Urak ini, daok hu rilo danak dak jalan nduac samar hu padang ngak di bhum ĐBSCL saong tuk dom jalan nan hu ngak salah, meda lac prein khang praong piah pambuak pagam TP. HCM haong dom bhum kinh tế praong dalam taneh ia. Kadha vak di urang vak Phạm Hải.

Bhum ĐBSCL hu labik dang praong dalam jalan kinh tế gah Meraong di bhum sit kraong Mê Kông peih praong, pambuak haong bhum Đông Nam Á saong dunya. Bhum ini, lac pasak ngak nong di taneh ia min jaik abih pandap panda blei tame, pablei tabiak taneh ia di bhum ĐBSCL jeng brei tapa pabah lamnge di TPHCM. Bruk ini nyu ngak patrun prein khang meriak gauk pandap panda di bhum, tagok jien sahui logistics.

Jalan mbak nao mai di bhum ĐBSCL cakrok oh ka hu yau hatai caong khin, oh ka pabak hu bruk cakrok patagok KTXH. Yaom lac jalan roya 1, lac jalan nao mai praong hu ngak pasiam veik, min bruk gar jalan jeng daok rah tabiak. Rilo labik jalan daok sit, oh siam, jalan radaih nduac samar hu takik.

Piah lang talaih bruk pacang cakak jalan mbak nao mai ka bhum, rilo danak dak jalan radaih nduac samar hu peih ngak. Min tuk dom jalan radaih nduac samar dalam bhum hu peih ngak haong gauk, ye bruk caong hu cuah piah ngak jalan lac biak praong, jaik 54 triệu m3, caong hu dalam thun 2023 saong thun 2024. Min dom cuah urak ini tapa pasang iek bahrau hu 37 triệu m3, samu 70% bruk caong hu. Tui ong Ngô Hoàng Nguyên, dom tỉnh ban njauk kuhri kuhria brei ngak dahlau danak dak ka abih bhum piah pabak pandap ngak, piah jhul samar tukvak ngak salah dom danak dak jalan mbak praong dalam bhum ĐBSCL: "Kayua bhum ĐBSCL meda pandar tatua angaok thu, nan ye meda kuhri kuhria “ cao độ” ka nyu lagaih, kayua hu bilan ia ndik nan ye hu tuk rilo jalan nduac samar nyu jeng ar pacang tuk nan, oh siam ka alam môi trường. Bruk praong lac patrun patakik haluk haong cuah piah ngak, langiu di nan, dahlak daok sahneng mboh lac, cuah mek rilo meda ba tal glut jaleih, bloh kol drei njauk langyah bruk glut jaleih".

Urak ini, hu 2 danak dak praong di Trung ương dalam ban Cần Thơ lac danak dak jalan radaih nduac samar Bắc - Nam gah Timur tukvak 2021 - 2025 labik Cần Thơ - Hậu Giang saong danak dak jalan radaih nduac samar Châu Đốc - Cần Thơ - Sóc Trăng. Ini lac dom danak dak praong piah pambuak pagam dom tinh ban haong gauk saong pambuak pagam TP. HCM, jeng yau dom bhum kinh tế praong dalam taneh ia. Anak bruk caong hu cuah piah ngak dom jalan radaih nduac samar, akaok UBND ban Cần Thơ Trần Việt Trường hu panuac caong pasang iek, ngak jalan radaih nduac samar di mangaok glaong: "Padang ngak jalan radaih nduac samar di mangaok glaong kayua urak ini, ĐBSCL tok hu jalan Roya ka radaih nao mai, dom tinh ban dalam bhum daok angaok jalan cakrok, dom radaih nao mai angaok jalan dak harei dak rilo, abih di nyu bhum ĐBSCL lac bhum kraong ia hu biak rilo kraong ribaong. Nan ye bruk padang ngak jalan radaih nduac samar di mangaok glaong lac biak lagaih saong njauk ngak chip".

Urak ini, Mintri Kế hoạch saong Đầu tư hu pambuak bruk saong Mintri Jalan mbak Pajeng ba, saong 13 tinh ban padang ngak 16 danak dak ka patagok bhum ĐBSCL. Bruk ngak di dom danak dak lac piah patagok dom jalan mbak pambuak pagam haong dom tinh ban; padang ngak pasiam dom jalan tapen tasik; paglaong prein khik ramik halau ia, pacang saong caga biến đổi khí hậu; peih ngak quy hoạch abih gah cakrok bhum.

Ong Phạm Hoàng Mai, akaok Vụ Kinh tế Đối ngoại, Mintri Kế hoạch saong Đầu tư brei thau lac, Mintri Kế hoạch saong Đầu tư hu panuac likau brei quyền ka tinh ban lac jabat ngak po dom danak dak jalan roya ngan saong dom danak dak hu pambuak bhum, gam tal 2 tỉnh ban, likau patabiak sarak karei jao ka 1 tỉnh ban ngak po đầu tư.

Dalam quy hoạch dom jalan radaih tukvak 2021 - 2030, pamaong tal thun 2050 di bhum ĐBSCL, 6 jalan radaih nduac samar atah abih tih 1.166 km, mbaok jalan hu meng 4 tal 6 jalan radaih. Tuk jalan mbak nao mai bhum ĐBSCL hu ngak siam, ngak salah, meda jeng prein khang jhul bhum patagok labik dang khang gah kaya ikan, baoh kayau saong padai brah, daong jhul patagok KTXH di dom tinh ban dalam bhum di anak tal./.