Ban raya HCM daok jhul khang bruk patagok du lịch jalan ia

Ban raya HCM hu rilo prein khang piah cak rok patagok du lịch jalan ia kayua hu 2 kraong praong, nan lac kraong Sài Gòn saong kraong Đồng Nai nduac tapa gam haong dom kraong sit, dom ribaong atah abih tih labaih 1.000km. Hadei di 2 thun njauk kan kandah kayua jit praong covid-19, du lịch jalan ia daok hu karja ban raya haong rilo doanh nghiệp buh jien tame piah ngak rilo pandap panda du lịch, tagok prein dui pachreih tuai damuai. Pak di dalam tuk siam makre bahrau, gilai buýt jalan kraong Saigon Waterbus hu mayaih khan khang jang, gam haong bruk peih pakah mblang bein Bến Bạch Đằng hu ngak jeng labik hadah ka gah du lịch jalan ia di ban raya.  

Oh lac ba tabiak veik dom pandap panda hu blaoh, rilo công ty daok ba tabiak dom bruk du lịch jalan ia bahrau. Pagap yau, TST Tourist yaih khan 2 bruk: “Thủ Đức – ban tapen kraong hijao” saong tour du thuyền pakat glaong “Maong iek Sài Gòn - Hòn ngọc Viễn Đông”. Ong Nguyễn Minh Mẫn– yam ndoc Truyền thông Marketing di TST Tourist taong yaom lac:“Khol dahlak pilih ruah kraong ia piah cak rok patagok bruk du lich kayua kraong Sài Gòn hu makna biak praong, pambuak haong sajarah dak padang saong cak rok patagok bhum taneh ini. Ban raya HCM hu jalan kraong ribaong, pambuak dom quận huyện saong bruk cak rok patagok di jalan mangaok ia hu daong ka raidiuk di bhap bini siam lagaih jang, saong daok lac jalan peih tabiak piah pambuak du lịch di dom quận huyện saong ngak jeng dom pandap panda biak gheih”.

   Bruk cak rok patagok du lịch jalan ia di Ban raya HCM hu ndem tal meng labaih 10 thun dahlau. Min, tal urak ini, jeng ka oh ngak hu yau hatai caong. Kayua dom paga pacang gah adat hukum, bruk kateik angaok gauk gah khik ramik. Pagap yau di labik pabah lamnge Vân Đồn, urak ini tok daok 5 du thuyền nổi, trun rilo dut saong dahlau deih. Min dom doanh nghiệp ngak mbang gah du thuyền nhà hàng njauk gaok dom yaom jien dịch vụ biak glaong kayua hu kuhria tui pabah mange tasik, oh lac pabah lamnge dalam taneh ia. Taphia di nan, bruk ka oh samu gauk gah hạ tầng ngak ka gah du lịch jalan ia di TP.HCM gaok kan kandah, yau ye bruk padang ngak dom mbaik tatua tapa kraong biak bier ngak ka gilai du lịch oh nao tapa hu. Ong Phan Xuân Anh – Yam ndoc Công ty TNHH Thuyền Sài Gòn, gah daok pandar saong peih dom sruh gilai di kraong Nhiêu Lộc – Thị Nghè brei thau: “Mbaik tatua bier abih di kraong Nhiêu  Lộc – Thị Nghè ini lac tatua Trần Khánh Dư, gilai praong oh tapa hu, daok gilai sit ye yaok mbang ngak gilai khol dahlak njauk tabiak pak nan cang tuk ia praong abih blaoh dut iek meng mbaok ia tagok tal mala tatua piah gilai ka nyu njauk haong khung nan. Min tuk njauk khung nan ye nyu daok 1,6m, urang Việt daok nao njauk akaok, ndom hagait tal urang negar langiu”.

Piah pok paglaong bruk cak rok du lịch ban raya, jhul samar bruk patagok du lịch jalan kraong, ong Nguyễn Trần Hoàng Phương – akaok Viện Du lịch Xã hội mboh lac, ban raya HCM njauk bac magru meng 2 bruk hu ngak biak siam saong mek hu laba praong dalam rilo thun tapa lac Singapore saong Bangkok - Thái Lan. Dom ban ini hu ramik ngak samu gauk meng labik pataok, tatua tabiak gilai, dom labik ma-in, labik tal siam makre rah tui 2 gah takai kraong piah pachreih hu rilo tuai damuai.

Meda mboh lac ban raya HCM hu prein khang praong gah du lịch jalan ia min piah ngak brei prein khang hu jeng biak, jeng daok hu rilo bruk brei hu lang yah saong brei hu bruk ba tangin tame pambuak gauk ngak khang, ngak samu gauk meng dom mban, dom gah, oh njauk lac bruk di taeng gah du lịch./.

Urang lang: Thu Thao – 02/07