Sang bac THCS saong THPT Lý Văn Lâm (xã Lý Văn Lâm, ban Cà Mau) bahrau taduan mek tu tapuk meng Danak dak Tapuk saong bruk ngak di TP. Hồ Chí Minh alin brei. Hu mbaok tame klup kapul Tapuk saong bruk ngak, dom adei anek saih eng drei ramik ngak ka nyu mekre labik tapuk, patagok dom baoh tapuk saong eng drei peih ngak gilang tapuk di drei. Klup kapul pamaong tal pambak tabiak bruk bhian randap puac tapuk saong padang hatai saneng jalan ngak meng avan ka dom urang daok ranaih. Di tuk peih bruk alin brei, adei Đoàn Thu Thảo, anek saih tal 10A, Sang bac THCS và THPT Lý Văn Lâm, khan lac: “Adei puac tapuk piah ba tal bruk ngak. Jalan ngak di klup kapul tapuk nan lac puac tapuk piah ba tal bruk ngak, bruk ngak ba tal tapuk. Puac tapuk meda bac megru hu dom ilamu kiến thức, meng nan bac megru hu ilamu piah ngak bruk, peih ngak dom caong khin saong bruk caong ngak bo drei caong khin.”

Adei Thảo thau hu yaom glaong di bruk puac tapuk kayua lac adei hu mbaok tame Klup kapul Tapuk di sang bac dahlau di nan. Klup kapul Tapuk saong bruk ngak di Sang bac THCS saong THPT Lý Văn Lâm daok hu 50 anek saih hu mbaok tame, duk haong abih tih jaik 2.000 anek saih di sang bac ye lac daok biak biar.

Tal harei ini, Danak dak Tapuk saong Bruk ngak hu ngak blaoh vaktu ka 1, peih ngak tal 10 sang bac dalam tỉnh Cà Mau. Amuk Đỗ Nguyễn Hương Giang, Urang dang akaok Danak dak Tapuk saong bruk ngak di TP. Hồ Chí Minh tuk nao trun tal Cà Mau peih ngak danak dak pok brei tapuk, khan lac: “Dom ayut jeng khan haong dahlak lac oh ka ngak bruk ini mbang halei. Hu dom sang bac ye oh hu klup kapul. Dom gru pato biak caong khin klup kapul tapuk saong bruk ngak di sang bac lac jalan piah ka dom adei hu ngak, hu puac saong hu ba drei tame dom bruk ngak; nan lac takai di dom klup kapul nyaom karei dalam sang bac.”

Padang tabiak saong cak rok patagok Klup kapul tapuk saong bruk ngak jeng lac sa dalam dom bruk piah peih ngak Danak dak “Cak rok patagok ilamo puac tapuk ka anek saih THPT Cà Mau vaktu 2023 – 2024” hu Sở Pato megru Cà Mau peih tabiak. Adei Cao Trọng Nghĩa, anek saih tal 10, Sang bac THCS saong THPT Lý Văn Lâm, brei thau, hu mbaok tame Klup kapul adei hu puac tapuk dak harei dak rilo jang saong bac megru hu rilo ilamu jang: “Tapuk lac sa binah biak prong dalam rai diuk urak ini, kayua nyu ba mai rilo kein laba siam. Dalam tapuk hu rilo kadha bac biak hu yaom piah daong ka khaol drei saneng, gam haong dom caong thau dalam rai diuk di khaol drei. Saong nyu ngak brei pambak khang tal rai diuk di adei. Daong ka adei pataom mek hu kadha bac hu yaom, ilamu dalam rai diuk urak ini.”

Tui Viện roh duah Xã hội - Kinh tế saong Môi trường ka bruk pandar tukvak lahaiy piah ngak bruk hagait ye mboh rilo dalam dom urang ranaih, hu tal 41,7% dom ayut ranaih javap jaleiy lac tagok mạng, 20% mong iek phim, 16,7% pang nhạc saong tok hu 15% javap jalei lac puac tapuk. Ilamu puac tapuk hu makna biak prong, oh lac daong paglaong akaok saneng bo daok daong ngak jeng tính cách anek manuac. Kayua yau nan ye, meng di tuk dom adei daok dok angaok kik sang bac ye njauk pachreih ba, tacei pato dom adei duah tal tapuk,  padang ngak jeng bruk bhian randap puac tapuk./.