Sang ong Võ Ngọc Thanh, daok di palei Sông Xoài 2, xã Láng Lớn, huyện Châu Đức, tỉnh Bà Rịa - Vũng Tàu hu 400 phun caphe pajaih hijao katut, daok pala pablak haong phun durian di angaok taneh praong 1,8 ha. Mayah bilan caphe thun dahlau, sang ong Thanh tok pablei hu yaom meng 37.000 - 43.000 đồng/kg, ye thun ini, meng akaok vụ urang mai blei yaom meng 58.000 - 59.000 đồng/kg. Bruk njauk bui sambai jang nan lac, baoh caphe di sang ong mek hu rilo, tui kuhria hu labaih 2 tấn. Tui yaom yau urak ini, kaoh abih phun jien, sang ong hu labaih labaih 100 triệu đồng.

Ong Thanh khan lac: " Yaom caphe thun ini biak glaong, mikva urang pala caphe mboh biak hu laba. Urak ini, caphe daok hu yaom, mikva biak uan tabuan, chreih chrai. Mikva daok kuhria peih praong taneh pala caphe, patagok taneh pala rilo jang. Sang dahlak kham marat meda pala pabak 400-500 phun"

Sở Ngak nong saong Patagok palei pala tỉnh Bà Rịa-Vũng Tàu brei thau lac, rilo thun tapa, abih di nyu nan lac dalam 2 thun jaik di ini, kayua yaom caphe trun bier ngak ka urang pala caphe oh daok mbak carak haong phun caphe nan ye ba tal bruk kaoh klaak bein phun caphe. Tapa yaok pataom, hu labaih 183ha phun caphe njauk kaoh klaak piah salih ka dom janih phun pala karei, urak ini dalam tinh daok labaih  3.643 ha. 

Anak bruk yau ini, UBND tỉnh Bà Rịa - Vũng Tàu hu ba tabiak Jalan peih ngak Danak dak pala veik phun caphe vaktu 2021-2025 di dalam tỉnh. Tui nan, dalam vaktu 2021-2025, tỉnh meda pala veik 108 ha cà phê, pataom rilo di huyện Xuyên Mộc saong huyện Châu Đức, baoh caphe di vaktu pablei salih hu tani tanat meng 3 - 3,5 tấn sa ha; jien mek tame di sa mblang taneh pala caphe hadei di tuk pala veik tagok sa mbang meteh dut saong dahlau deih.

Saai Mai Hoàng Việt, daok di xã Cù Bị, huyện Châu Đức brei thau, tukvak tapa bhum pala caphe daok trun khang, piah duah jalan pablei caphe ka urang nong saong patagok yaom glaong ka phun caphe di palei, dalam 2 thun tapa, saai khang hatai pataom blei asal caphe di urang pala dalam bhum blaoh chế biến pablei ka darak pasa. Tui saai Việt, pataom blei asal caphe di urang nong jeng piah pasiam veik bhum pala: "Meng dahlau deih tal urak ini, dahlak kak kajap haong phun caphe di palei, thun bilan tapa nao oh daok rilo caphe tra. Urak ini dahlak caong pamadeih tagok hatai takre, biak caong cak rok phun caphe saong ba mai yaom patagok, piah ka urang nong pala veik phun caphe".

Ong Đỗ Chí Khởi, Akaok Jabat Ngak nong saong Patagok palei pala huyện Châu Đức brei thau, dom thun tapa, bruk pala gilac veik daok dang sa labik, urak ini yaom baoh cà phê daok di tanut glaong abih dalam 15 thun tapa, lac tukvak lagaih piah pachreih urang nong peih praong taneh pala saong patagok bruk pala veik. Bruk pala veik phun caphe piah paglaong năng suất, chất lượng, kein laba saong jien mek tame ka urang pala caphe, paglaong prein mariak gauk, yaom tagok, rik daong cak rok patagok khang kajap gah ngak caphe dalam huyen: "Tacei jalan ka urang nong tuk pala veik phun caphe dalam vaktu 2023-2024 gah Ngak nong huyen padang jalan ngak, peih ngak dom bruk, ba tabiak dom pajaih caphe bahrau lagaih haong taneh riya di pak ini piah pachreih urang nong pala veik phun caphe".

Gah ngak nong tỉnh Bà Rịa-Vũng Tàu hu panuac kakei lac, mikva urang nong daok kuhria pala bahrau veik phun caphe njauk pilih ruah pajaih phun caphe lagaih haong taneh riya, langik tasik, pajaih phun caphe jeng hu asal cambaih laih piah khik kajap ka chat luong phun pala./.