Yaom lac hu mai veik sang min dom menuac njauk bala jeng daok mboh huac tuk khan brei thau veik bruk njauk urang pachot ba nao pablei, kateik greik ngak bruk, njauk taong paoh biak jhak. “Yaok harei kol nyu brei ka kol adei yaok urang 10 Facebook, drei ngak blaoh drei ba FaceBook di urang karei mai, ngak jeng Face Book di drei bloh nao ieu da-a, ngak dom jalan link ma-in mbia blaoh pachot, ieu urang tame me-in mbia. Nyu ba tabiak sản lượng, meyah oh hu menuac tame ma-in ye nyu taong meng talei ka-ing, brei huak lisei saoh, pacap ngak tăng ca, dang cambu pandiak.”

Tui Mintri Công an, meng puac thun 2023 tal urak ini, bruk pablei salih menuac mboh tagok jang, trak damak jang, kan thau jang. Njauk menyai nan lac, bruk pablei salih menuac di labik tapen negar Việt Nam- Campuchia, Việt Nam- Lào biak srau kadau. Dahlau daih, urang njauk bala rilo meng lac kamei saong uraniah, ye urak ini dom likei dam njauk bala pablei salih menuac dak harei dak rilo. Labik pablei salih menuac jeng hu rilo jang, tame nao gah dom tỉnh bhum kreh negar saong gah meraong. Thiếu tướng Phan Mạnh Trường, Phaok akaok Cục Cảnh sát điều tra tội phạm gah trật tự xã hội, Mintri Công an brei thau. “Mboh bruk pachot pagat bahrau lac mek ngak anek raong piah ba nao pablei. Kol pablei salih menuac dalam 6 bilan akaok thun 2024 mboh hu 39 bruk, meblah 0,1 % kol duas, min tagok 18,2% duk haong tukvak ini thun blaoh. Dalam taneh ia hu khởi tố 35 bruk, 104 urang ka duas ini.”

Kol pablei salih menuac nyu pandar công nghệ glaong piah pachot, piah dui pachreih urang tapa mạng xã hội, dom tài khoản ảo, meng bruk kết bạn, ngak krein, ngak randap, ngak payo, pagul sanya ba tabiak negar langiu ngak bruk hu jien bilan glaong, tok pasang negar langiu kaya mada... Hadei di nan, kol nyu duah jalan ba tapa negar, khik mek harak gar, hộ chiếu, oh ngak harak cư trú, kateik greik ngak bruk, kateik greik ngak kamei me-in, mek ngak diuk suan adat hukum. Đại tá Phạm Long Biên, Akaok Jabat Pacang caga pablei salih menuac, Cục Pacang caga ma túy saong tội phạm, Bộ đội Biên phòng brei thau, kol pablei salih menuac ngak ka urang njauk bala gaok rilo kan kandah, trak damak. “Taong abih dom menuac njauk bala pablei salih menuac jeng njauk kateik greik ngak bruk, kateik greik ndih daok, mek ngak diuk. Tuk hu mai veik, rilo menuac njauk sang chấn tâm lý, mboh hagait jeng huac. Kayua urang gaok rilo bruk biak pandik harao, Tuk urang mai veik Việt Nam ye bruk ba drei tame veik haong puk palei lac bruk biak kan kandah. Kayua hu menuac njauk buh tabiak pok jien laoh biak praong. kayua anit ka anek, hu urang padang sang piah hu jien laoh anek mai.”

Tapa tacei pato dom bruk, dom chuyên án, cap mek kol pablei salih menuac, Đại tá Nguyễn Văn Hiệp, Phaok akaok Cục pacang caga ma túy saong tội phạm, Bộ đội Biên phòng kakei lac. “Taong abih kol drei meda jeng urang njauk bala di kol pablei salih menuac. Kayua nyu tabiak meng bruk pachot pagat di kol bleik saleik, pagam pambak tame hatai hawa di drei, hatai sahneng oh ka tal di dom menuac urang. Bruk ngak hanjul, jien bilan glaong, suraga di palei negar urang. Nan ye yaok rahra brei paglaong hatai sahneng kuhria. Oh hu bruk ngak halei hanjul bo hu jien bilan glaong. Brei tari taring dalam raidiuk, kol drei brei ngak bruk saong anit ranam puk paga, palei negar drei. Palei negar lac labik drei kak kajap, oh hu labik halei lac suraga.”

Pablei salih menuac lac sa dalam dom duas praong jhak khang tal quyền anek menuac. Yaom lac dom gah chức năng hu patagok dom jalan pacang caga, min dom menuac njauk bala kol pablei salih menuac jeng daok hu rilo. Piah plaih njauk dak “bruk ngak hanul, jien bilan glaong”, yaok urang kol drei brei paglaong hatai sangka anak bruk pachot pagat di kol bleik saleik, saong brei khan ka gauk gar di drei thau piah paglaong hatai sangka./.