Sang sa-ai Danh Kim, bangsa Khmer (daok di ấp Chánh, xã Lý Văn Lâm, ban Cà Mau) hu biak takik taneh pala drak. Sang njauk pah veik taneh gah liluk sang piah pala tamekai min rilo thun tapa ka oh tabiak truh hu kan kathaot. Akaok thun 2023, sang hu daong brei mesraiy 20 triệu đồng saong daong ilamu pala tamekai Vietgap. Hadei di 1 thun pala, sang hu jien mek tame jaik 80 triệu đồng. Meng phun jien nan, sang sa-ai cakrok veik bruk raong pabe. Meng tari taring, nan ye taong abih 2 bruk sa-aih Danh Kim jeng ngak hu siam, hu laba saong sang tabiak truh hu kan kathaot. Sa-ai Danh Kim khan lac: “Meng hu karja palei daong brei mesraiy 20 triệu piah ngak mbang, pala tamekai, raong pabe jeng tabiak truh kan kathaot, urak ini jeng cakrok paje. Sang hu 1 công taneh, daok pah 6 công piah pala tamekai. Sa thun pala hu 2 - 3 mbang”.

Pok jien sang sa-ai Danh Kim hu mesraiy mai meng danak dak bruk ngak negar patrun kathaot khang kajap. Thun 2023, dalam xã Lý Văn Lâm hu parabha brei labaih 400 triệu đồng, daong ka 12 sang kan kathaot, jaik si kan kathaot piah peih bruk pala njam, raong glang.

Amuk Cao Hồng Cẩm, Akaok UB bhap bini xã Lý Văn Lâm brei thau, meng phun jien patrun kathaot hu daong ka palei urak ini daok 2 sang kathaot min. Dalam thun ini, pamaong tal bruk oh daok sang kan kathaot. Daok bruk raong menuk pablei, kayua rahra kurang jien blei pandap mbang ka menuk nan ye kein laba oh ka glaong, yaom lac daok bayar sraiy ginup min jien laba ka mikva daok biar. Daok dom bruk karei jeng daok hu siam lagaih:“Tal tukvak ini, dom bruk mek hu siam lagaih. Bruk pala njam patam, tamekai ye mikva payeng phun jien hu, dom sang kan kathaot meng nan hu jalan cakrok. Daok dom sang raong pabui jeng hu laba”.

Dalam bruk brei mesraiy phun jien patrun kathaot khang kajap, gah chức năng ban Cà Mau tukvak tapa hu caik hatai sangka, daong palagaih ka dom sang urang Khmer mesraiy phun jien. Ong Vương Văn Sáng, Akaok Jabat bangsa ban Cà Mau brei thau, meng ngak hu siam Sarak 24 di mBan Chấp hành Trung ương Đảng ka bruk bangsa, brei mboh bruk sangka di Đảng, Karja brei ka bhap bini bangsa takik, tui jalan ngak lac "samu gauk, jum pataom, daong gauk yam tagok". Tukvak tapa, mban bangsa hu pablak tame rilo danak dak piah daong palagaih ka sang bangsa takik yam tagok. Dalam nan, phun jien patrun kathaot ba mai kein laba mboh di anak mata:“Dalam luac tukvak tapa, raidiuk bhap bini bangsa takik tuk halei jeng hu sangka, yaok sang jeng hu cakrok cambaih laih. Dom sang biak kham merat yam tagok, tabiak truh kan kathaot, mikva kham merat ngak mbang piah ngak kaya meda ka drei, daong ngak ka ban Ca Mau dak harei dak gheih mekre, kaya meda”.

Ban Cà Mau kham merat tal thun 2029 oh daok baoh sang kan kathaot dalam bhap bini bangsa takik, patrun bruk atah di gauk dalam raidiuk di dom bangsa. Pablak tame dom danak dak, dom sarak, abih di nyu lac bruk pato bruk ngak, ba bruk ngak brei ka anek kamuan urang bangsa takik, ngak hu siam bruk patrun kathaot, paglaong raidiuk ka bhap bini bangsa takik./.