Mai tal xã Thới Hưng, huyện Cờ Đỏ dalam dom harei ini, mboh lac mbaok meta palei pala di labik ini oh padeih salih karei tapa yaok harei. Dom jalan palei yau hu cuk tagok blah ao bahrau, alam langik tasik hadah, hijao, hacih, mekre, daong ngak brei salih bharau mbaok meta palei pala labik ini.

Mboh cambaih di abih lac bruk njauk hatai, pachreih tui di rahra dalam bruk padang ngak palei pala bahrau di xã Thới Hưng. Rahra eng drei buh prein tame ngak, halan hatian alin hadiah taneh, rik jien ndo piah daong karja palei padang ngak palei pala bahrau. Bruk daok pamaong tal praong di abih lac paglaong raidiuk, paglaong jien mek tame di rahra, pasiam jalan palei, ngak brei mbaok meta palei pala hacih, mekre. Ong Trần Hồng Thanh, daok di xã Thới Hưng, huyện Cờ Đỏ mboh lac: “Bruk padang ngak palei pala bahrau lac ba mai kein laba ka rahra nan ye mikva njauk hatai, pachreih tui saong tal urak ini, daok kham merat ngak pakhang pasiam dom tiêu chí halei bo drei ngak ka oh hu atau ka oh siam. Mikva kol dahlak nao gam haong karja piah ngak habar ka thun 2024 ini, xã Thới Hưng mek hu angan palei pala bahrau kiểu mẫu.”

Xã Thới Hưng, huyện Cờ Đỏ hu prein khang gah phun mbang baoh, labik ini hu maong lac pasak baoh kayau di huyện Cờ Đỏ. Bruk khang daok hu xã Thới Hưng pataom tame ngak lac paglaong yaom kaya nong meng dom pandap OCOP saong padang rilo jang dom HTX, pamaong tal patagok jeng doanh nghiệp.

Cty ngak kaya nong Kim Nhiên, lac Cty ngak mbang pablei salih dom pandap baoh kayau bluh thu, hu labik ngak bruk daok di xã Thới Hưng, huyện Cờ Đỏ, hu pambuak bruk haong 100 baoh sang bhap bini piah hu bhum baoh kayau piah ngak tani tanat. Cty jeng khang hatai mesraiy phun jien piah blei jamriak, mac moc, tapa nan paglaong hu yaom kaya nong. Tal urak ini, Tea Mãng cầu Kim Nhiên hu pok brei angan OCOP 4 patuk saong daok hu pablei dalam taneh ia. Urak ini, Tea Mãng cầu hu pablei tapa Mỹ, dak harei dak padang hu angan di pandap.

Thới Hưng lac sa dalam 2 xã di huyện Cờ Đỏ daok pataom tame padang ngak palei pala bahrau kiểu mẫu. Dalam bộ tiêu chí di Cần Thơ ka xã mek hu chuẩn palei pala bahrau kiểu mẫu, brei pabak hu dom kadha ka jien mek tame kuhria rah tapa tui akaok menuac, cakrok KT palei pala... Ini lac dom bruk daok pamaong tal biak glaong, caik ka karja saong bhap bini ba gauk ngak meng meda ngak hu. Ong Nguyễn Hoàng Nhiệm, Phaok akaok UB bhap bini xã Thới Hưng, huyện Cờ Đỏ brei thau, meng bruk peih praong dom jalan hu daong ka pandap panda pajeng ba mbuan lagaih, rik daong praong ka bruk cakrok patagok KTXH. Jien mek tame kuhria rah tapa di rahra dalam xã dahlau daih oh ka tal 50 triệu đồng sa thun ye urak ini, yaok rahra mek tame hu jaik 70 triệu đồng: “Dalam tukvak tapa meda mboh hu bruk sangka tame bruk di karja dom pakat, abih di nyu lac rahra jeng ba tangin tame haong karja palei piah ngak dom danak dak, dom bruk piah ngak hu dom tiêu chí ba tabiak. Rilo bruk ngak, pabak hu bruk nao mai saong ngak mbang di rahra, meng nan paglaong jien mek tame ka rahra, pambuak pagam hu dom gah piah pablei tabiak negar langiu dom janih pandap.”

Meng bruk njauk hatai, pachreih tui di rahra saong karja palei dalam bruk padang ngak palei pala bahrau paglaong saong pamaong tal palei pala bahrau kiểu mẫu daok ba mai siam lagaih ka xã Thới Hưng jeng yau ka huyện Cờ Đỏ. Bruk salih barau khang dalam padang ngak palei pala bahrau nan lac paglaong raidiuk, mbang ngui, daok dang di bhap bini, pamaong tal bruk urang nong kaya meda, palei pala siam mekre, hadah hadai./.