Rilo adei hu iek glang biak siam 

Danak dak “Amaik raong” lac bruk ngak bak hatai anit ranam patui jalan jak jeng di bruk “hatai anit brei ka adei, hadei meng COVID” di Công an ban Cần Thơ. Kapul urang kumei Công an hu pambuak bruk haong Kapul dam dara, Công đoàn peih bruk taduan raong, daong brei 03 triệu đồng sa uranaih sa thun, blei bảo hiểm rup pabhap tal umo 18 thun ka 50 uranaih, dalam nan hu 48 uranaih metui kayua jit praong COVID-19 saong 02 uranaih metui kayua makna karei; daong jien blei khan ao, tapuk siphau, radaih juak, laptop, smartphone, peih bruk nao ravang, pachreih ba saong alin hadiah pandap tuk lễ, tết...; daong jien padang ngak 03 baoh sang, 01 bruk ba jalan ngak mbang duah jien tani tanat raidiuk piah ka sang raong ba uranaih hu siam jang...haong yaom jien daong abih tih tal harei ini lac labaih 1,2 tỷ đồng.

Lac dom urang amaik raong, Kapul urang kumei Công an dom pakat dalam ban Cần Thơ tuk halei jeng bak hatai anit ranam, maong iek dom adei yau anek pajeng di drei. Di labik Thới Hòa A, quận Ô Môn, hu adei Võ Thị Kiều Oanh (umo 13 thun) matui amaik kayua COVID-19. Urak ini adei daok haong amuk taha praong thun, hadom glaih glar kateik tagok bara di urang ame daok nao ngak mbang pah piah duah jien kuhria ka raidiuk. Mboh adei biak anit, công an quận hu pambuak bruk haong kapul urang kumei quận daong pandap mbang brei yaok bilan, gam haong dom pandap bac da-a, khan ao nao bac piah adei daok hu nao bac da-a. Tuk hu tangi sua ka dom urang amaik raong, ia mbaok  Kiều Oanh hadah tagok, ndom lac:

Tuk hu amaik raong, anek mboh bui sambai lo kayua hu dom amaik raong pachreih ba, ravang iek saong bhian brei jien blei pandap bac da-a. Meng tuk hu dom amaik raong daong brei, anek bhian ôn bài, bac bài di tuk melam saong tal tuk pakacah puac học kỳ, anek kham merat mek hu angan anek saih naih joi piah ka dom amaik raong hu bui sambai.

Taphia bruk daong jien ndo, pandap panda, dom pakat Kapul urang kumei Công an ban Cần Thơ daok hu daong tacei pato jalan diukrai chreih chrai, siam ka prein yava di dom uranaih, daong palagaih ka dom adei hu cakrok abih gah dalam baoh sang, langiu puk paga.  Trung tá Nguyễn Ngọc Thúy, Akaok Kapul urang kumei Công an ban Cần Thơ khan lac:

Meng tuk peih tabiak ngak tal urak ini, hatung hatai di dom kamuan hu salih bahrau biak siam. Tuk camereip bahrau taom gaok dom kamuan, mboh dom kamuan biak pandik harao, biak duh hatai. Min tapa bruk sangka daong di dom pakat hội, tal tukvak ini, dom kamuan jeng maong iek dom pakat kapul urang kumei công an yau amaik, yau gauk gar dalam sang. Tari taring, bac da-a naih joi.

Danak dak “Amaik raong” hu peih tabiak oh ka lavik min taduan hu bruk njauk hatai, pachreih tui di taong abih Kapul, Nyaom dalam Công an ban Cần Thơ saong dom kapul nyaom puk palei. Tui amuk Võ Kim Thoa, Akaok Kapul urang kumei ban Cần Thơ, meng rilo jalan ngak karei gauk, Kapul urang kumei Công an ban Cần Thơ hu dom bruk ngak biak hu makna, siam lagaih, daong ka dom adei hu thar vak biak kan kandah, rik daong ba mai hatai jia saong hatai caong ka dom adei:

Kapul urang kumei ban Cần Thơ jeng hu payua harak gar piah pok meyaom kapul urang kumei ban Cần Thơ saong jeng hu Trung ương hội pok meyaom ka dom adei sa-ai, meng nan, ngak brei medeih tagok rilo jang hatai anit ranam dom uranaih, piah ka dom pakat kapul, dom gah karei, dom urang ngak pahla haong Kapul urang kumei ban Cần Thơ taduan ngak amaik raong ka dom kamuan kan kandah daok veik.

Dom takai yam “Amaik raong” di Kapul urang kumei Công an ban Cần Thơ jeng daok abih drei angaok jalan padang bruk anit ranam. Piah ka danak dak hu pambak tabiak saong hu khang kajap, Công an ban Cần Thơ daok pasang iek, duah thau dom uranaih hu raidiuk kan kandah piah samar daong brei, gam haong nan, patagok bruk ieu pataom, jak ba dak harei dak rilo kapul nyaom, menuac urang ba tangin tame piah daong ka dom adei hu harei hadei hadah hadai jang./.

Urang lang: Hanipha- 19/8