Ini lac thun ka 3 ong Du Vĩnh Lộc (ấp Xóm Lung, xã Định Bình, ban Cà Mau) pala phun ra-bai (đậu rồng) vil taom dar sang saong angaok ar pacang danao raong hadang. Phun ra-bai hu sang ong Lộc maong lac janih phun patrun kathaot. Kayua sang ong takik raong hadang nan ye rilo thun gam kinh tế sang ong oh tagok, meng pala phun ra-bai angaok taneh praong 1.000 m2 bo yaok thun sang mek tame hu 45 triệu đồng. Ong Lộc brei thau, pala njam patam angaok taneh njaom mbak tuk camereip năng suất oh glaong min pala lavik harei nyu rao hu mbak, langiu di nan drei pala dom janih phun tamuh hu angaok taneh thu lagu yau phun ra-bai jeng hu năng suất siam:

 “Pala phun ra-bai oh cang hu taneh siam. Yaom pablei jeng hu tani tanat. Urak ini ba tabiak darak pablei yaom 50 rabau sa kg. Min drei pala rilo ye tok pablei hu yaom 30 rabau lac hu jien mek tame tani tanat paje. Danao raong hadang oh hu rilo, drei pala njam patam piah pasiam alam langik tasik, abih di nyu lac dom janih phun hu dhar praong, pacang halui ka danao raong hadang”.

Langiu di pala njam, sang ong Lộc daok pala bei “khoai từ” angaok taneh ar vil val danao raong hadang. Meng mbaok taneh praong labaih 1 công pala bei, yaok thun sang ong mek tame hu 70 triệu đồng. Meng nan bo sang ong dak harei dak ginup, meda.

Jeng dreih yau ong Lộc, Ong Phan Văn Lấn (daok di ấp Ba Dinh, xã Định Bình) jeng hu thau tal lac sang “ngak brei taneh mbak raak bingu”. Angaok mbaok taneh praong 1,6 ha taneh di sang, ong Lấn caik tabiak 1 ha piah raong hadang, binah taneh daok jaik ye pala njam patam. Phun pala rilo lac bei “khoai từ” dalam bein saong angaok ar taneh pacang danao raong hadang. Bei takik prein iek glang min suai hu baoh pableih. Piah hu jien tame gam gam, ong pala pablak “mướp Thái”, baoh paya dalam bein... Sang ong pala tui jalan hacih nan ye piah plaih hu halak, ong mek bọc ni lông pacang veik saong takik pandar jru khik caga phun pala.

Ong Phan Văn Lấn brei thau, dalam bilan hajan bruk pasiam taneh pala njam patam lac mbuan lagaih jang. Ini jeng lac tukvak mek jien tame di urang pala njam patam angaok bhum taneh njom likhun. Kayua daok di ban, menuac sia rilo, nan ye bruk pablei hu mbuan lagaih. Bruk pala njam patam, daong ka sang ong hu jien tame labaih 100 triệu đồng yaok thun:“Pak ini dahlak pala khoai từ, jeng hu rilo baoh. Thun ini hu rilo jang thun blaoh, labaih 2 tấn baoh. Dahlak mek taneh vil val sang pala njam patam, đậu bắp, đậu đũa,… Yaok janih hasit, pala yau nan yaok harei ba nao darak pablei jeng hu dom ratuh rabau đồng”.

Sang ong Lộc, ong Lấn saong rilo sang karei di xã Định Bình pala njam patam angaok taneh mbak oh lac cakrok kinh tế sang bo daok lac jalan ngak pasiam bein pala tui sarak di karja palei, piah tagok jien mek tame. Ong Nguyễn Thanh Tòng, akaok kapul urang ngak nong xã Định Bình brei thau: “ Đảng ủy xã tacei pato peih ngak sarak di ban ka pasiam bein piah pala njam patam, pambuak haong cakrok raong glang. Kapul urang ngak nong peih ngak tal dom dhar kapul. Jak ba bhap bini, plaih bruk klaak taneh saoh, oh hu jien mek tame bo maong iek jeng oh mekre mata. Meng nan, bruk pasiam taneh pala njam patam, phun mbang baoh hu cakrok patagok".

Bruk pala njam patam angaok taneh mbak di urang nong xã Định Bình hu ba mai siam mekre, kein laba. Bruk ngak oh lac ba jien tame ka mikva, bo daok daong peih ngak hu siam sa sarak kein laba./.