Sang bac Tiểu học Ba Láng, quận Cái Răng bahrau hu ramik ngak salah piah taduan raok anek saih tame thun bac bahrau. Hu padang tagok meng thun 2000, tui thun bilan, sang bac hu dom labik khut, mbaih mbaoh, kurang mblang me-in, mblang pasram, pahat. UBND Quận Cái Răng hu buh tabiak  14 tỷ đồng padang ngak dom duk bilik bahrau taduan raok 360 anek saih saong daok hu brei ka dom adei bac bán trú. Langiu di sang bac Tiểu học Ba Láng, Jabat Pato Megru quận Cái Răng jeng hu panuac ieu UBND quận pandar pok jien jaik 10 tỷ đồng ramik ngak pasiam 10 sang bac, blei pandap bac ta-a piah ka dom labik pato pakai hu hadah hadai jang dalam thun bac bahrau. Amuk Nguyễn Ngọc Tuyết Vân, Akaok Jabat Pato Megru quận Cái Răng brei thau: “Labik bac ta-a hu UBND quận buh jien tabiak ngak biak rilo. Tal tukvak ini kuhria caga hu siam piah peih thun bac bahrau 2023-2024. Daok dom gru pato ye tukvak tapa hu peih bruk pilih ruah, meda lac pabak hu bruk pato pakai”.

Caga ka thun bac bahrau, ban hu ramik ngak pasiam 21 sang bac THPT haong yaom jien abih labaih 32 tỷ đồng. Langiu di nan, tui bruk buh jien tame ngak tukvak 2021-2025, urak ini Sở Pato Megru daok brei ngak 5 danak dak pasiam labik pato bac, pandap panda bac ta-a ka dom labik pato pakai haong yaom jien labaih 193 tỷ đồng meng kadung jien karja. Dom danak dak tui kuhria hu peih tabiak ngak di puac quý 3 thun ini saong ba tame pandar dalam thun 2024.

Bruk buh jien tame ngak nan, nyu pabak hu bruk pato pakai thông minh hu gah pato megru Cần Thơ ba tabiak lac kadha praong di abih. Njauk ndom tal dahlau di abih lac “duk bilik bac thông minh” di sang bac THCS ban sit Thới Lai, dom duk, bilik hu Tivi praong 85 inch saong “bảng trượt thông minh”, komputer, laptop… hu internet, dom phần mềm daong ka bruk bac online. Anek saih hu ngak iek tapak. Dom var bac daok hu ghi hình saong khik piah online, piah ka anek saih meda maong iek gilac veik. Langiu di nan, Sở Pato Megru ban Cần Thơ daok hu peih ngak rilo bruk pato pakai paglaong ilamu ngak po công nghệ ka dom gru pato.

Jhul khang bruk pandar công nghệ thông tin dalam khik ramik, salih bahrau jalan pato saong bac, peih ngak hu siam bruk pato pakai STEM tui jalan di Danak dak pato pakai phổ thông 2018… lac dom bruk praong hu ban Cần Thơ padang ngak saong daok peih ngak rilo jalan ngak piah paglaong asal pato pakai tiểu học thun bac bahrau. Anai Bùi Như Ý, gru pato dom tal bac 3, sang bac Tiểu học Ngô Quyền, quận Ninh Kiều khan lac: “Dahlak saong dom gru pato hu pato pasram paglaong ilamu dalam tuk padeih hè ka dom bruk kuhria caga, abih bruk hu blaoh blai piah taduan raok dom anek saih. Daok bruk pato dom kadha STEM ye tapa 1 thun gru pato hu ngak blaoh ye thun ini daok peih ngak dom asal kadha nan tal dom anek saih, piah ka dom adei ngak siam dom bruk bac ta-a”.

Ong Trần Thanh Bình, Yam ndok Sở Pato Megru ban Cần Thơ brei thau, ban hu padang dom kapul pasang iek gilac veik labik bac ta-a saong bruk gru pato di dom quận, huyện, khik ka labik bac ta-a hu siam mekre, hacih sa-at saong njauk tui bruk pato megru: “Bruk praong di thun bac bahrau, gah pato megru kol dahlak jeng pataom tame “Salih bahrau – Jum pataom – Sahneng duah” saong salih bharau dalam, paglaong bruk pato pakai, bac ta-a di dalam ban Cần Thơ. Kol dahlak jeng patagok bruk peih ngak danak dak pato pakai mầm non, phổ thông, jhul khang bruk salih số dalam pato pakai”.

Thun bac ini, dalam ban Cần Thơ hu 446 sang bac meng pakat bac mầm non tal THPT, haong jaik 235 rabau anek saih. Harei peih thun bac bahrau daok mai jaik tal, dom bruk daong ka anek saih kan kandah jeng daok hu dom pakat kapul sangka, klah rabha, piah ka dom sang trun hu meneing naong trak jien padai kuhria ka dom adei tame thun bac bahrau, daong pachreih ba anek saih bac ta-a hu siam jang./.