Hu rilo urang main hụi bloh brei po nyim jien veik hu vak harak meng tangin 

Thun 2018, sang ong Châu Quốc Khanh ndih tapui thun 1972 (daok di xã Lâm Hải, huyện Năm Căn, tỉnh Cà Mau) hu panuac brei thau lac mbaih-pacah hụi. Dahlau di nan, sang ong Khanh hu mbaok tame ma-in rilo akaok hụi di palei. Dalam tuk ngak mbang, sang ong kuac hụi piah cai pandar min hadei di nan oh hu jien piah buh bayar. Ta-eng jien hụi, sang ong  Khanh tavak sre tal yaok rituh triệu đồng. Bruk nan hadei di nan hu ba tabiak tòa. Dom bản án saong quyết định di toà mek pacap ong  Khanh njauk pablei taneh riya di drei labaih 4ha piah ba-yar sre min jeng oh ginup. Bruk njauk biai nan lac, dalam langyah bruk ini, Toà án bhap bani huyện Năm Căn tacei brei bayar sre dahlau ka sa urang ba tal bruk oh njauk hatai di rilo po hụi karei saong bruk ini dui atah tal harei ini jeng oh ka langyah blaoh. Amuk Nguyễn Thị Hằng Ny, sa dalam dom po hụi njauk khat lahik, brei thau:

Toà án tacei brei bayar dahlau ka sa urang mek ginup abih blaoh daok dom urang khat lahik daok veik mek hu hagait halei. Dalam tuk nan, jeng lac thẩm phán nan tabiak quyết định saong urang thẩm phán ini hu thau cambaih laih asal kadha oh njauk lac urang halei karei. Quyết định di adei hu dahlau min tuk tabiak bản án hadei jeng brei bayar dahlau ka urang karei. Taong abih jeng lac menuac urang njauk khat lahik oh njauk lac gilang pariak karja halei bo hu brei bayar dahlau?

Dalam bruk ma-in hụi, dom urang me-in oh hu jien buh bayar meda ngak khat lahik ka po hụi. Yau nan min, jeng hu mboh biak rilo bruk dom po hụi pataom mek jien di urang me-in hụi  min pandar tame bruk ngak karei blaoh oh daok jien piah buh tame, ba tal mbaih pacah hụi. Po hụi mbaih pacah hụi meda ngak khat lahik prong jang biak rilo. Jeng di xã Lâm Hải, di kreh thun 2020, baoh sang ong Nguyễn Hoàng Minh (daok iew lac Chín Quang) brei thau lac mbaih pacah hụi. Ong Chín Quang lac po di rilo talei hụi saong yaom jien dom urang me-in hụi njauk khat lahik tagok tal labaih 3,4 tỷ đồng. Ong Chính Quang sanya pablei taneh riya piah mek jien bayar veik ka dom urang me-in hụi, yau nan min, tal harei ini jeng oh ka bayar hu abih. Bruk ini hu rilo urang ba tabiak Toà án langyah min tal harei ini jeng oh ka hu langyah blaoh. Sa-ai Nguyễn Thị Hoa – urang me-in talei hụi nan brei thau cambaih:

-Băng 2 ( 20 giây): Urak ini khaol dahlak caong khin langyah yau habar ka nyu njauk ka dom adei sa-ai. Njuak ba-yar veik jien phun khaol dahlak oh caong khin jien jhung. Dahlau di tuk mbaih hụi ong Chính Quang hu mai tal sang dahlak piah likau juai ba tabiak jabat karja piah ka ong meda rami ramik ba-yar jien veik ka mikva.

Bruk ma-in hụi hu bhap bani Cà Mau peih ngak meng lavik mai. Urak ini dom talei hụi bhian hu rik tui bilan saong hu yaom meng 1, atau 2, atau 3 triệu đồng. Dom menuac tame ma-in meng 20 – 40 urang. Yaok bilan dom urang me-in hụi ba tabiak 1 harei piah ieu hụi, thei buh glaong ye urang nan kuac. Min bruk dom urang me-in kuac blaoh min oh buh jien bayar veik atau po hụi pataom mek jien min oh pabak brei tui njauk panuac sanya blaoh ba tal khat lahik ka urang ma-in. Ong Nguyễn Việt Khánh, Phaok akaok UBND xã Lâm Hải, huyện Lâm Căn kakei lac, mikva ma-in hụi njauk caik hatai sangka saong njauk ngak tui adat hukum daok pandar urak ini:

Tapa ini, jeng kakei mikva dalam tukvak ma-in hụi ye njauk palih ruah dom po hụi hu angan je dalam bhap bani, hu rilo jien padai. Abih di nyu lac njauk ngak tui Nghị định 19 di Raja-ei thun 2019, dalam tukvak ma-in hụi ka nyu njauk haong adat hukum.

Taphia di bruk daong ka dom baoh sang patak pataom hu jien, ma-in hụi daok hu daong ka dom urang caong khin hu phun jien piah ngak mbang, cai pandar. Yau nan min, jaik di ini tuk dom talei hụi hu yaom jien prong hu biak rilo mbang mbaih pacah hụi saong ba tal rilo srau kadau, pandik harao, abih di nyu lac di bhum palei pala. Dom thun tapa, dom bruk mbaih- pacah hụi jien tỷ gam gam rah tabiak di Cà Mau, Công an tỉnh ini hu tabiak bruk khởi tố rilo urang ka duas “pachot piah meblah mek drap ar” pambuak tal ma-in hụi piah ngak ka urang mboh huac./.

Urang lang: Jasi -2/4