Rilo bruk pakacah the duc the thao hu peih ngak dalam huyen

  Di mblang bein xã Phan Hoà, huyện Bắc Bình, tỉnh Bình Thuận tuk dah page saong tuk biar harei sup, hu biak rilo rahra umo thun praong sit karei di gauk daok pasram, pahat, me-in dom môn thể thao. Meyah urang praong thun pilih ruah pasram pahat dom bài dưỡng sinh njual njac ye dam dara, urang ranaih umo takre pasram dom pandap pahat ka tian, takai, pha… hu caik di mblang bein. Kayua jit ruak Covid-19 daok srau kadau, nan ye urang tame pasram pahat TDTT di dom mblang bein, labik hu rilo menuac jeng thau paglaong hatai sahneng pacang caga jit, ngak njauk tui 5 paka di Mintri Y tế.

Amuk Bá Thị Ngọc Nha daok di palei Bình Thắng, xã Phan Hoà, huyện Bắc Bình brei thau, yaok harei, meng mon 5 mesup, dahlak nao kabak meng sang tal mblang bein piah pasram haong dom pandap langiu langik, gam pahat rup pabhap, gam hu suak yava dalam langik tasik la-an bingi. Meng tuk pasram pahat yau nan, dahlak mboh rup khang kadang jang, hu prein yava jang dahlau biak rilo.  

 Anai thun ini umo 70 thun paje ………..    

Daok di palei Cam Bình Mỹ, xã Phan Thanh, huyện Bắc Bình, tukvak tapa bruk caoh mbanh dalam mblang sit - mini di likei dam, uraniah sit saong anek saih jeng tagok biak khang. Yaom lac oh hu mblang caoh mbanh di palei, min meng hatai takre me-in thể thao,  dom adei ba gauk nao duah mblang dit blong nhân tạo di labik ban sit Chợ Lầu, atah di palei Bình Mỹ jaik 3km. Ngak tui jalan xã hội hoá, kapul caoh mbanh FC Bình Mỹ, dak harei dak pataom hu rilo urang caoh mbanh ginup umo thun, meng sit tal praong.

 Sa-ai Văn Minh Huấn, akaok kapul caoh mbanh FC Bình Mỹ brei thau, tuk camereip tok hu kapul 7 urang tame pakacah 1 adit sa mbang, min tal urak ini kapul hu labaih 15 urang bhian tabiak mblang, yaok adit 2 mbang, lavik lavik harei jeng hu kapul karei da-a caoh giao lưu.

 Palei Bình Mỹ di adei urak ini hu sa kapul caoh mbanh…... 

Piah pabak bruk pasram pahat saong jhul patagok bruk TDTT dalam bhap bini, huyện Bắc Bình hu buh jien tabiak, ramik ngak pasiam, blei pandap pasram pahat caik di dom labik hu rilo menuac.  Huyện bhian peih dom giải pakacah TDTT, harei pataom ilamu thể thao bhum urang bangsa takik, dui pachreih hu rilo vận động viên hu mbaok tame. Taphia nan, huyện jeng brei jhul khang bruk xã hội hóa, ieu dom kapul nyaom, menuac urang, dom doanh nghiệp buh jien tame padang labik me-in TDTT yau ye: mblang dit blong, hồ bơi… Urak ini, dom rahra dalam huyện me-in pasram TDTT gam gam hu labaih 40%.

Sa-ai Huỳnh Văn Vinh, Yam ndok Pasak Ilamu, Thông tin saong Thể thao huyện Bắc Bình, tỉnh Bình Thuận brei thau: “Tukvak jaik di ini, bruk TDTT di bhap bini dalam huyện hu biak rilo janih brei ka yaok umo thun karei di gauk, yau ye: nao takai, dưỡng sinh, caoh mbanh, dit blong, taong valei, thể dục thẩm mỹ… Bruk TDTT dalam huyện daok pambak tabiak praong dalam, meng dom jabat, labik ngak bruk, sang bac tal dom labik daok, dom palei Cam”.

Dom  xã hu rilo urang Cam ye bruk TDTT nyu hu prein khang yau ye caoh mbanh, dit blong. Dom harei rija, roya yau Ramưwan, Katê ye dom xã eng drei peih ngak dom bruk ilamu, thể thao biak chreih chrai, abih di nyu lac dom xã yau Phan Thanh, Phan Hoà, Phan Hiệp hu peih ngak gam gam saong hu bruk meng puk palei.

Tui Sở Ilamu, Thể thao saong Du lịch tỉnh Bình Thuận, dalam tỉnh urak ini hu 28 sang pasram pahat, pakacah thể thao đa năng, 131 danao caluai ia (praong 50m, 25m saong dom janih danao cuai ia karei karei), 12 sân vận động hu khán đài, 13 sân vận động oh hu khán đài, 230 mblang caoh mbanh mini, 250 mblang taong valei, 13 mblang me-in bóng rổ, 230 mblang me-in cầu lông, 35 sân quần vợt haong 245 kalup kapul thể dục, thể thao…

Piah ka bruk TDTT pambak tabiak khang kadang dalam bol bhap rahra, di dom xã hu rilo bhap bini Cam, thau pablak dom bruk TDTT tame dom bruk jak ba “Abih bhap bini jum pataom dak padang raidiuk ilamu di labik daok”, “Abih bhap bini pasram pahat rup pabhap tui jalan di Wa Hồ praong uranam”. Yaok thun, rilo giải thể thao phong trào hu dom pakat, dom gah peih tabiak, dui pachreih hu rilo menuac tame saong jeng harei pataom thể thao di bhap bini. Meng nan, menuac tame pasram pahat TDTT gam gam hu patagok tapa dom thun.

Meng cakrok khang kadang di bruk pasram pahat TDTT bhap bini dalam urang bangsa Cam, meda rik daong paglaong prein yava bhap bini, dak padang jalan diukrai khang kadang dalam rahra, abih di nyu lac dam dara urang ranaih umo bangsa Cam./.

Urang lang: Mousaphuong- 27/3