Kết cấu hạ tầng dak harei dak hu ngak pasiam, daong ka mbaok meta bhum bhap bini bangsa takik dak harei dak hadah hadai jang saong daong palagaih ka bhap bini cakrok bruk ngak mbang kinh tế, hu jien mek tame rilo jang, tani tanat raidiuk. Kadha vak di urang vak Thạch Hồng:

Jalan palei di ấp Sóc Bưng, xã Thạnh Phú, huyện Mỹ Xuyên hu padang ngak meng bê tông, atah jaik 500m, praongg 3m, hu ba tame pandar meng puac thun 2022, hu daong ka yaok ratuh sang urang bangsa Khmer nao mai mbuan lagaih. Ong Lý Văn Nâu, daok di ấp Sóc Bưng chreih chrai khan lac: " Tuk oh ka ngak jalan ini mikva nao mai biak kan kandah, jalan nerak tachauk, gluh baok, nao mai, pablei salih oh hu. Urak ini hu jalan blaoh, urang blei salih tame tal hamu, tal puh piah blei, anek kamuan nao bac mbuan lagaih, kol dahlak biak thau dar phor Đảng, Karja hu padang ngak jalan ini".

Langiu di ngak jalan palei, thun blaoh, darak xã Thạnh Phú hu padang bahrau saong yaom jien abih labaih 1 tỷ đồng piah salih ka darak klak khut, mbaih mbaoh, daong ka mikva urang blei salih saong rahra hu mbuan lagaih dalam bruk pablei salih pandap panda. Ong Phú Việt Bền, Phaok Chủ tịch UBND xã Thạnh Phú brei thau, xã hu labaih 57% menuac sia lac  urang bangsa Khmer, meng hu padang ngak jalan mbak, raidiuk mikva hu rilo salih bahrau.

 “Mikva dalam xã hu mbang tui danak dak ini biak uan tabuan. Karja palei jeng hu pathau khan, jak ba mikva kham merat patagok dom jak jeng, kham merat khik ramik labik hu padang ngak blaoh piah pandar hu suai lavik. Anak tal, palei jeng biak caong hu bruk sangka veik di danak dak jeng yau di karja drei piah duh ka mikva dalam bruk pala drak, pablei salih, paglaong raidiuk jang ka mikva".

Puac thun blaoh, labaih 200 sang bhap bini di xã Liêu Tú, huyện Trần Đề biak chreih chrai tuk tatua Ta Ốc atah 20m, praong 3,4m, ngak abih 1,3 tỷ đồng hu ba tame pandar. Ong Tăng Rô Qui Sa, sa urang daok dalam xã ini khan lac, dahlau daih, mbaik tatua klak tok praong 1m kayua rahra ba gauk rik jien tame ngak, kayua sit lo nan ye uranaih nao bac di bilan hajan rilo mbang gaok bala, mikva pajeng ba pandap ngak nong jeng gaok kan kandah. Meng tuk ngak salah tatua Ta Ốc, bhap bini hu jalan lagaih piah patagok bruk ngak mbang, kinh tế: "Hadei di tuk karja buh jien ngak tatua praong labaih 3m ini, mikva uan tabuan lo kayua nyu lagaih ka mikva saong anek kamuan nao bac. Labaih 200 sang bhap bini bhian nao mai mbaik tatua ini nan ye mikva uan tabuan lo".

Danak dak bruk ngak negar patagok KTXH bhum bhap bini bangsa takik lac sarak njauk di Đảng, Karja. Danak dak pataom veik 118 sarak saong 10 danak dak, 14 danak dak sit, 36 asal kadha binah sit, dalam nan hu rilo sarak pataom tame padang ngak cơ sở hạ tầng duh ka bruk pala drak saong raidiuk bhum bhap bini bangsa takik.

Ong Trần Khắc Trung, Phaok akaok  Mban Bangsa tỉnh Sóc Trăng brei thau, tỉnh hu labaih 35% lac bhap bini bangsa takik, dalam nan, labaih 30% lac bangsa Khmer. Danak dak hu daong pasiam kết cấu hạ tầng puk palei, peih tabiak jalan lagaih ka bhap bini bangsa takik dalam tỉnh cakrok bruk ngak mbang, pala drak, pasiam bruk ngak mbang duah jien, paglaong raidiuk ka bhap bini bhum bangsa takik, dalam nan hu bhap bini bangsa Khmer.

Meng thun 2021 tal thun 2023, abih tih phun jien buh tame ngak cơ sở hạ tầng hu parabha brei ka tỉnh lac labaih 267 tỷ đồng, dalam nan kadung jien Trung ương lac labaih 236 tỷ đồng. Kuhria tal harei ini, tỉnh hu buh jien tame ngak bahrau 113 danak dak, jalan palei, hạ tầng labik darak pasar, sang ilamu bhap bini…, ngak pasiam veik 50 danak dak cơ sở hạ tầng bhum bhap bini bangsa takik biak kan kandah. Ong Trần Khắc Trung daok brei thau lac:  "Piah pandar hu siam phun jien padang ngak cơ sở hạ tầng ye tỉnh daok pataom tame ngak tui jalan ba tabiak dalam vaktu 2021-2025, abih di nyu lac bruk patagok saong paglaong kein laba bruk pablak dom phun jien meng danak dak bruk ngak negar patagok KTXH bhum bhap bini bangsa takik saong dom danak dak bruk ngak negar ka padang ngak puk palei bahrau, patrun kathaot khang kajap, dom danak dak sarak pambuak tal hu peih ngak dalam tỉnh, abih di nyu lac bruk ieu pataom hu kein laba prein khang dalam rahra".

Tỉnh Sóc Trăng ba tabiak bruk lac tal thun 2025, ngak hu salah bruk padang ngak dom hạ tầng KTXH bhum bhap bini bangsa takik piah pabak bruk cakrok KTXH, paglaong raidiuk di bhap bini bangsa takik, jeng yau bhap bini bangsa Khmer./.