U Minh ieu lac sa labik di dalam dom huyen hu rilo sang taik tahak njauk brei salih di tinh Ca Mau, hu 1.019 baoh sang. Huyen hu peih ngak 315 baoh sang saong daok pataom tame peih ngak labaih 700 baoh sang karei. Dom pakat uy, karja palei huyen U Minh daok ngak Danak dak ndung bak siam mekre ini, tapa di nan, ba mai hatai bui sambai ka dom urang mbang tui.

Amuk Võ Thị Sánh, thun ini hu umo 70 thun, daok di xa Nguyễn Phích, huyen U Minh, tinh Ca Mau – urang kamei daok sa drei bahrau ramik tame sang bahrau piah daok, khan brei thau lac:

 “Dahlau daih sang dahlak hulin ngak meng kayau, meng hala. Urang brei kayau, blaoh padang tagok ka dahlak hulin tame daok. Po ley, hajan nyu tanjaoh ia trun, thac tame ngak ndih daok oh hu. Biak thau dhar phol dom pakat hu daong ka dahlak hulin hu sa baoh sang piah daok. Dahlak hulin taha, praong thun paje bo daok hu baoh sang khang kajap piah daok ye biak bui sambai lo.”

Ong Nguyễn Văn Mãi, daok di puk 10, xa Khánh An, huyen U Minh, tinh Ca Mau brei thau:

“Sang drei urak ini hu daong bahrau padang blaoh. Hu yau nan ye tuk nao ngak drei jeng sahnang hatai. Dahlak hulin nao ngak pah duah jien, dahlau diah tuk nao ngak blaoh langik hajan ye brei taong phone nao sang pandar diuk anek tapa sang mikva but pajaih pandaok, huac kanda nyu jaleih. Urak ini hu sang bahrau ye mboh biak sahnang hatai paje.”

Daok di huyen Thới Bình, tal ini hu ngak salah blaoh 168 baoh sang di taong abih 725 baoh sang dalam Danak dak brei paabih oh daok baoh sang taik tahak. Dalam mbang nao pasang iek piah ngak danak dak brei oh daok baoh sang taik tahak bahrau ini, ong Nguyễn Minh Luân, Phaok Akaok UB Bhap bini tinh Ca Mau hu pandar UB Bhap bini huyen Thới Bình patui bruk jhul samar bruk ngak. Brei jak ba abih gah rik jien piah paglaong siam ka baoh sang, padang sang pahacih saong daong ka dom bruk tamuh tabiak langiu di bruk kuhria dahlau. Piah jhul samar bruk ngak, brei jak ba bruk hu mbaok tame di sa majam he thong chinh tri, paglaong bruk di dom urang jakar, urang ndang, rilo meng ieu lac kapul urang ndoan, dam dara dalam bruk daong rahra padang, pasiam sang danaok.

Ong Nguyễn Minh Luân, Phaok Akaok UB Bhap bini tinh Ca Mau jeng pandar dom so karja, dom gah di tinh bhian caik hatai pasang iek, pajrak, samu tacei ba huyen Thới Bình talaih leih kan kandah piah jhul samar bruk ngak, khik kajap salah blaoh danak dak dalam huyen dahlau harei 30/6 meng anak.

UB Bhap bini Ca Mau bhian pajrak dom bhum palei jhul samar bruk brei paabih baoh sang taik tahak, min jeng caik hatai brei khik kajap bruk praong siam danak dak padang. Ndom ka asal kadha ini, ong Nguyễn Hoàng Lượng, Akaok Uy mban MT Negar huyen Thới Bình, brei thau:

“Gah jak ba, pasang iek Kadung jien daong ka urang kathaot hu taom mbaok, ndom meyai tapak haong baoh sang hu daong piah sa hatai ba gauk ngak bruk. Blaoh yaih khan, dang tabiak haong dom gah ngak mbang pablei salih ndap pabak piah peih bruk ngak. Brei mesraiy jien tui bruk ngak. Pakat mat tran palei pambuak haong urang jakar xa daong bruk ini saong gam haong urang dalam sang pasang iek jalan padang sang. Tapa di nan, hu dom panuac ndom ba tabiak jeng yau duah mboh samu dom bruk ngak oh ka siam piah pasiam, khik kajap baoh sang hu asal yaom siam glaong.”

Tinh Ca Mau hu taong abih 4.400 baoh sang daok dalam sarak ngak danak dak brei paabih baoh sang taik tahak. Dalam nan, padang bahrau 3.463 saong pasiam 937 baoh sang. Yaok baoh sang bahrau hu daong 60 trieu dong; pasiam ye hu daong 30 trieu dong. Tal ini, tinh hu peih ngak 1.888 baoh sang; salah blaoh 1.339 baoh sang. Ca Mau daok dalam kapul 10 tinh ban hu bruk ngak samar drah abih di dalam taneh ia. “Bhum taneh daok iku gah Meraong taneh ia nagar” ba tabiak bruk kuhria ngak salah blaoh Danak dak dalam bilan 8/2025./.