Atah di pasak Ban Cần Thơ jaik 5km jalan saong nao đò meng bến phà Cô Bắc 10 minit lac yam takai tal labik dulich Cồn Sơn, bhum taneh kaoh pulao di kreh kraong Hậu biak karei haong bruk ron sir di bhum taneh Tây Đô. Hadei di sa tukvak peih tabiak, tuai damuai mai rivang Cồn Sơn dak harei dak rilo, meng 1.000 – 2.000 mbang yaok harei. Piah khik salamat ka tuai damuai, Công an ban Cần Thơ tacei pato dom gah haong puk, bhum palei padang bruk “Jak ba gheih”.

Thun 2019, Công an quận Bình Thủy brei tabiak mbaok bruk “ Khik  kajap an ninh, trật tự, rik tame padang ngak dulich Cồn Sơn tui jalan salamat, siam mekre”. Ini lac bruk “ Jak ba gheih” piah pacang caga kol tội phạm, khik sron mbon di labik du lịch Cồn Sơn.

Tapa dom mbang pathau khan khik caga alam moi truong hacih sa-at, dom po bein saong sang bhap bini takik pandar dom pandap nhựa, salih tame nan lac riak ia caik la-ar ka tuai dulich menyum oh mek jien, caik jaik 300 thùng hareik di dom jalan vil val Cồn Sơn; peih tal pasram daong urang mblung ia ka dom po bến đò saong po bein, pabak 200 phao cứu sinh ka bhap bini, tuai damuai..

Ong Lê Trung Tín ngak du lich sinh thái di Cồn Sơn brei thau, bhap bini di labik ini biak sahanang hatai, tok pataom tame bruk ngak mbang pablei salih kuhria ka raidiuk, daok dom bruk karei hu dom urang lin cong an daong abih hatai:

  “Labik rivang main tuai ralo, cảnh sát khu vực bhian kakei dom sang ngak dulich, sang bhap bini brei samar thau dom urang halei mai labik ini main piah pathau khan dom hagait oh siam, ngak sraw kadau, ndem jhak Đảng, Karja drei ye brei khan tagok saong khik veik piah cảnh sát khu vực ngak bruk tapak. Tui taong yaom di tuai damuai ye Cồn Sơn salamat saong siam mekre”.

  “Dalam dom harei bilan Cần Thơ peih bruk patah di gauk kayua jit COVID-19 tamuh khang, siam lagaih di bruk jak ba gheih jeng hu patagok biak siam. Bhap bini Cồn Sơn, hu ba gauk papaok labaih 2.000 baoh ahar bánh ú, ahar hala dứa, abih di nyu lac ahar bánh tro piah alin brei dom menuac urang di labik pacang jit.

Jit COVID-19 tapa blaoh, piah hu pambuak bruk khang kajap haong bhap bini jang, công an phường Bùi Hữu Nghĩa hu pandar Zalo piah khan tal bhap bini 2.000 tin nhắn pathau khan pacang caga kol tội phạm, pacang caga jit ruak COVID-19, brei thau bruk tạm trú, tạm vắng…Thiếu tá Huỳnh Minh Chánh, Phaok Akaok công an phường Bùi Hữu Nghĩa, quận Bình Thủy khan lac, piah ka bruk jak ba bhap bini hu siam lagaih, bruk praong abih  lac urang jakar tuk halei jeng brei chreih chrai, bui sambai, ndom puac bingi pang, pandar panuac mbuan thau piah pathau khan asar kadha dalam hukum tal bhap bini:

  “Tuk halei jeng brei caik hatai tui pang panuac caong di bhap bini, langyah dom bruk kandah gauk sit, oh caik tamuh tabiak bruk pandiak; dui ba brei công an  khu vực  saong bhap bini jiak gauk jang, piah ka bhap bini lac sa gah pathau khan, daong cong an bhap bini dalam bruk duah thau, pacang caga dom bruk ngak suan hukum, piah brei ka bhap bini ngak siam dom sarak hukum karja, oh luai rah tabiak bruk pambuak tal an ninh trật tự dalam palei”.

Thau lac bruk jak ba bhap bini lac hu makna praong dalam bruk patagok prein khang dalam bhap bini piah cak rok kinh tế, khik kajap bruk tani tanat xa hoi, haong bruk peih ngak rilo jalan ngak gam haong jalan ngak salih birau, hadah krah, Công an phường Bùi Hữu Nghĩa, quận Bình Thuỷ daok rik daong ba Cồn Sơn jeng labik ma-in dulich salamat, sron mbon, dui pachreih dak harei dak rilo tuai dalam saong langiu negar mai tal bhum kaoh pulao bak hatai anit ranam ini./.