Dah page puac adit di labik bein sit dalam mblang ma-in di Resort Victoria Cần Thơ, hu labaih 30 tuai di Vietravel Cần Thơ daok ba drei tame biak sambai ngan haong mbang pasram Thiền saong Yoga gam haong urang pato hu ilamo. Ini lac bruk ngak du lịch pambuak haong bruk pasiam prein yava, hu dom công ty du lịch lữ hành di Cần Thơ jhul khang dalam tukvak jaik di ini.

Ong Lê Thế Nguyệt, ndih tapui thun 1952, palei daok di Nghệ An brei thau, di umo thun taha hu rilo bruk piah sahaneng, kayua yau nan ye ong bhian pilih ruah dom tour du lịch pambuak haong Thiền saong Yoga piah tut angan tame. Bruk du lịch ini biak siam makre saong ong tuk halei jeng pilih ruah dahlau dalam dom tour du lịch: “Hu mbaok tame danak dak ini drei mboh biak sahanang hatai, biak takre, chreih chrai, ba drei tame rilo danak dak, yau nan ye biak siam makre oh lac dahlak bo daok ka adei saai, ayut saabat. Dahlak caong khik tani tanat suai lavik dalam tuk drei mboh tui hu bruk ini, jalan du lịch ini”.

 Du lịch pasiam ini hu ramik ngak piah ka tuai meda buh tabiak tukvak ka drei padeih padai, ba drei tame langik tasik saong mboh dom siam lagaih karei di yaok harei. Cần Thơ dui pachreih dom công ty du lịch lữ hành, doanh nghiệp, dịch vụ du lịch pambuak gauk jhuj khang dom janih du lịch ngak pasiam, kayua bruk ngak ini oh lac piah ma-in, bo daok ba mai rilo makna biak karei, abih di nyu nan lac dalam saman bo anek manuac dak harei dak sangka rilo ka prein yava.

Mai tal huyện Phong Ðiền bilan ini, rilo meng lac dom bein phun lavik thun ngan haong rilo janih angan yau ye: baoh saik Hạ Châu, durain, chôm chôm… daok jar var raok tuai mai rivang iek, ba drei tame. Phong Điền jeng lac labik tal bo ban biak iek praong bruk ngak du lich pambuak haong bruk ngak nong, ba rilo bruk ngak piah ka tuai gam haong urang nong yuak kuak, paik dom pandap panda saong ngak pak di labik dom pandap mbang meng kan biak bingi. Saai Lê Thiên Lý, lac tuai mai meng tỉnh Sóc Trăng brei thau: “Sóc Trăng bahrau hu angan je ahar pía, oh hu rilo baoh kayau, rilo meng lac mblang hamu. Pak Cần Thơ ye hu rilo baoh kayau, abih di nyu nan lac baoh saik di Phong Điền ini nan ye adei mai ba drei tame. Adei mboh biak siam makre kayua tuk hu paik baoh meng phun trun, baoh saik mbang  yamen bingi jang”.

Yaom lac bruk ngak ini daok cak rok patagok, min rilo sang urang nong oh ka bhian ngak du lich jeng kan kandah rilo dalam bruk ba jalan ngak. Pagap yau sang ong Lê Quang Vinh, daok di xã Đông Hiệp, huyện Cờ Đỏ, hu bein phun baoh kruac xoàn hu pok brei angan lac OCOP 3 patuk, caong hu mbaok tame ngak du lich min oh hu kayua oh thau tantu cambaih dom harak gar hành chính, oh thau cambaih dom sarak daong di urak ini di bhum palei saong Trung ương: “Mayah ngak hu du lich ye pandap panda di drei dak harei dak hu nao tagok. Dahlak jeng hu jalan kuhria min oh thau hagait ka adat ngak du lich. Mayah hu Kanja daong, dahlak meda patui veik buh jien tame bein baoh kruac tui jalan du lịch, piah pandap panda hu rilo urang thau tal, rivang iek blaoh hu mbang baoh pak di labik.”

Amuk Trần Thị Thiên Thư, Phó akaok Kapul urang nong ban Cần Thơ brei thau lac, kein laba piah cak rok patagok du lich pambuak haong bruk ngak nong di Cần Thơ daok biak rilo, tukvak anak tal, Kapul urang nong ban meda pambuak haong dom gah hu ilamo paglaong hatai sahaneng ka makna dalam bruk salih meng bruk ngak nong meng kan tapa bruk ngak nong pambuak haong ngak du lịch, pabak ilamo ka dom baoh sang urang nong: “Daong pasram ilamo piah ka mikva hu pambuak tal tuk bo kol drei peih praong bruk ngak nong pambuak gam ngak du lịch ye caong dom ilamo hagait. Kapul urang nong jeng meda pambuak haong dom gah, piah daong ka mikva urang nong hu hatai anit ranam, hu bruk ngak biak biai piah daong prein ka mikva meda padang ngak saong cak rok patagok bruk ngak hu samar drah, khang kajap.”

Du lịch tui kuhria daok lac bruk ngak pasak di Cần Thơ, di asal kadha padang ngak bruk du lich baurau lagaih haong hatai caong di tuai damuai khin duah mai dalam rup drei, roh duah dom labik bein phun biak siam makre, ban meda jhul khang bruk ngak du lịch MICE (du lịch pambuak haong nyaom biai, ginum biai, parang iek, peih nyaom biai). Ngan haong bruk pambuak gauk gam bahrau, gam ndung bak ilamo, du lịch Cần Thơ meda ngak jeng janih biak karei di drei lac “hijao – hacih – khang kajap”./.