Đầm Dơi lac huyen tapen tasik, hu labaih 8.000 urang lac bangsa takik diukrai, ralo abih lac bangsa Khmer. Bruk ngak mbang kinh tế di mikva daok rilo kan kandah, sang kan kathaot daok rilo, jalan mbak daok kurang. Tuk ba tangin tame padang ngak palei pala birau huyen tok hu 5/19 tanut, nan ye biak kan kandah. Piah peih ngak hu siam, dahlau di abih huyen brei pataom tame pasang iek saong brei ngak dahlau dom tanut daok biar atau oh ka ngak hu, padang ngak tui jalan ba tabiak, pataom jien padai prein yava tame ngak piah ka dom xã bhap bini bangsa takik hu ngak salah.

Jeng lac huyen hu tanut biar, U Minh urak hu labaih 5,7% baoh sang bhap bini bangsa takik, dalam nan baoh sang kathaot hu rilo. Tuk tame padang ngak palei pala birau, U Minh palih ruah xã danak dak 135  Khánh Hoà ba tame ngak, piah hu jien buh tame ngak, daong tame patagok ka xã 135 ngak salah dom tieu chí padang ngak palei pala birau. Meng jalan ngak ini, gam saong bruk pachreih tui di mikva, Khánh Hòa mek hu tanut chuan meng thun 2015.

Dalam tuk padang ngak palei pala birau, Cà Mau thau lac brei ngak njauk, oh nduac tui bruk piah mek angan saong oh pagam pambak tame, njauk mek bruk njauk hatai di bhap bini piah taong yaom bruk ngak hu. Gam haong nan, biak caik hatai tal dom tanut paglong raidiuk, jien mek tame di bhap bini, padang bruk cak rok patagok kinh tế. Yau ye xã Thanh Tùng, huyện Đầm Dơi, hu rilo palei biak kan kandah, meng phun jien daong cak rok patagok bruk pala drak, raong glang, karja palei hu jak ba mikva pataom tame dom bruk ngak kinh te lagaih saong ilamu, prein ngak mbang yau: raong pabui, raong sò huyết, raong aring vèo…palei jeng brei patagok bruk pathau khan, pasram ilamu  ky thuat ka mikva…meng nan, rilo sang bhap bini hu raidiuk tani tanat,  yaom tagok ngak kaya meda. Baoh sang kathaot di xã meng 17,5% tal urak ini trun daok 5,4 % tui tanut chuẩn birau.

Sang muk Thiều Ngọc Mai (palei Phú Hiệp, xã Thanh Tùng) lac sa dalam dom sang patagok kinh tế meng bruk raong sò huyết hu jak jeng. Muk Mai khan lac, meng tuk hu daong pato pasram ilamu raong sò huyết pablak tame danao raong hadang, amuk khang hatai ngak iek. Dalam mbang raong camereip sang buh tame 30 trieu đồng jien blei sò pajaih, hadei di 7 bilan mek tame hu jaik 1 tấn sò, kaoh abih jien buh tame ngak, daok laba hu labaih 60 trieu dong. Meng nan, sang muk hu tabiak truh kan kathaot saong yam tagok ngak kaya meda.

Bhian lac sa xã kathaot di huyen U Minh, mbaoh meta xã Khánh Thuận urak ini hu salih birau mboh di anak meta meng bruk jao taneh khik iek glai. Tui ông Trần Công Mười, Akok UB bhap bini xã Khánh Thuận, meng hu bruk jao khik iek taneh glai, mboh hu rilo bruk ngak mbang kinh te kein lagaih ala phun glai; jalan mbak nao mai dalam aplei hu tuh menyek, ba mbuan lagaih pambuak bruk pablei salih saong jhul patagok kinh tế. Urak ini baoh sang kathaot, jaik kathaot di xã trun daok ala 5%.

Tui ong Nguyễn Minh Luân, Phaok akaok UBND tỉnh Cà Mau, tuk peih ngak hu siam Danak dak padang ngak palei pala birau, rilo tanut hu makna praong yau urang ngak duah hu bruk ngak, jien mek tame, pato pakai…mek hu jak jeng siam mekre. Bruk ngak kinh te di bhum palei pala hu siam jang, urang hu bruk ngak saong jien mek tame tani tanat, rik tame cak rok patagok kinh tế XH bhum palei uirang bangsa takik dak harei dak khang kajap. Nan ye, dalam tukvak anak tal, Cà Mau brei peih ngak sumu gauk, pablak tame dom bruk di Danak dak patagok kinh tế XH bhum urang bangsa takik saong bhum ceik piah hu jien buh tame ngak sumu gauk, siam lagaih jang, ngak habar piah ka yaok bhap bini hu mbang tui meng Danak dak di bhum palei./.

Urang lang: Ai Nghiem - 23/2/2022