Urang njauk bala di bruk pablei salih menuac urak ini, oh lac urang kumei, uranaih bo daok hu bruk pablei salih urang likei, pablei salih anek kamar bahrau menek, anek kamar daok dalam tian, pablei salih nội tạng, ndih tapui mbang pah. Urang vak Hà Nam hu kadha vak ndom ka bruk ini:

Bruk pablei salih menuac di dom jalan tapen negar, bhum tasik saong ba menuac Việt Nam tabiak negar langiu suan hukum jeng daok rah tabiak srau kadau saong tagok rilo. Pathau khan di Cục Cảnh sát hình sự (Bộ Công an) brei thau: Dalam thun 2022, dalam taneh ia hu mboh, duah thau 90 bruk pablei salih menuac, pachot pablei 222 urang. Dalam 6 bilan akaok thun ini, dalam taneh ia daok hu mboh, duah thau 88 bruk, haong 229 kol pablei salih menuac.

Daok tui Cục Pacang caga ma túy saong tội phạm (Bộ đội biên phòng): dalam 6 bilan akaok thun ini, BĐBP hu dang tabiak, pambuak bruk haong dom gah chức năng duah mboh, langyah 10 bruk medil pablei salih menuac meng Việt Nam tabiak taneh ia langiu, cap khik, langyah 27 bruk, haong 25 kol pablei salih menuac, pambuak tal 47 urang njauk bala.

Ong Lê Quang Nguyên, jabat Pacang caga pablei salih menuac, Cục pacang caga ma túy saong tội phạm, Bộ Tư lệnh Bộ đội biên phòng brei thau:

 “Dahlau daih ndom menyai tal pablei salih menuac, kol drei bhian saheng tal bruk urang kumei njauk pablei tapa Trung Quốc, njauk kateik greik tok pasang suan hukum, bloh tal dom uranaih. Min meng hadei di jit Covid-19 tal ini, mboh hu bruk salih karei meng labik tal urang njauk bala pablei salih menuac. Urak ini, likei dam njauk pablei salih jeng tagok rilo. Pagap yau di jalan tapen negar haong Trung Quốc, urak ini, bruk caong duah bruk ngak saong caong tok gauk haong gah Trung Quốc jeng biak glaong, nan ye jeng daok hu rilo bruk mbuan rah tabiak."

Jalan ngak di kol pablei salih menuac lac pambak tame mạng xã hội yau: Zalo, Viber, Facebook…, pandar angan je, umo thun, labik daok ja piah kết bạn, ngak krein, ngak randap, pagun sanya duah bruk ngak haong jien bilan galong, tok pasang negar langiu meda hu raidiuk kaya meda, bingi sahanang. Hadei di nan, pachot pablei tapa negar langiu, kateik greik ngak kumei me-in saong ngak diuk suan hukum, kateik greik ngak bruk atau ngak dalam dom quán karaoke, massage.

Taphia nan, dom kol tội phạm hu pambuak tal pablei salih menuac jeng srau kadau jang, pagap yau: kol nyu mai jaik duah ngak krein ngak randap haong dom urang njauk ruak thận, suy thận caong hu pagam thận piah môi giới, tabiak yaom pablei salih blaoh mbang laba suan hukum. Langiu di nan, kol nyu daok padang kapul, nyaom kandauk “Brei taduan anek raong” angaok mạng xã hội, duah dom urang kumei metian min oh khin raong anek atau sang kan kandah piah likau anek raong. Hadei di nan, ba nao pablei mek jien. Ong Nguyễn Hải Hòa, urang jakar Jabat Pacang caga kol tội phạm pablei salih menuac, Cục Cảnh sát Hình sự (Bộ Công An) brei thau:

 “Jalan ngak di kol pablei salih menuac urak ini biak kan thau. Menuac pan akaok saong kapul nyaom di nyu bhian daok di negar langiu. Pagap yau di Campuchia ye menuac pan akaok lac urang negar langiu tacei pato saong ba jalan ka urang Việt Nam kateik greik urang ngak bruk saong pachot meblah mek drap ar  urang Việt Nam di Việt Nam. Atau rilo labik di Lào, Campuchia, urang po jeng lac urang negar langiu tacei pato jalan pablei salih menuac, ngak kan kandah ka bruk pasang iek, duah thau saong langyah kol nyu”.

Thau lac bruk pacang caga pablei salih menuac lac bruk njauk ngak chip, ngak gam gam saong suai lavik, tukvak tapa, dom Bộ, ngành saong dom tỉnh ban hu peih ngak rilo jalan, tapa nan rilo bruk pablei salih menuac hu cap mek. Rilo urang njauk bala hu daong pa-klah tabiak saong daong ba mai puk palei. Min bruk pablei salih menuac jeng daok rah tabiak srau kadau. Rilo menuac kayua kurang thau jeng daok njauk lah pachot, njauk kateik greik ngak bruk, kateik greik ngak kumei me-in, pablei salih bộ phận dalam rup… ngak srau kadau puk palei, ngak tayah haniem phul di rilo baoh sang. Nan ye bruk daong ka urang gaok bala hu mai veik puk palei daok hu dom jabat sangka, peih praong gavang tangin tal yaok urang gaok bala piah “oh thei njauk klaak veik gah likuk”.

Piah pacang caga kol tội phạm nguy hiểm ini, gam haong bruk ba tangin tame mesruh piah duah mboh saong langyah catang kol pablei salih menuac di gah chức năng saong karja palei, bruk daong prein di dom kapul nyaom dunya, yaok rahra njauk paglaong hatai sahneng saong thau jalan pacang plaih piah oh jeng urang njauk bala di kol pablei salih menuac./.