Mai tal Tam Giang Tây dom harei ini, angaok dom jalan mbuan gaok dom urang menuac daok cakak dhan phun dom caga meng phun hijao anak sang; kapul lin pacang khik, dam dara doan vien nao bah ramik hareik harom di dom tapen jalan. Kayua anak tal xa Tam Giang Tây hu tok mek angan palei pala bahrau.

Ong Nguyễn Trường Giang daok di palei Dinh Củ, xa Tam Giang Tây lac sa dalam dom baoh sang nao dahlau dalam bruk raong hadang 2 tukvak di puk palei. Labaih 5 thun dahlau, nao tal bruk patagok jien mek tame ka rahra, jabat chuc nang puk palei peik tabiak bruk raong hadang quảng canh salih bahrau 2 tukvak.  Ong Giang lac sa urang dalam baoh sang pandar dahlau. Meng dom ky thuat salih bahrau, raong hadang hu ilamo jang, abih di nyu nan lac bruk vèo hadang pajaih 2 – 3 tukvak bo bruk raong hadang mala glai di baoh sang ong brei jien mek tame glaong, jaik 200 trieu dong sa thun. Ong Giang ndom:

“Bruk raong hadang 2 tukvak daong ka sang ong ngak mbang siam lagaih. Rahra daok taphia nan jeng mai tangi bruk ngak, dalam palei hulin dahlak ngak tui bruk raong salih bahrau 2 tukvak. Raong hu siam lagaih bo anek pajaih gilac palao takik nan takik kurang jien dut saong dom thun dahlau.”.

Tuk bruk ngak mbang di rahra hu patagok, dom sang daneing haluk, sang pakat 4 hu salih ka dom baoh sang hala, sang gak sang ton payua. Meng nan, mbaok meta palei pala jeng hu salih yaok harei. Abih di nyu nan lac, tukvak tapa, Mban Pato tacei Padang Palei pala bahrau huyen Ngọc Hển jak ba dom gah daong jien, ngak pahla ba gauk daong padang labaih 300 baoh sang ka sang kathaot, kan kandah di xa Tam Giang Tây. Urak ini di puk palei tok daok 75/2.453 baoh sang jaik kathaot, hu tok 3%. Amuk Trương Thanh Hằng daok di palei Đường Kéo, xa Tam Giang Tây biak hadah mbaok ka bruk salih bahrau di palei drei:

“Meng dahlau, tuk oh ka padang Palei pala bahrau ye sang danaok di amuk oh hu praong gheih yau urak ini. Urak ini, bruk padang Palei pala bahrau mboh hu rilo salih bahrau, sang danaok mikva praong gheih jang rilo, raidiuk tani tanat jang.”.

Haong angan karja haong rahra ba gauk ngak yau nan, rilo jalan, tatua di palei dalam xa Tam Giang Tây hu ngak jeng. Tapa nan, daong tame bruk mek hu asal kadha jalan mbak, haong jalan pambuak xa hu ngak meng menyek khik kajap bruk ô tô nduac nao mai lac 14km, jalan pambuak palei salah blaoh 19km saong 84km jalan dalam palei hacih sa-at, gheih ghang.

Tam Giang Tây lac xa meng akaok meti daok kan kandah, tuk ba tangin tame padang palei pala bahrau ye jien mek tame di rahra daok biar, baoh sang kathaot glaong, co so ha tang oh samu gauk, rahra rilo meng lac nao mai meng angaok ia. Tal ini, xa mek hu ginup 19/19 asal kadha, bruk jak jeng nan mai meng bruk ngak catang di dom luc luong chuc nang hu pambuak tal. Ong Trần Hoàng Lạc, Akaok UBND huyen Ngọc Hiển hu ndom cambaih laih:

“Meng akaok tukvak kol dahlak hu brei mboh bruk ngak pasak piah padang palei pala bahrau dom xa, dalam nan, hu xa Tâm Giang Tây. Meng di bruk nan, kol dahlak thau ka yaok asal kadha brei mek hu di dom thun halei, tanut yau habar. Di bruk njauk gauk di huyen hu jalan pato tacei ka dom xa, dalam nan hu Tan Giang Tây jeng ngak. Jalan ngak hu padang biak cambaih laih ka asal kadha, neh rabha cambaih laih ka yaok kapul, urang menuac ngak bruk nan. Meng nan, hu sơ kết, tổng kết, taong yaom cambaih laih.”.

Haong bruk Tam Giang Tây mek hu angan palei pala bahrau, huyen puac abih di Taneh ia – Ngọc Hiển hu 2/5 xa mek hu angan palei pala bahrau. Dalam thun ini, huyen kham merat hu xa Viên An Đông mek hu angan. Urak ini số asal kadha kuhria rah tapadi 5 xa angaok labik hu 15,8 asal kadha. Dom asal kadha lamar rilo meng lac hu salah blaoh, kan kandah lac daok veik dom asal kadha khang, brei hu daong phun jien buh tame ka meng meda salah blaoh./.