Meng lavik mai daok dalam baoh sang taik tahak, pacang gah ini ye hajan tanjaoh, hangin yuk, pandiak tame gah hadeih, nan ye, amuk Lê Thị A daok di ban sit Ngã Sáu, huyện Châu Thành, tỉnh Hậu Giang oh pacang hu ia mata sraiy uan tabuan tuk thun bahrau mai, hu taduan baoh sang Jumpataom praong siam hu karja palei alin brei.

 “Thau dhar phol biak rilo. Meng lavik mai, dahlak plaih hajan, pacang pandiak piah ka amuk taco dahlak daok, piah raong nyu nao mbang bac. Urak ini, hu kanja palei pak ini daong brei, dom adei saai daong dahlak ye dahlak thau dhar phol biak rilo.”

Tukvak tapa, yaom lac bruk sangka iek glang urang kan kathaot hu peih ngak siam, min Hậu Giang jeng daok 9.736 sang kathaot, 7.426 sang jaik kathaot, dalam nan daok hu rilo sang sarak, sang kathoat, sang jaik si kathaot gaok kan kandah, kan kandah ka sang daok.

Pachreih tui danak dak pakacah gauk “Abih labik dalam taneh ia ba tangin tame daong ka urang kan kathaot – oh caik thei daok veik gah likuk” Ban Thường vụ Tỉnh ủy Hậu Giang ba tabiak bruk kham marat jak ba pasiam sang taik tahak ka sang sarak, sang kan kathaot gaok kan kandah ka sang daok. Tapa pasang iek, mboh dalam tỉnh daok labaih 1.400 sang gaok kan kandah ka sang daok.

Di kreih bilan 9/2023, tỉnh Hậu Giang hu ba tabiak bruk padang ngak 1.400 baoh sang “Jumpataom”. Hadei di labaih 3 bilan peih tabiak, Hậu Giang hu ngak salah bruk padang ngak saong peih pakah jao 1.400 baoh sang jumpataom, yaom labaih 70 tỷ đồng brei ka dom sang sarak, sang kathaot, sang jaik si kathaot gaok kan kandah ka sang daok. Drut drui, chreih chrai di abih jeng lac dom urang kan kathaot tuk hu mbang tet dalam dom baoh sang praong, siam, ndung bak hatai anit ranam gauk. Kamuan Đinh Bảo Yến daok di Phường IV, ban Vị Thanh, tỉnh Hậu Giang khan lac:

"Đinh Bảo Yến “Sang klak di kamuan tabung haluh hajan tame, amuk saong kamuan oh ndih hu. Urak ini hu sang bahrau, kamuan uan tabuan biak rilo”.

Dalam dom harei camereip di di thun bahrau 2024, tuk mai hu mbaok pahadar 20 thun  padang tỉnh Hậu Giang, Akaok negar Võ Văn Thưởng haong Kapul ngak bruk di Trung ương mai hu mbaok peih pakah, jao 1.400 baoh sang jumpataom ka sang kan kathaot di tỉnh. Brei panuac di tuk nan, akaok negar Võ Văn Thưởng uan tabuan anak dom jak jeng di tỉnh Hậu Giang mek hu hadei di 20 thun padang tagok meng thun 2004 tal ini. Tal urak ini, dalam tinh hu jak ba padang ngak hu labaih 11.000 baoh sang Jumpataom. Taeng dalam 3 bilan puac thun 2023, tỉnh hu padang ngak, daong 1.400 baoh sang Jumpataom ka sang kan kathaot, sang kan kandah ka sang daok.

 “Tui jalan ba gauk tame daong ngak oh caik thei daok veik gah likuk, kol drei ngak hu salah sa bruk biak siam makre. Dahlak pok meyaom dom jak jeng bo tinh ngak hu dalam bruk padang ngak Sang jumpataom ka rahra. Tadhau ayuh dom anai, dom cei, dom adei saai hu jao Sang Jumpataom yau sa pandap alin ndung bak hatai di Ndang, hatai anit ranam di rahra piah ka kol drei uan raok thun bahrau dalam bui sambai, chraih chrai, haong hatai caong ka sa raidiuk bahrau siam makre jang dalam harei hadei.”

Dom harei ini, dalam dom baoh sang Jumpataom bahrau hu jao alin, rahra Hậu Giang daok ramik ngak pasiam sang danaok piah bui sambai raok tet, uan thun bahrau, angaok mbaok urang halei jeng hadah tagok bruk bui sambai kayua meng ini, dom baoh sang kathaot, sang jaik kathaot ini hu jalan piah tani tanat labik daok, tani tanat bruk ngak mbang./.