Dah mesup harei 13/5, di palei Kinh Tắc, xã Hàm Rồng (huyện Năm Căn, tinh Cà Mau) hu bruk glut jaleih jalan palei di labik taneh raong ikan di sang ong Võ Văn Lào. Labik glut jaleih nan atah 25met, praong 5met, dalam jaik 2mét meteh, khut lahik jaik 100 triệu đồng. Bruk glut jaleih jeng ngak klaoh jalan saong ngak pacah danao raong hadang di rahra. Ong Võ Văn Lào khan lac:

“Mesup jaleih jalan gah langiu, tal melam jalan glut trun. Thun halei jeng jaleih meng gah langiu tame, sang dahlak hu ngak ar pacang, bahrau ini jeng ngak abih dom pluh triệu min nyu daok glut. Sang hu taneh min sit, danao raong ikan oh hu nan ye nao ngak mbang pah, glut jaleih yau ini kan kandah lo”.

Labik glut jaleih ini bhian mboh di canah klau kraong, kayua ia nduac khang nan ye daok mbuan glut jaleih veik. Urak ini mboh hu rilo labik ra-ai angaok mbaok jalan nan ye rahra pak ini daok duh hatai lo. Anak bruk nan, karja palei daok brei ramik ngak ka nyu khang veik, piah patrun patakik bruk glut jaleih. Ong Nguyễn Tài Nguyên, Chủ tịch UBND xã Hàm Rồng brei thau:

 “Tuk mikva khan lac glut jaleih, UBND xã brei dân quân hu mbaok haong bhap bini ramik jalan nao mai, hadei di nan, brei radaih nao ngak pasiam labik glut jaleih ini, patrun patakik bruk glut jaleih veik”.

Yaom lac bilan hajan bahrau tal, di huyện Năm Căn bahrau hu dom mbang hajan min dalam huyện hu 6 labik glut jaleih taneh tapen kraong. Ong Lê Văn Sin, akaok jabat ngak nong saong patagok palei pala huyện Năm Căn brei thau, tapa pasang iek dalam huyen daok hu 61 labik takai kraong, ribaong mbuan glut jaleih, atah abih tih 100km, ngak kan kandah tal 1.800 sang. Bhap bini njauk paglaong hatai pacang caga piah patrun patakik khat lahik. Ong Lê Văn Sin ndom lac:

 “Kakei bhap bini caik hatai tal bruk glut jaleih, abih di nyu lac urang taha, uranaih saong urang kumei tuk ndih malam di labik mbuan glut jaleih. Jeng brei caik hatai sangka ba drap ar tabiak, oh caik pandap trak di labik mbuan glut jaleih, piah tuk hu bruk glut jaleih oh khut lahik drap ar, plaih di metai lahik.”

Bilan thu bahrau tapa, bhum ia taba tỉnh Cà Mau hu labaih 700 labik glut jaleih taneh, atah abih tih jaik 19km; ngak khut labaih 14 km jalan, khat lahik labaih 28 tỷ đồng. Urak ini dom labik glut jaleih jeng oh ka hu ngak siam veik abih.

Tal bilan hajan ini, tỉnh Cà Mau bahrau hu dom mbang hajan min bruk glut jaleih takai kraong di bhum ia mbak daok mboh hu rilo. Yaok thun, tuk tal bilan hajan, di dom huyện Năm Căn, Đầm Dơi, Phú Tân saong Cái Nước jeng hu glut jaleih khang. Tui kuhria mboh dahlau, bruk glut jaleih daok mbuan hu di bilan hajan ini, pak di dom labik glut jaleih blaoh dalam bhum ia taba di bilan thu di huyện Trần Văn Thời jeng daok mbuan glut jaleih veik dalam bilan hajan./.