Darak angaok kraong saong dom baoh pulao lac 2 yaom glaong ilamu kraong ia mbuan mboh saong ndung bak bruk karei abih di bhum ÐBSCL. Ini jeng lac 2 janih ilamu kraong ia hu pandar yau kaya pandap dalam cakrok du lịch, ngak jeng pandap tok hu di bhum taneh Chín Rồng. Oh langiu di bruk nan, di Cần Thơ, darak angaok kraong Cái Răng lac bruk biak karei di bhum kraong ia, lac labik ilamu kak kajap haong sajarah bhum taneh, lac drap ar hu yaom glaong njauk khik ramik. Saong tour darak angaok kraong Cái Răng tuk halei jeng daok dalam bruk duah thau Cần Thơ di jaik abih dom Cty du lịch lữ hành.

Yau nan min, tuk jalan mbak saong bruk pablei salih nao mai jalan radaih, jalan kapal haok dak harei dak cakrok, bruk ngak di darak angaok kraong Cái Răng dak harei dak sit veik, oh daok hu rilo menuac blei salih yau dahlau daih. Anak bruk yau nan, meng thun 2016, danak dak “khik ramik saong patagok darak angaok kraong Cái Răng” hu ban Cần Thơ peih praong, haong 13 hạng mục, pamaong tal bruk praong di abih lac khik takai urang pablei salih meng grauk labik mai ini, khik ramik ilamu darak angaok kraong Cái Răng.

Yaok thun, UBND quận Cái Răng jeng hu peih “Harei pataom Du lịch Ilamu darak angaok kraong Cái Răng”, hu rilo bruk ngak, rilo gian hàng yau: pataom pakacah “Gheih mekre ao bà ba saman dahlau saong harei ini”; pataom pakacah parang iek ghe, kapal – mbaik gai “bẹo” blei salih kaya nong di darak kraong ia Cái Răng; diễu hành kapal angaok kraong, sraong mek hareik angaok kraong, dom gian hàng yaih khan, peih bruk ravang me-in, yaih khan pandap karei di palei, ahar bhap bini Nam Bộ, parang me-in đờn ca tài tử angaok kraong.., piah brei mboh veik ilamu darak angaok kraong ia saman dahlau brei ka tuai damuai thau.

Pambak tame dom baoh pulao piah ngak du lịch lac jalan nao njauk haong bruk di nyu, Cần Thơ peih praong, cakrok gah ngak kong oh hu thak pui. Dalam nan, HTX du lịch Cồn Sơn dane angan haong bruk pahat pasram dom “loài vật” bhian randap haong raidiuk yaok harei jeng dom bruk biak karei, yau ye ikan kan mbang angaok thu, ikan padoc mum bình. Piah daong pabak parilo janih jang ka du lịch ndung bak kraong ia, Cồn Sơn brei tabiak mbaok dom drei kiuk ngak xiếc di tuk Hè 2023.

Dua tuai meng Vinh, Nghệ An tuk mai tal Cồn Sơn saong hu maong iek dom drei kiuk ngak xiếc blaoh, ndom lac: “Ini lac mbang camereip abih dahlak mboh dom drei kiuk chat tapa qua vòng, mboh biak bui sambai, chreih chrai”.

“Mbang dahlau dahlak mai tal Cồn Sơn oh hu bruk ini, mbang ini meng hu, dahlak mboh biak gheih, biak takre. Bruk ini meda dui pachreih hu rilo menuac mai maong iek dom drei kiuk ginup sambo  màu ngak xiếc”.

Gam haong ravang me-in kraong ia, ravang me-in ngak nong jeng lac sa dalam dom jalan patagok, hu gah du lịch Cần Thơ iek praong pambak tame kaya pandap di palei. Huyện Phong Ðiền, quận Thốt Nốt, quận Bình Thủy lac dom labik peih ngak siam haong rilo bruk ngak pambuak pagam haong ilamu karei di drei.

Hu mbaok di bein phun sinh thái di sa-ai Trần Thiện Cảnh, xã Nhơn Ái, huyện Phong Điền, bahrau 8 tuk dah page min hu biak rilo tuai mai me-in, paik baoh dâu Hạ Châu mbang di labik. Meda mboh lac, du lịch ngak nong ba mai rilo kein laba ka urang ngak nong tuk meda pandar phun pala dalam bein sang di drei piah ngak du lịch bo oh abih rilo phun jien buh tame. Amuk Phạm Thị Thanh Huyền, tuai mai meng Hà Tĩnh brei thau:“Mbang baoh kayau di bein nyu bingi jang baoh kayau blei di darak atau siêu thị, bo daok hu paik eng, bui sambai chreih chrai lo”.

Tui panuac khan di dom po bein ngak du lịch, langiu di tuai vãng lai, rilo labik  du lịch jeng hu caik tabiak meng 1/3 tal 2/3 mblang bein phun atau pambuak tuai ravang me-in haong dom labik peih tour, tuyến piah jien mek tame hu tagok jang. Amuk Lê Hồng Cẩm, Yam ndok Cantho Eco Resort, huyện Phong Điền khan lac:“Cantho Eco hu jalan ngak lac pambuak haong mikva urang nong piah ngak habar cakrok pandap du lịch gam tui patagok yaom glaong di kaya nong. Urak ini,  Eco jeng daok pambuak bruk haong dom sang bein piah blei abih kaya nong, hu gam bruk ngak dịch vụ. Pagap yau urak ini meda pah sa  tour kapal nao ravang iek  bein, di pak nan eng drei paik baoh kayau, eng drei paik njam , vah ikan… ngak pandap mbang, ba bui sambai chreih chrai tuk mai tal Cần Thơ.

Peih ngak danak dak bruk ngak tui Sarak nyaom roya pakat negar mbang ka XIII di Đảng, jalan cakrok KTXH 5 thun 2021-2025 dalam gah du lịch, ban Cần Thơ dak harei dak salih bahrau bruk ngak du lịch, ba tabiak jalan patagok du lịch karei di drei, lagaih haong bruk hadei di jit praong Covid-19 lac: ravang me-in jalan kraong saong du lịch pambuak haong sự kiện (MICE).

Piah dui pachreih tuai du lịch, taphia dom salih bahrau bruk ngak di dom labik ravang me-in, ban jeng hu tacei pato dom labik ndih daok ka tuai damuai ramik ngak pasiam, pabak ginup bruk padeih padei di tuai damuai bo daok pabak hu dom bruk praong pakat negar. Ong Nguyễn Hoàng Ơn, Yam ndok Pasak patagok du lịch ban Cần Thơ ndom lac:“Bruk duh ka du lịch Cần Thơ dak harei dak glaong tagok, siam jang, dom bruk praong dalam ban kol drei peih ngak dak harei dak siam jang piah duh siam di abih ka tuai du lịch mai tal Cần Thơ”.

Piah ka gah du lịch cakrok glaong jang, ban daok brei paglaong jang pandap du lịch sinh thái jaik haong langik tasik, ravang iek ilamu puk palei. Gam haong nan, piah cakrok du lịch suai lavik, Cần Thơ brei patagok ilamu kraong ia pambuak pagam haong cakrok hijao, khang kajap di du lịch negar, dunya, khik ka bruk du lịch gam ndung bak gheih mekre karei di drei bo daok khik ramik hu saong patagok hu ilamu  Nam Bộ./.