Langik laik sup, 2 diuk pasang sa-ai Nguyễn Thị Thủy, urang ngak di Cty PouYuen (quận Bình Tân, TP.HCM) samar rami ramik pandap pablei piah mai bilik trọ, caga lisei ia ka pasang likei nao ngak melam. Yaom lac oh daok dalam angan jaik 2.400 urang ngak brei padeih ngak, min kayua oh hu pandap ngak, sa-ai Thủy jeng daok salih gauk padeih. Sa-ai Thủy brei thau: meteh bilan tapa, sa-ai oh ka hu nao ngak saong hu Cty daong 180.000 đồng sa harei. Daok pasang likei di sa-ai Thủy lac urang ngak ép đế takhaok, yaok bilan ngak 20 harei min. Piah hu ginup jien mbang cai, dua diuk pasang nao palei di An Giang, ba ikan pandam, mesin…. tagok pablei. "Meyah padeih lavik yau ini, eik biak ye. Pavil oh truh! Sa bilan jien bac, jien mbang, jien pah bilik daok lac jaik 10 triệu. Bilan halei jeng abih yau nan”

Bruk ngak oh tani tanat, trun mon ngak, lahik jien mek tame … lac bruk di rilo urang ngak di dom tỉnh Bình Dương, Đồng Nai, TP.HCM. Rilo urang daok sahneng, njauk daok veik cang bruk atau nao veik palei.

Tui pasang iek di Viện Roh duah raidiuk rahra hu ba tabiak brei thau di bilan 3, dalam 1.200 urang ngak daok ngak bruk di TP.HCM, Đồng Nai saong Bình Dương, hu 83,3% daok ngak bruk saong 16,7% nao veik palei piah ngak bruk jaik sang.

Lac sa dalam yaok rabau urang ngak daok ranaih nao klaak ban raya hadei di rilo thun glaih glar ngak bruk duah jien di TP.HCM, urak ini, sa-ai Nguyễn Thị Lan, umo 30 thun, palei daok di Vĩnh Long mboh njauk hatai haong bruk nao veik palei di drei. Oh daok pah labik daok trọ haong yaom pandap mbang chit, oh daok glaih glar haong thur mur, gar radaih, gar jalan, hadei di mon ngak bruk, sa-ai hu pataom gauk tapen salao lisei dalam sang. Saai Lan brei thau, ngak bruk di Vĩnh Long hu kuhria yaom jien bilan tối thiểu bhum 2, jien bilan cơ bản di urang ngak tok biar jang labaih 1 triệu đồng duk haong TP.HCM. Di palei daok hu labik laneng, lahơi, raidiuk bingi sahnang jang biak rilo: “Di mala ini jeng hu labik ngak kong, urak ini jien bilan tagok bhum 2 paje, nan ye glaong – biar jang gauk oh hadom, bo daok hu daok di sang. Jien mbang huak, nao mai jeng lap, baoh kayau dalam bein, mbang hadom jeng hu. Meyah taring tăng ca ye jien bilan hu tuk hu labaih 10 triệu đồng sa bilan, daok bhian di nyu, hu 9 - 10 triệu đồng sa bilan”. 

Bruk ngak oh kan duah, bo daok hu daok jaik adei sa-ai, gauk gar, patak pataom hu jien mbang cai … lac makna ngak ka rilo urang ngak hu hatai caong khin mai palei ngak bruk suai lavik. Kayua yau nan ye, rilo doanh nghiệp “tui” urang ngak nao palei meng bruk peih praong labik ngak tabiak dom tỉnh. Yau ye Cty Menyim Jhik Thành Công di labik nghak kong Tân Bình (TP.HCM) urak ini jeng hu sang mac di Tây Ninh, Vĩnh Long.              

Ong Nguyễn Hữu Tuấn, Yam ndok nhân sự Cty Thành Công brei thau: Di Vĩnh Long, jien bilan di urang ngak takik jang 20% duk saong di TP.HCM min urang ngak meda labaih hu jien, kayua labik daok trọ yaok bilan abih 4 – 5 ratuh rabau min, lap jang ban raya meng 3 tal 4 mbang. Meyah hu sang, rilo menuac daok duah hu jien meng hamu, puh. Ong Tuấn lac: “Bruk ba sang mac nao dom tỉnh piah jien sahui lap jang lac jalan daok pamaong tal. Jalan mbak, hạ tầng jeng hu Rajaei ngak dak harei dak siam jang, dom jalan cao tốc hu peih rilo tagok, meng nan, jien sahui haong tukvak pajeng ba jeng samar. Kol dahlak oh ka peih di labik atah rilo, bahrau peih sang mac daok jaik ini, yau ye Tây Ninh, Vĩnh Long. Min anak tal meda peih praong jang, atah jang”

Jeng meng jalan ngak ini, Cty TNHH Furukawa Automotive Parts Viet Nam (daok di labik chế xuất Tân Thuận, Quận 7, TP.HCM), hadei di 1 thun ba sang mac camereip abih tame ngak hu kein laba di labik ngak kong Bình Minh (Vĩnh Long) ngan haong 2.000 urang ngak, dalam bilan 4 meng blaoh, doanh nghiệp daok ba sang mac ka 2 tame ngak. Tal urak ini, doanh nghiệp hu pilih ruah saong pato pakai hu jaik 2.000 urang ngak, pabak hu bruk ngak di sang mac ka 2. 

Yaom lac oh ka jeng bruk praong, min bruk urang ngak klaak ban raya piah nao veik palei jeng daok rah tabiak. Oh labik halei samu palei negar, tuk urang mai veik duah hu sa bruk ngak siam, hu raidiuk tai tanat ye hu daong siam ka bruk cakrok KT-XH di palei drei. Bruk ini caik ka dom doanh nghiệp yaom halei jeng brei khik takai urang ngak, abih di nyu lac urang ngak hu ilamu glaong. Mboh lac, bruk ba sang mac, tui urang ngak nao palei di rilo doanh nghiệp dak harei dak bhian randap. Kayua yau nan ye, dom gah chức năng brei hu sarak rami ramik abih bruk gah bruk ngak, pato pakai paglaong tangin ngak bruk, piah ba jalan ngak mbang duah jien khang kajap ka urang ngak./.