Bhian lac baoh sang kan kandah dalam xa, sang ong Ayua Nha Phương, bangsa Bru-Vân Kiều, daok di puk Sing A, xã Ea Drông, ban sit Buôn Hồ yam tagok tabiak truh kan kathaot meng thun 2017. Meng jien mek tame tani tanat labaih 200 triệu đồng yaok thun, ong padang hu sang praong, siam.

Ong Ayua Nha Phương brei thau, bruk bac bruk ngak nong saong pasram ilamo pala phun, raong glang di puk Buôn Hồ jeng hu peih pato gam gam, oh mek jien, daong ka mikva paglaong ilamo ngak mbang, pala drak, ong haong mikva dalam puk Sing A jeng kham marat hu mbaok tame dom tal pasram ini:  “Dom urang buh jien tame ngak mbang, urang peih pato pasram, tacei mikva jalan sangka phun pala, athur raong, bruk padang HTX raong pabe, raong pabui, raong limo. Brei masaiy phun ngak mbang, pala drak, daong phun pajaih, athur raong, pato pakai ilamo. Nan lac dom bruk ngak cambaih piah ka mikva saong sang di drei tabiak truh eik lipa, patrun kan kathaot, cak rok patagok dak harei dak siam jang”.

Urang taha palei Y Khuê Ayun, bangsa Ê Đê, daok di puk Kwang A, xã Cư Bao, ban sit Buôn Hồ brei thau: dom sarak daong pabak taneh daok, taneh ngak mbang, pala drak, pato pakai bruk ngak hu ba mai dom siam lagaih, salih mbaok mata puk palei. Puk Kwang A urak ini hu 210 baoh sang haong jaik 1.000 urang, ye hu jaik 100 sang ngak mbang hu, tok daok 3 sang kathaot. Jien mek tame di dom baoh sang jeng tani tanat saong glaong jang dahlau, rilo sang hu jien mek tame labaih 2 – 3 tỷ đồng yaok thun. Jeng tui panuac di taha palei Y Khuê, kinh te cak rok, rahra hu jien padang ngak sang danaok, blei pandap panda, rik jien tame padang ngak jalan mbak puk palei, kham marat haong kanja padang ngak palei pala bahrau.

 “Ngak jalan palei pala bahrau urak ini hu 80%, pataom mek nerak biak siam, puh ramik ngak hacih saat yaok adit, yaok bilan. Jalan palei hu gom truac hadah. Caik hatai khik tani tanat gah an ninh chinh tri saong quoc phong, jum pataom dom agama, cak hatai sangka tal dom sarak ka urang hu prein haong cach mang, sang kathaot, sang jaik kathaot hu masaiy jien laba lap piah cak rok patagok bruk ngak mbang dalam sang. Dahlak biak uan tabuan saong hadah mbaok mata”.

Meng thun 2019 tal urak ini, tapa dom danak dak bruk ngak negar, ban sit Buôn Hồ hu daong labaih 43.000m2 taneh daok, 214 bồn caik ia ka sang kathaot. Peih 29 mbang langyah, mayaih khan bruk ngak, ba urang ngak nao ngak bruk di negar langiu; peih 27 tal pato bruk ngak; dui pachreih hu yaok rituh urang bangsa takik hu mbaok tame.  

Ong Y Cing Mlô, Phó akaok UBND ban sit Buôn Hồ brei thau lac, palei daok kham marat jeng đô thị pakat III di thun 2025, jeng labik patagok pasak bhum sit gah barak tỉnh Đắk Lắk di thun 2050.

“Langiu dom prein khang di Trung ương, tỉnh tui dom Danak dak bruk ngak negar ye ban sit jeng brei ngak dahlau saong rami ramik dom prein khang buh jien tame ngak kết cấu hạ tầng di dom bhum bangsa takik. Ini lac sa asal kadha salih bharau khang, biak hu yaom piah paglaong raidiuk di rahra, piah ngak habar ka raidiuk di mikva di puk palei, abih di nyu nan lac rahra daok di bhum bangsa takik hu jaik jang haong raidiuk di rahra dalam ban. Meng nan, ngak patrun bruk atah di gauk haong dom bhum karei”.

Dom sarak bangsa daok hu peih ngak hu daong ngak brei salih bahrau mbaok mata puk palei, pasiam raidiuk rahra daok di ban sit Buôn Hồ, tỉnh Đắk Lắk. Tapa nan, ngak brei pakhang pakajap bruk jumpataom dom bangsa, pachreih yaok rahra oh padeih yam tagok, ba tame padang puk palei kaya mada, khang kadang, rik daong padang ngak ban sit “kaya mada, siam makre, hadah hadai, bak hatai anit ranam”./.