Taphia di bruk hadah mbaok mata ini, jeng tamuh tabiak rilo cuang kandah ka bruk khik ramik saong patagok dom yaom glaong ilamo, kinh te di palei ngak tapei racam Thuận Hưng. Kadha vak di urang vak Hồng Phương, lac urang vak di rayo sap ndom Viet Nam daok di bhum Taneran kraong Cuu Long:

Palei ngak tapei racam Thuận Hưng, daok di phường Thuận Hưng, quận Thốt Nốt hadei di tuk nao luac jalan atah labaih 40km meng pasak ban Cần Thơ, rah tui dua gah jalan gam haong dom dhar phun hijao, dom vỉ tapai racam hu dom baoh sang pabu tapen gauk, ngak jeng thaot binguk puk palei biak makre, biak gheih meta.

Saai Trần Thanh Tâm, po labik ngak tapei racam Thi Thơ khan lac, oh thau bruk ngak tapei racam hu meng tuk halei, min sang saai hu 3 rai kak kajap haong bruk ini. Jaik abih dom tapei racam di palei  hu ngak tabiak meng brah saong sarau tapung tui ilamo di yaok baoh sang, buh hasit sara piah ka ahar hu mbak carak jang. Abih di nyu nan lac, meng di tuk ngak tapei racam tal urak ini, dom baoh sang ngak tui jalan khép kín meng bruk blei pandap tamo piah ngak, blaoh ngak meng tuk ngak tapung tal tuk jeng tapei: “Blei brah mai tram blaoh chai chip, yau nan nyu meng bingi, caik lavik nyu matham oh bingi. Tapei racam ini ngak glaih lo kayua njauk kuah li-u, ia li-u ba sarau haong tapung, ba nao tuh tapei, kanduh piah am, blaoh chai tapung, capat tapung ka thu, ngak meng 3 tal 4 bruk, hadei di nan ba tabiak ghieng tuh tapei".   

Palei ngak tapei racam Thuận Hưng urak ini hu 75 baoh sang ngak bruk yaok harei, 41 baoh sang ngak tui tukvak dalam tuk tết Nguyên đán. Dom baoh sang rilo meng ngak haong dom ghieng ngak meng tangin tuh tapei meng ghieng kam, hu 4 baoh sang buh jien tame ngak tapei meng jamraik bahrau. Kayua yau nan ye bo năng suất ngan haong jien laba glaong jang biak rilo. Piah ka baoh tapei hu nao jaik jang haong rilo menuac sia, dom baoh sang ngak tapei lavik thun daok bhian hu mbaok tame dom harei rPataom pandap mbang dalam taneh ia. Bahrau ini, dalam harei pataom ahar bhap bini Nam Bộ thun 2023 hu peih tabiak di Cần Thơ, amuk Hà Thị Sáu hu parang tabiak sa gian hàng saong eng drei am dom baoh tapei cam yaih khan tal tuai mai rivang iek: “Palei ngak dak harei dak cak rok, dahlak mboh biak bui sambai, sa binah lac kayua hu mbaok tame rilo harei pataom. Meng thun 2015, thun ini lac thun 2023, thun halei, dahlak jeng hu mbaok tame harei pataom tapei racam saong dahlak pablei tapei dak harei dak chreih chrai jang".

Bruk kham marat di rilo rai rah hu ngak brei salih mbaok mata puk palei, dom baoh tapei racam hu pablei tabiak saong jien mek tame oh padeih patagok. Kuhria dalam thun 2022 pak ini ngak hu 120 triệu ahar tapei racam, jien mek tame dalam thun lac labaih 68 tỷ đồng, tagok 22% dut saong tukvak ini thun dahlau. Meng dom piluh baoh sang ngak tuk camriep, urak ini Thuận Hưng hu jaik 500 ghieng ngak tapei, angan je di palei ngak hu par tabiak tal rilo labik atah jaik, pandap panda hu pablei di grauk dom tinh, ban dalam taneh ia, tui radaih tapa tal Campuchia.

Bruk ngak tapei racam Thuận Hưng, phường Thuận Hưng, quận Thốt Nốt, ban Cần Thơ hu Mintri Ilamo - Thể thao saong Du lịch ba tame angan inem krung ilamo oh maong mboh pakat negar, di janih bruk ngak meng tangin meng kan.

Tui amuk Đào Thị Thanh Thúy, Phó yam ndok Sở Ilamo – Thể thao saong Du lịch ban Cần Thơ, palei ngak tapei racam Thuận Hưng lac labik camriep di ban hu ba tame angan inem krung ilamo oh maong mboh pakat negar, brei thau yaom glaong sajarah ilamo lavik thun di bruk ngak tapei racam Thuận Hưng. Tukvak tapa, bruk ngak meng kan meng tangin ini hu ba bruk ngak ka rilo menuac: “Anak tal, Sở ilamu the thao saong du lich meda peih ngak dom danak dak piah khik ramik saong patagok dom yaom glaong ilamo di palei ngak meng tangin meng kan; gam tui di nan jeng pathau khan praong dalam tal rahra piah pabak ka dom bruk ngak ba mai kein lagaih kinh tế - xã hội saong patagok dom yaom glaong inem krung ilamo di palei ngak".

Baoh ahar tapei racam Thuận Hưng jeng dak harei dak hu nao tal tangin di rahra di grauk labik dalam taneh ia, caong lac meng rilo jalan ngak piah cak rok patagok, meda ba jien tame tani tanat ka rahra. Meng nan, thei jeng chreih chrai bui sambai, sahanang hatai ngak bruk saong buh prein tabiak piah khik ramik, patagok bruk ngak meng kan meng tangin di puk palei./.