Di thun 2008, sang saai Nguyễn Thị Đượm (daok di puk 1, xã Trần Hợi, huyện Trần Văn Thời, Cà Mau) hu taduan ameh meng kapul rik phun jien meng ameh. Meng ameh labaih 3 mbaik (lượng), gam haong jien patak pataom hu daong ka sang saai padang ngak hu baoh sang bo diuk pasang saai caong khin meng lavik mai. Baoh sang gheih mekre, praong 120m2, sang saai daok tal urak ini. Bahrau ini, tal tuk sang saai taduan hu phun jien meng ameh, mbang ini saai Nguyễn Thị Đượm pandar piah blei taneh:“ Ini lac harei rik pataom ameh, dahlak taduan hu 1,6 mbaik ameh. Dahlak pandar dom ameh ini piah blei taneh ka anek, gam haong jien dalam sang patak pataom hu. Sang dahlak hu mbaok tame bruk rik phun jien meng ameh ini lavik paje. Mbang nan, dahlak pandar piah padang ngak sang praong 120 m²".

Di xã Trần Hợi urak ini hu 23 kapul rik phun jien meng ameh, yaok kapul hu labaih 15 urang. Dom urang dalam kapul eng drei sanya dom ameh rik tame, min bhian meng 1 – 2 chỉ ka yaok mbang rik tame; yaok thun jeng meda rik tame meng 1 tal 2 mbang, bhian hadei di tuk yuak padai blaoh.

Di palei ngak padai yau xã Trần Hợi, rahra kan ieu pataom hu paok jien praong piah cak rok patagok bruk ngak mbang. Bruk rik jien meng ameh hu daong ka rahra langyah hu rilo cuang kandah dalam raidiuk. Yaok mbang rik tame, sang adei saai kumei taduan hu meng 1 mbaik meteh tal labaih 3 mbaik ameh nan ye meda ngak hu dom bruk praong. Hu biak rilo sang padang ngak sang, blei hu taneh, peih praong bruk pablei salih atau raong anek nao bac jeng manuac jeng urang. Saai Lê Thị Gấm, daok di puk 1, xã Trần Hợi khan lac: “Labik dahlak hu 15 adei saai kumei tut angan rik ameh jeng 1 kapul, yaok urang rik tame 2 chi ameh.  Hadei di tuk rik tame, drei hu 3 mbaik ameh. Meng jien mek tame meng bruk ngak padai yaok thun, yaok vu, patak pataom hu hasit ye drei khik piah tal mbang drei rik tame, tui tukvak lac rik dua mbang sa thun, daong cak rok patagok bruk mbang ngui ka adei saai kumei”

Dom bruk rik phun jien meng ameh hu tamuh tabiak di xã Trần Hợi, huyện Trần Văn Thời meng thun 2008. Bruk ngak hu kein lagaih biak glaong nan ye dak harei dak hu peih praong. Saai Trần Kim Đào, Akaok Kapul urang kumei xã Trần Hợi brei thau, kapul rik phun jien meng ameh karei jang haong bruk ma-in hụi. Bruk ini oh hu urang ngak po, dang tabiak pataom mek blaoh mbang jien meng urang kuac hụi. Adei saai dalam kapul rik phun jien tame gam padang ngak dom adat, yaok urang rik phun jien meng ameh deih yau gauk, tal mbang rik thei ka oh caong hu ye meda oh hu mbaok tame bốc thăm, dom urang caong hu meda hu mbaok tame bốc thăm piah duah tabiak urang taduan hu paok ameh rik tame. Saai Trần Kim Đào khan lac: “Jalan ngak di yaok kapul rik phun jien lac pathau khan mai ka xa pasang iek mboh lagaih halei oh meng brei peih bruk rik tame phun jien. Adat ngak lac adei saai caong tame kapul rik phun jien meng ameh ye njauk hu sang daok tani tanat di pak ini, hu taneh pala drak. Ameh rik tame hu brei adat di sa 1 tiệm dalam xã. Hu taduan phun jien ye njauk hu pasang nao gam saong dua diuk pasang njauk ngak sanya hu taduan ameh di kapul urang kumei, ameh hu hadom saong dua diuk pasang mbaoh tangin tame meng taduan mek hu”.

Bruk rik phun jien meng ameh hu pambak tabiak dom puk palei karei  dalam huyện Trần Văn Thời. Dalam huyen urak ini hu 67 kapul rik phun jien meng ameh, ngan haong 570 urang. Langiu di nan, huyện Trần Văn Thời daok cak rok patagok labaih 700 kapul rik phun jien patak pataom ngan haong paok jien pavil payeng labaih 2 tỉ đồng piah daong ka dom adei saai kumei cak rok patagok bruk ngak mbang./.