Rilo urang di Ca Mau hu bruk ngak tani tanat 

Sang sa-ai Nguyễn Trí Tôn (daok di xã Trí Phải, huyện Thới Bình, Cà Mau) hu jaik 3 ha taneh raong kaya ikan. Dahlau daih, sa-ai Tôn tok palao rieng pajaih tame danao hadang, hu drei halei mek drei nan. Sa-ai oh caik hatai ka bruk pajaih yau habar piah plaih lahik, jeng oh caik hatai rilo tal bruk lac palao yau habar piah ka rieng haong hadang daok hu dalam sa labik haong gauk, nan ye oh glaong. Atah di ini 2 thun, sa-ai Tôn hu tame tal pato pakai bruk raong rieng kayua Jabat LĐTBXH huyện Thới Bình peih tabiak, tuk ba ilamu bac megru hu tame bruk ngak ye mboh hu biak siam:

"Dahlau daih drei palao 3.000 drei rieng pajaih ye tuh trun bo oh caik hatai hagait, hu drei halei mek drei nan. Urak ini drei thau ilamu raong 2 tukvak, drei raong tal praong boh palao tabiak nan ye khik iek hu, thau hu hadom hadang. Taphia di nan, drei brei mbang pabak pandap mbang tự nhiên, kein laba glaong jang.

Urak ini jien mek tame di sang sa-ai Tôn hu jaik 70 triệu đồng sa ha, tagok jang dua mbang duk haong dahlau daih. Jeng di  xã Trí Phải, dom thun jaik di ini, bruk raong hadang ginraong hijao tagok khang. Gah chức năng palei hu peih dom tal pato bruk ngak piah tacei pato ilamu raong ka urang nong. Sa-ai Lê Văn Toàn daok di xã Trí Phải khan lac, meng hu tame tal pato bruk raong hadang ginraong hijao bo kein laba meng bruk raong di sang sa-ai dak harei dak glaong:

Meda lac, tapa dom tal bac bruk ngak ye ilamu di drei hu glaong tagok. Meng bruk pilih ruah pajaih, ngak sambo màu ia saong jalan raong tabiak drei hadang piah pablei hu yaom. Dahlau daih, jien mek tame hu 35 triệu sa ha, urak ini hu pabak rieng, hadang ginraong nan ye jien mek tame meng 60-70 triệu sa ha. Daok meyah raong njauk, jien mek tame daok hu rilo jang.

Tui Sở LĐTBXH tỉnh Cà Mau, meng akaok thun tal ini, dalam tỉnh hu peih tal pato bruk ngak brei ka jaik 14.000 urang ngak. Abih di nyu lac, tinh iek praong bruk pato pakai dom tal bruk ngak, iek tui bruk di yaok bhum, yaok palei. Tapa nan, patagok hu prein khang dalam cakrok kinh tế di yaok labik. Ong Từ Hoàng Ân, Phaok Yam ndok Sở LĐTBXH tỉnh Cà Mau khan lac:

Dom bruk ngak, pato pakai ka urang ngak di palei pala, hadei di tuk bac bloh hu daong ka urang ngak hu kein laba di mangaok mbalng taneh di drei. Dom tal yau raong hadang, rieng quảng canh salih bahrau, bruk pak kreim la-a, sak halam, pala bimao,...Hadei di pato pakai bloh, urang duah hu bruk ngak labaih 90%.

Tỉnh Cà Mau hu mbuan lagaih piah cakrok bruk raong kaya ikan. Dom tal pato bruk ngak, iek tui bruk di yaok bhum, palei dak harei dak dui pachreih hu rilo bhap bini tame bac. Tapa nan, hu daong ka bhap bini hu jalan ngak kaya meda mangaok mblang taneh di drei, saong daok patrun, patakik bruk nao ngak mbang atah, rik daong dak padang palei negar dak harei dak cakrok, patagok./.

Urang lang: Hanipha- 22/8