dak tagok glaong dalam bilan hajan ribuk di bhum kraong ribaong Cà Mau, abih di nyu nan lac di dom huyện  tapen tasik. Huyện Đầm Dơi lac labik hu rilo bruk glut jaleih glaong abih dalam tỉnh. Meng akaok thun tal harei 17/6 hu 30 bruk glut jaleih tapen kraong, ngak khut labaih 20 sang bhap bini, labaih 200m jalan bê-tông palei, 2 cống tathuak hadang, sa labik sinh hoạt palei, abih tih khat lahik labaih 2 tỷ đồng. Patui di nan lac huyện Năm Căn hu 10 bruk, glut jaleih abih tih labaih 236m, ngak khut tayah 10 baoh sang bhap bini saong 119m jalan palei.

Ong Nguyễn Phương Bình, Phó akaok UBND huyện Đầm Dơi brei thau, bahrau 2 bilan tabung glaong di bilan hajan ribuk thun 2022 bo dom bruk glut jaleih tapen kraong di pak ini samu mateh dom bruk glut jaleih di dalam thun 2021. Kayua yau nan ye, pak ini hu pacang veik, kakei bhap bini paglaong hatai sangka, paduan ba dahlau dom pandap panda hu yaom glaong saong oh ndih tapa melam di sang daok padang ngak di labik mbuan njauk glut jaleih glaong, caga dom bruk meda rahtabiak.

Tui Văn phòng mBan Chỉ huy pacang caga bala saong daong duah urang njauk bala tỉnh Cà Mau, yaok thun 2 gah takai kraong, ribaong di Cà Mau yaok gah glut jaleih labaih 25cm. Yaok pataom dalam 10 thun jaik di ini, Cà Mau lahik nao takik di nyu 4.000ha taneh. Cà Mau hu 3 mbaok mbaiy nao gah tasik, abih tih takai tasik atah labaih 250km saong jaik 10.000km kraong, ribaong. Dalam nan, yaok rituh kraong, ribaong nduac tabiak tasik Biển Đông saong Biển Tây, gaok tapak tal bruk bán nhật triều ngak ka ia glaong biar jang gauk biak praong, hu labik tal labaih 3m. Ini jeng lac makna ngak ka bruk glut jaleih dak harei dak trak damak jang.

Tui yaok pataom meng Mban Chỉ huy pacang caga bala meng langik tasik saong daong duah urang gaok bala tỉnh Cà Mau, tal harei 20/6, nan lac hadei di labaih 2 bilan kuhria meng di tuk bilan hajan ribuk di pak ini, tỉnh hu jaik 50 labik glut jaleih, ngak khut jaik 30 sang bhap bini saong 500m jalan palei. Rilo bruk glut jaleih rahtabiak pak di labik darak pasa, labik hu rilo manuac daok atau labik canah 3 di kraong.

Langiu di bruk lac kayua taneh riya, thủy văn, kayua jalan ia nduac khang, ye makba ba tal glut jaleih daok mai meng anek manuac, abih di nyu nan lac bruk baoh sang bhap bini eng drei peih praong sang danaok, labik pablei salih lih tabiak takai kraong, kateik trak tagok mbaok haluk lamin. Tui gah ngak nong tỉnh Cà Mau, karja saong dom puk palei daok padang biển cảnh báo di 130 labik glut jaleih tapen kraong dalam tỉnh; daok pathau khan bhap bini oh pok paglaong, padang ngak sang bahrau di dom labik tapen kraong ngak ka bruk glut jaleih mbuan rahtabiak, pathau khan ka dom baoh sang bhap bini bhian pasang iek dom labik sang daok, mboh hu hagait karei piah hu jalan langyah, paduan ba nao labik karei, pala phun tapen kraong piah khik caga sang danaok.

Tui ong Tô Quốc Nam, Phó Yam ndoc Sở Ngak nong saong Patagok palei pala tỉnh Cà Mau, lang yah  bruk glut jaleih taneh tapen kraong daok jeng bruk praong ngan haong bhap bini bhum kraong ribaong Cà Mau. Min, piah lang yah tal labik tal dhua meng dom bruk ngak ar pacang praong ye phun jien buh tame biak rilo, yam tapa kadung jien kanja di pak ini. Min ini lac bruk njauk ngak. Kayua yau nan ye, tukvak anak tal, gah chức năng tỉnh meda pambuak bruk haong dom vụ, viện, sang bac, urang ilamo ba gauk roh duah rami ramik jalan ia nduac tapen kraong di yaok kraong ribaong, abih di nyu nan lac di dom labik glut jaleih piah hu jalan lang yah ka nyu siam lagaih di abih./.

Urang lang: Thu Thao – 01/07