Dam dara palei pala hu pandar ilamu ky thuat tame bruk pala drak 

Hadei di 3 thun rong bao, saai Huỳnh Ngọc Hội daok di palei 10, xã Ea Bar, huyện Buôn Đôn, tỉnh Đắk Lắk hu labik pablei tani tanat. Jaik sa thun mai ini, saai Hội peih prong danao rong meng 350 m2 tagok 2.000 m2. Tui kuhria yaok bilan, saai pablei tabiak meng  20 tal  30 ribau drei bao pajaih  yaom  300 đồng yaok drei, song 4 bilan sa mbang pablei labaih 1 tấn bao yaom 65 ribau đồng sa kg.

Saai Hội jeng hu padang tabiak song dang akaok Kapul pambuak bruk dam dara rong bao huyện Buôn Đôn hu  25 urang. Gam haong tacei pato ilamu kỹ thuật, pabak anek pajaih ka urang dalam kapul, saai Hội daok blei veik bao song ngak tabiak dom pandap meng bao piah paglong chất lượng song yaom di pandap. Dalam tuk peih bruk ngak mbang, saai hu huyện đoàn dong ginup abih:

Huyện đoàn hu dong jhul patagok song piah ka adei saai pataom tame patagok song yaih khan drei hong dom labik blei, dong phun jien atau harak gar  piah pandap nao hu siam jang. Meng nan, dom bruk di drei hu cakrok, hu pambak praong, kol dahlak dok hu ngak pandap liar, piah blei veik pandap ka mik va hu tani tanat jang , pandap hu yaom glong jang.

Tui saai Nguyễn Quang Trung, Bí thư huyện đoàn Buôn Đôn, piah palagaih ka dam dara palei pala padang mbang ngui , kapul hu dong ka dam dara hu mesraiy phun jien yaom laba lap, padang dom kalup kapul ngak  kinh tế, kapul  kinh tế, kapul rik pataom phun jien. Tal urak ni, dom pakat  bộ đoàn huyện Buôn Đôn dok khik ramik jiak 67 tỷ đồng phun jien brei mesraiy. Hu 33 urang song bruk ngak taduan hu phun jien padang mbang ngui meng kadung jien pakat negar  dong duah bruk ngak  song dom kadung jien karja palei. Huyện jeng iek prong bruk padang ngak song patagok dom mô hình điểm, bruk ngak bahrau hu kein laba kinh tế piah pambak prong dalam dam dara. Meng hu yau nan, dalam 3 thun mai ini, bruk padang mbang ngui di  Buôn Đôn hu rilo hadah hadai saong prong dam jang, pabak hu hatai cong khin di dam dara.

Kol dahlak daok ba tabiak jalan ngak song samar khan brei urang đoàn dam dara dalam  huyện thau hu dom khaw tin pambuak tal dom sarak jalan ngak di  tỉnh. Palih ruah dom menuac urang bahrau  song hu pandap lagaih  song jalan ba tabiak dalam bruk patagok  kinh tế di puk palei, piah tacei pato, dong ka dom ayut ngak pasiam.      

Saai  Y Lê Pas Tơr, Phó Bí thư thường trực Tỉnh Đoàn, Akaok  Hội Liên hiệp dam dara  Việt Nam tỉnh Đắk Lắk tong yaom, dalam  4 thun mai ini, bruk padang mbang ngui, peih bruk ngak mbang dalam dam dara di  Đắk Lắk dak harei dak tagok song hu rilo hadah hadai. Dom dam dara padang mbang ngui jak jeng hu ngak brei pambak tabiak, pachreih ba dom dam dara karei hu hatai cong khin yam tagok. Urak ni, dom kapul dam dara dok pambuak bruk song dom mban, ngành piah ba mbuan lagaih, dong ka dam dara padang mbang ngui. Abih di nyu, yaom lac rah tapa dom kan kandah di jit ruak, min dom bruk ngak bahrau, jalan ngak gheih jeng dok hu dom ayut ranaih umo duah thau, pambuak pagam hong gauk piah jhul patagok bruk padang mbang ngui di yaok menuac urang.

Meng bruk dong di karja  song dom kapul nyaom, rilo dam dara di Đắk Lắk  khang hatai yam tapa dom kan kandah piah peih bruk ngak mbang, padang mbang ngui. Meng nan, ngak jeng pren khang piah pambak prong bruk ngak, patagok hu kein laba di yaok bruk  padang mbang ngui di dam dara./.

Urang lang: Hanipha- 14/4