Dom harei puac adit di bilan 5, bhap bini nao tapa dom mbaik tatua tapa krong Hồng, Hà Nội jeng hu mboh dom baoh phao hu sambo màu kanjik katam saong mbong. Bruk caik phao daong caluai ia nan piah daong dom urang njauk mblung ia, dom menuac caong daong ka urang mblung ia hu pandap piah daong urang. Bruk caik phao mboh biak lagaih, gheih mekre, kajap oh laik suak tuk hu hajan ribuk, khik salamat ka menuac saong radaih nao mai angaok tatua, min mbuan talaih tuk hu bruk drah samar. Ini lac bruk ngak hu makna di Kalup kapol caluai ia Khám Phá peih ngak danak dak caik 400 phao caluai ia di dom tatua tapa krong Hồng di 10 tỉnh meng Lào cai tal Thái Bình. Bruk ngak ini pachreih hu bruk sangka saong pachreih tui di rilo bhap bini:

  “ Tuk hu dom baoh phao caluai ia yau nan, tuk khol drei nao tapa bo mboh urang mblung ia, khol drei oh thau caluai ia ye meda daong ka urang meng bruk katung phao trun piah daong dom urang khin pametai rup eng meda sahaneng veik saong caluai tame meng baoh phao. Phao nan meda daong ka rilo labik yau dom adei sit ma-in langiu kraong njauk mblung ia jeng meda daong ba tame gah hu salamat.”

Hadei di sa bilan ba tabiak ngak, Kalup kapol caluai ia Khám Phá pachreih hu labaih 50 urang halan tian tut angan tame, dalam nan hu 10 urang dang akaok. Kapol urang ngak bruk di dom harei puac adit, tui kuhria danak dak hu tamat di bilan 7 anak tal. Mbiah tal ini, Kalup kapol caik hu labaih 100 baoh phao di 4 tỉnh Lào Cai, Yên Bái, Tuyên Quang saong Hà Nội. Di ban ine, kapol hu tuan phao di 6 mbaik tatua. Yaom lac atah, yaok tatua hu caik meng 3 tal 5 phao. Jien blei kayua dom urang urang dalam kalup kapol caluai ia rik tame saong urang ngak pahala rik daong. Hà Cương, umo 24 thun daok di Lào Cai, tame Kalup kapol caluai ia Khám phá meng bilan 2 thun ini, biak pachreih tui bruk caik phao di tatua:

“ Drei kak biak mbuan talaih, urang pandar tok payeng talei thép, phao suak tabiak saong drei katung trun ia. Yaok baoh tatua drei kak takik abih 2 baoh, hu tatua 4 baoh, tatua 5 baoh. Tuk katung trun ia ye urang ala ia mboh phao, kuan phao caluai ia tame. Bruk nan biak gheih saong drei ngak brei pambak praong tal dom baoh tatua tapa kraong Hồng.”      

  Sa-ai Nguyễn Ngọc Khánh, Akok nyaom Kalup kapol caluai ia Khám Phá brei thau, ini lac sa dalam dom bruk ngak pahala di kapol nyaom saong angan ieu lac“ Hatai anit ranam krong Hồng”, dalam nan hu danak dak pato caluai ia brei saoh, ngak randap saong kraong ia, daong sơ cấp cứu tuk mblung ia ka anek saih saong caik phao di dom baoh tatua tapa krong Hồng lac tỉnh Lào Cai tal tỉnh Thái Bình.

“Khol dahlak caong lac, dalam 100 baoh phao khol dahlak caik ye 1 -2 baoh phao daong hu 1 urang ye mboh sambai hatai biak ralo ngan haong bruk ngak nan di kapol. Tapa danak dak, khol dahlak jeng caong khin lac yaok menuac urang caik hatai sahaneng hasit, thau lac nan dom baoh phao piah daong urang, pandar dalam bruk samar drah.”

Caong khin di sa-ai Nguyễn Ngọc Khánh saong dom urang di kalup kapol caluai ia Khám phá lac pato caluai ia ka taong abih bhap bini dalam negar piah patrun tal tanut biar di abih abih dom urang mblung ia ngak brei pandik harao tuk tame bilan padeih hè./.

Urang lang: Ai Nghiem -28/5/2022