Pasang iek tani tanat yaok baoh panyin, yaok baoh jaluk caik ia ka menuk menyum dalam bein, blaoh pakhuak trun piah plaih ia kandaong veik, sa-ai H’Dung M’Lô, daok di palei Cư Mlan, xã Pơng Đrang, huyện Krông Búk brei thau, ini lac jalan ngak bo urang jakar y tế xã tacei pato piah pacang caga pandiak tabiak darah. Sa-ai H’Dung khan lac, sang sa-ai oh ka hu urang njauk ruak pandiak tabiak darah, min dalam palei saong dalam xã hu urang njauk ruak ini, nan ye sa-ai huac ralo: “Mban khik iek palei saong gah y tế khan angaok loa nan ye drei thau lac ruak pandiak tabiak darah tabiak meng jamaok, nan ye dahlak daok pametai  lăng quăng, dahlau di abih drei brei rami ramik pandap caik ia saong puh ramik hacih sa-at hareik hareim piah ka lăng quăng oh hu labik caih, mebaoh.”

Tui Bác sĩ Huỳnh Duy Hùng – akaok bilai Y tế xã Pơng Drang, huyện Krông Búk, xã lac 1 dalam 2 labik hu dom menuac njauk ruak pandiak tabiak darah glaong abih di huyện, nan ye bruk pacang caga ruak pandiak tabiak darah daok hu gah y tế saong karja palei kham merat peih ngak:“Bilai jeng hu panuac daong ka UB xã patabiak rilo harak ieu puh ramik haci hacih. Meyah labik halei hu sruh jit jeng hu panuac ieu Pasak y tế likau jru hóa chất saong dom mac jamraik piah pruh dom sruh jit ruak.”

Ban Buôn Ma Thuột lac labik hu urang njauk ruak pandiak tabiak darah glaong abih di Đắk Lắk, lac 85 urang, rilo jang 4 mbang duk haong dom bilan ini thun blaoh. Tui kuhria mboh dahlau, urang njauk ruak pandiak tabiak darah daok tagok rilo saong tamuh tabiak praong meyah oh ngak khang dom jalan pacang caga meng di tuk akaok bilan jit. Ong Võ Minh Hùng, Yam ndok Pasak y tế ban Buôn Ma Thuột lac: “Ruak pandiak tabiak darah tal tukvak ini kol drei daok pasang iek hu, min anak tal langik oh lagaih, hajan rilo, nan ye kol dahlak daok patagok bruk pathau khan ka bhap bini ngak siam bruk puh ramik haci hacih piah pacang caga jit ruak”.

Meng akaok thun tal harei 26/6, Đắk Lắk hu labaih 460 urang njauk ruak pandiak tabiak darah, hu 13 sruh jit. Dalam nan, meng bilan 6 tal urak ini hu jaik 300 urang. Piah pacang caga pandiak tabiak darah, Pasak pasang iek ruak kik tỉnh hu tacei pato dom gah di pasak, patagok bruk pasang iek véc tơ, tui iek catang, samar mboh, langyah khang sruh jit piah patrun patakik njaom mbak dalam bhap bini. Gam haong nan, jhul khang bruk pathau khan, jak ba bhap bini ngak dom jalan khik caga hacih sa-at, pametai jamaok, lăng quăng pacang caga pandiak tabiak darah di sang saong dalam puk palei. Ong Hoàng Hải Phúc, Phaok Yam ndok phụ trách Pasak pasang iek ruak kik tỉnh brei thau: “Kol dahlak daok ba tabiak bilan ngak di Asean ka pacang caga pandiak tabiak darah, kol dahlak hu harak tacei pato taong abih dom pasak y tế huyện piah peih ngak samu gauk. Dalam nan, pataom tame pathau khan di mangaok dom janih thông tin đại chúng; pambuak haong karja palei, abih di nyu lac puk, palei piah peih bruk pametai loăng quăng bọ gậy di jhung adit.”

Bilan hajan lac tukvak jit ruak pandiak tabiak darah tagok rilo. Gam haong nan, labik daok oh hacih sa-at, bruk bhian randap caik ia dalam pakaong, jeik, thung oh pacang sre… lac labik lagaih ka jamaok saong lăng quăng tamuh tabiak. Piah pacang caga ruak pandiak tabiak darah pambak praong, langiu bruk kham merat di gah y tế, ye bruk ngak di karja palei saong di bol bhap rahra, lac paga pacang khang, jhul kadun likuk jit ruak ini./.