Meng bilan 7 tal ini, tuk melam mai jeng lac tuk Sang ilamo palei 6 hadah gom gam haong dom sap tapoh akhar yava tagok meng tal bac palahik bruk oh thau akhar haroh. Tal bac hu peih tabiak meng mon 7 tal mon 9 melam di dom melam som, but, suk yaok adit.

Ong Điểu Huân thun ini yam tapa umo 51 thun min jeng daok nao bac hadei di tuk ngak salah bruk sang danaok. Ong Huân khan lac: “Dahlau diah, sang daok rilo kan kandah nan ye oh hu bac akhar huroh. Urak ini hu karja palei jak ba nao bac piah palahik bruk oh thau akhar huroh, dahlak mboh tut angan chip. Hu tame bac, dahlak jeng yau mikva pak ini mboh biak bui sambai”.

Adei Điểu Vũ (umo 10 thun), kayua sang kan kathaot nan ye jeng oh ka hu nao bac. Meng tuk tui bac tal palahik bruk oh thau akhar huroh ini, Điểu Vũ puac hu, vak hu saong ngak toán jeng hu.

Ndom tal jak jeng siam mekre di tal bac ini, njauk ndom tal dom gru pato tuk halei jeng khik “dalah apui bruk ngak di drei” payua hatai jia ka mikva tapa yaok baoh akhar huroh.

Meng Sang bac Tiểu học Lê Hoàn, xã Long Tân, anai gru Đào Thị Yên mai pato tal bac palahik bruk oh thau akhar huroh di palei 6. Anai gru brei thau, bruk biak karei di tal bac ini nan lac oh parabha umo thun, taha ranaih, kayua yau nan ye bruk tacei pato brei karei di gauk. Anai Đào Thị Yên khan lac: “Tal bac palahik bruk oh thau akhar huroh hu umo meng 12 tal labaih 60 thun. Dahlak saong dom anai gru karei dang pato pak ini biak drut droi tuk mikva thei jeng abih hatai mai haong tal bac yaom lac melam sup. Khaol dahlak tuk halei jeng ngak ka tal bac nyu bui sambai piah ka mikva chreih takre, bui hatai dalam tuk bac. Dom urang mai ini thei jeng bui sambai saong thei jeng caong khin thau hu akhar huroh piah pandar tame dalam rai diuk ka nyu siam jang”.

Anai gru Đào Thị Yên  haong dom ayut sahabat hu ba tabiak jalan pato bac njauk haong danak dak di Sở Pato megru tỉnh. Tal urak ini, mikva bac hu biak siam dom hagait bo gru hu pato tacei.  

Tui ong Vương Ngọc Bửu Sơn, Akaok Ban công tác Mặt trận palei 6, labik ini hu rilo bhap bani bangsa takik. Tukvak tapa, dom baoh sang oh ka biak biai sangka tal bruk bac daa di anek bik. Kayua yau nan ye, yaom lac dalam umo thun nao bac, rilo adei jeng oh ka thau puac, thau vak. Nan ye urang jakar palei hu nao tal yaok baoh sang piah jak ba dom urang oh ka thau akhar huroh ye hu mbaok tame tal bac.

Tui yaok pataom di palei 6, manuac urang oh thau akhar huroh jaik 103 urang. Phaok akaok Uy ban bhap bani xã Long Tân, ong Đỗ Nhật Quang brei thau: "Ini lac tal bac daok dalam Danak dak pakat negar ka palahik bruk oh thau akhar huroh. Xã Long Tân hu peih saong khik tani tanat tal bac meng bilan 7  tal ini. Tuk akaok mereip hu 34 urang tut angan tame bac, min tal tukvak ini hu tagok jeng 42 urang daok tui bac. Meng bruk daong di danak dak pakat negar saong bruk jak ba di Đảng, karja, Mặt trận, kapul nyaom meng xã tal palei, bruk ngak di tal bac hu rah tabiak dalam siam laghaih".

Urak ini, langiu di xã Long Tân, huyện Phú Riêng daok hu xã Long Hà daok peih 2 tal phổ cập tal 8 saong tal 9 dalam dom melam saong hu labaih 100 urang hu mbaok tui bac. Bruk peih tal bac palahik bruk oh thau akhar huroh oh lac peih tabiak jalan ka urang hu bac ta-a, pathram dom ilamu gah puac, vak sap Yuan, bo daok pabak brei dom ilamu dalam raidiuk. Tal bac daok hu daong ka dom urang bac jia tame rup drei, pandar siam dom ilamu bac hu meng tal bac, gam haong nan, daong paglaong rai diuk, ilamo, cak rok patagok kinh tế - xã hội di puk palei./.