Dom anek saih saong gru pato daok puh ramik sang bac caga ka thun bac bahrau

  Daok jaik sa bilan tra gac meng peih mbaok tame thun bac bahrau 2022-2023, min tapi urak ini, diuk pasang saai Bích Thiên Vân daok di palei Lạc Trị, xã Phú Lạc, huyện Tuy Phong, tỉnh Bình Thuận blei ginup tapuk saong dom pandap panda bac magru ka 2 anek di drei brei bac tal 2 saong tal 4 piah caga ka thun bac bahrau mbiak mai tal.

Saai Bích Thiên Vân brei thau, diuk pasang saai ngak mbang pamaong akaok tame di 3 sào tanah hamu, gam haong jien sa bilan labaih 6 triệu di drei  mai meng bruk ngak kong ka Galang Xí nghiệp jhik manyim Tuy Phong (di Công ty Cổ phần jhik manyim Bình Thuận Nhà Bè), kayua yau nan ye gait njauk kali kalih patak pataom meng ginup mbang ngui di sang.

Kayua yau nan ye, piah hu ginup jien piah blei tapuk siphau, pandap panda bac magru jang yau khan aw ka 2 anek nao bac dalam thun bac bahray, dom bilan tapa, diuk pasang saai biak kham marat patak pataom dalam yaok bruk mbang ngui, raiduk saong ngak veik rilo bruk piah duah hu jien. Yaom lac gaok kan kandah min diuk pasang saai Vân jeng kham marat duah piah ka anek mbik di drei hu nao tal sang bac. Saai Vân brei thau: “Sang dahlak hu 2 urang anek, akaok thun labik labaih 3 trieu jien nao bac, ka oh kuhria tal jien ini jien deih…”

        Jeng hu 2 anek, nek praong thun ini bac tal 10, anek sit bac tal 4, diuk pasang saai Bá Thị Thu Loan daok di palei Bình Hoà, xã Phan Hòa, huyện Bắc Bình, tỉnh Bình Thuận jeng daok jar var sangka ka anek mbik hu nao bac.

  Saai Loan brei thau, kuhria dom paok jien njauk buh rik ka 2 urang anek labaih 5 triệu đồng. Mayai ndom yau nan ka oh kuhria tal jien blei tapuk siphau, khan aw, takhaok… Dua diuk pasang thei jeng lac viên chức Kanja min jeng biak patak pataom dalam bruk mbang ngui yaok harei, patak pataom yaok bruk meng ginup piah sangka ka anek tame thun bac bahrau: “Dua diuk pasang ngak pah duah jien, langiu di nan oh hu ngak hagait…”

  Piah tani tanat ndap nda pabak hu ginup brei bruk pato magru saong bac ka anek saih dalam thun bac bahrau 2022-2023 ini, mban giám hiệu di sang bac gam haong rajaei puk palei hu rilo mikva bangsa Cam hu pasang iek veik dom papan kik daok, pandap panda dak khut piah ngak pasiam veik saong salih bahrau. Dalam nan, sang bac jeng hu rami ramik tapuk siphau bac saong bac akhar Cam. Urak ini, dom sang bac hu ba tabiak jalan pataom dom anek saih saong puh ramik ngak hacih dalam sang bac piah caga ka harei peih mbaok di thun bac bahrau (5/9).

Cei gru Nguyễn Văn Liêm – Phó Akaok Sang bac Trung học cơ sở Phan Hòa brei thau, thun bac 2022 – 2023 ini, sang bac hu labaih 670 anek saih. Urak ini sang bac daok pambuak haong rajaei padang angan trun jien bac ka dom anek saih sang kan kathaot, jaik kathaot, anek saih di sang sarak kanja, anek saih sang gaok kan kandah... Cei gru Liêm brei thau lac: “anek saih xã Phan Hòa đóng 100% bảo hiểm y tế…”

Tui Sở Pato magru tỉnh Bình Thuận, ureak ini dom sang bac, tal bac di bhum mikva bangsa Cam di tỉnh Bình Thuận hu padang ngak biak khang kadang, pabak hu hatai caong di cơ sở vật chất gam gam saong tani tanat pabak ka bruk pato magru saong bruk nao bac ka anek saih bangsa Cam.

Meng thun bac 2022 – 2023 ini, UBND tỉnh Bình Thuận hu sarak brei angan tapuk siphau (SGK), tal 3, tal 7, tal 10 pandar dalam labik pato magru phổ thông di dalam tỉnh Bình Thuận. Kayua yau nan ye, ngan haong dom amaik ame hu anek bac tal 3, 7 saong 10 tuk blei tapuk bac jeng njauk caik hatai tal dom angan tapuk piah blei tapuk kanjauk.

Sang bac biak siam gheih, khang kadang gam haong bruk sangka di dom amaik ame, thun bac bahrau 2022 – 2023 ini, dom labik sang bac di bhum mikva bangsa Cam meda ngak salah siam lagaih dom bruk bo gah mato magru di tỉnh hu ba tabiak./.

Urang lang: TS. Phú Văn Hăn – 14/08