Kadha vak " Cần Thơ, bilan ia ndik jaik tal, palei ngak halam daok chreih chrai tagok” di urang vak Hồng Phương daok di bhum ĐBSCL.

Yaom lac bahrau hu, min bruk ngak halam ráp lú di palei Thạnh Hưng 2, xã Trung Hưng, huyện Cờ Đỏ daok tagok khang haong labaih 100 urang tui bruk ini, dalam nan rilo meng lac adei saai kumei.

Tangin gam pak biak samar, gam ndem mayai nao mai, saai Nguyễn Thị Thúy Liễu, daok di palei Thạnh Hưng 2 brei thau, dahlau deih saai ngak kong nhân hu jien mek tame oh tani tanat. Jaik 2 thun ini mai, meng hu bac bruk ngak halam, pak lú saong mek  pandap mai ngak pah di sang bo kinh tế hu siam tagok: “Dahlau deih sa bilan hu 4 - 5 triệu min, kan kandah lo. Tuk jit ruak hu bilan tok duah hu 2 - 3 triệu kayua ngak cty đông lạnh pandap oh tani tanat. Urak ini mai pak lú ye hu jien rilo jang. Pak lú ini rilo công đoạn min mbuan, oh kan hagait, pak mbang pah yaok sa baoh 50 ribau dong".

Amuk Võ Thị Vẹn, Akaok Kapul urang kumei xã Trung Hưng, huyện Cờ Đỏ brei thau, Kapul hu padang Nyaom pambuak gauk pak lú di dhar kapul urang kumei palei Thạnh Hưng 2, urak ini hu 19 saai hu mbaok tame daong ka adei saai bac bruk ngak hu siam jang. Tukvak kapul nyaom pambuak gauk ngak tabiak mbaok jeng njauk tuk tame bilan tabung glaong di bruk pak ráp lú dalam thun nan je jien mek tame di adei saai kumei mek hu meng 3-4 triệu đồng sa urang sa bilan: “Hadei di jit ruak Covid-19, adei saai nao ngak mbang atah mai veik palei ye jeng huac  nao ngak veik, nan ye adei saai bac di gauk saong ngak bruk pak ráp lú. Bruk ngak ye ngak dalam tuk lahe, taha meda hagait jeng ngak hu abih, jien duah hu tani tanat, gam hu ngak bruk sang danaok, gam duah hu jien mbang cai”.

Dom baoh lú hadei di tuk ngak blaoh hu ba trun ka dom tiệm halam di palei ngak Thơm Rơm, quận Thốt Nốt – lac sa dalam dom labik pablei halam praong di bhum ĐBSCL. Langiu di bruk ngak dom janih taong cap ikan ia taba, dom thun jaik di ini, dom pandap taong cap ikan tasik jeng hu blei biak rilo kayua kinh te dak harei dak hu siam veik. Nan lac makna bo rilo labik pah veik rilo urang ngak mbang tui pandap saong urang ngak mai mek pandap halam nao ngak di sang blaoh jao ka labik ngak, meng pabak samu dom đơn hàng.

Bruk ngak lú – halam di Cần Thơ ngak luac thun, min bilan ia ndik mai jeng lac tukvak palei ngak bruk khang di abih. Amuk Nguyễn Thị Ngọc Thuận, po labik ngak halam Hữu Tý, lac sa dalam dom labik ngak praong abih di palei ngak Thơm Rơm khan lac, urak ini labik ngak hu labaih 200 urang ngak bruk yaok harei haong jien mek tame meng 200 ribau dong sa urang sa harei. Langiu di nan, daok hu  rilo urang mek pandap nao ngak di sang:  “Labik di dahlak ngak halam - lú - rập rilo lo piah caga ka bilan ia ndik jaik tal. Bilan ini, halam pablei biak rilo, daok lú - rập ye hu pablei luac thun di bhum ini blaoh tapa bhum deih. Jalan ngak pandap taong ikan jeng salih karei rilo, dahlau deih rilo meng lac ngak meng tangin, urak ini hu mac daong, pandap jeng hu rilo jang. Dahlau daih sa harei sa urang tok ngak hu 10 blah halam, ye urak ini sa urang meda ngak hu 20 blah halam”.

Meng oh padeih ngak tabiak rilo janih pandap, meng bruk buh jien tame blei jamraik bahrau, nan ye dom pandap panda taong cap ikan di palei ngak Thơm Rơm jeng daok hu mbaok di grauk dom tinh miền Tây, dom tỉnh tapen tasik bhum kreh negar saong hu pablei tapa negar Campuchia ngan haong jien mek tame glaong.

Sa bilan ia ndik daok mai jaik tal, bruk pak lú – halam daok yam tame tukvak ngak bruk chreih chrai, meda ba jien tame rilo jang ka urang ngak di palei dalam tukvak lahe. Meda mboh lac, bruk pak lú – halam yaom lac mbuan ngak min nyu hu prein diukrai khang kadang, lú – halam saong dua plak tangin di urang ngak pagam pambuak tame gauk, ngak jeng blah thaot bak sambo mau gheih makre./