Mbang ka 3 ba anek sit nao tal Bilai y tế klauk vắc xin 5 dalam 1, min saai H’cuôn Ksor, xã Krông Jing, huyện Mdrak jeng njauk mai sang gilac veik kayua ka oh hu vắc xin. Saai H’cuôn brei thau, saai hu pang khau tin di mangaok rayo, mangaok báo hu thau lac jaik di ini hu rilo janih jit ruak daok tamuh tabiak, min tuk ba anek nao klauk jru ye oh hu vắc xin nan ye saai biak haduh hatai:“Anek dahlak praong 4 bilan bo ka oh hu klauk vắc xin 5 dalam 1. Urak ini dahlak ba nao klauk piah pacang caga ruak kik jeng oh hu vắc xin. Dahlak caong samar drah hu vắc xin piah klauk ka anek di drei.”

Saai H’Yên Niê, Akaok Bilai y tế xã Krông Jing, huyện Mdrak brei thau lac, urak ini dalam xã hu labaih 220 kamuan mangaok 2 bilan njauk klauk vắcxin 5 dalam 1 min ka oh hu klauk. Tui saai H’Yên, bruk kurang vắc xin dui atah ngak khat lahik ka uranaih, bo daok ngak ngak kan kandah ka bruk jak ba rahra ba anek nao klauk jru hadei di ini:“Urak ini bruk kurang vắc xin lac biak rilo, abih di nyu nan lac vắc xin 5 dalam 1 meng labaih 6 bilan blaoh oh hu vắc xin, langiu di nan lac sởi mbang 1, blaoh vắc xin DPT jeng oh hu piah klauk ka dom kamuan. Dak harei dak kan kandah dalam bruk pathau khan ka dom amaik mai klauk jru. Urang mai mbang 1 oh hu, mbang 2 oh hu, mbang 3 oh hu ye harei hadei drei pathau khan jak ba urang mai klauk jru lac biak kan kandah.”

Bruk kurang vắc xin klauk caga ka uranaih lac bruk daok rahtabiak dalam tỉnh Đắk Lắk. Tui ong Võ Minh Hùng, Yam ndok Pasak y tế ban Buôn Ma Thuột, meng akaok thun tal urak ini, ban abih vắc xin DPT, daok vắc xin 5 dalam 1 bahrau hu pabak sa mbang di bilan 1 ngan haong 368 mbang, dalam tuk yaok thun ban caong hu meng 15 tal 18 ribau mbang vắc xin 5 trong 1.“Tal tukvak ini uranaih umo mala 1 thun klauk ginup 8 mbang vắc xin di dalam ban kol dahlak bahrau hu 30%, yau nan ye jeng daok bier dut saong jalan ba tabiak dalam thun lac 98%. Dalam tukvak anak tal, likau pabak samar drah vắc xin 5 dalam 1 saong vắc xin dalam danak dak klauk jru peih praong pakat negar piah jhul samar bruk klauk jru ka uranaih”

Dalam 12 janih, nyaom vắc xin di danak dak klauk jru peih praong ka uranaih dalam thun ini Đắk Lắk bahrau hu ginup 2 janih vắc xin bại liệt saong uốn ván, 2 janih vắc xin lac “5 dalam 1” saong DPT abih paje, daok ginup klauk ka uranaih tal abih bilan 8.

Tui ong Lê Phúc, Phó yam ndok Pasak pasang iek ruak kik tỉnh Đắk Lắk, makna di bruk kurang vắc xin lac kayua meng thun ini tuk salih danak dak bruk ngak y tế rahra jeng bruk ngak gam gam ka dom tinh, ban. Min, di anak mata bruk payua kadung jien kanja piah ka tinh, ban blei vắc xin daok hu dom tavak tavaiy ka yaom kaom, to yaom. Urak ini Pasak pasang iek rua kik tỉnh hu yaok pataom dom vắc xin caong hu piah pathau khan tagok pakat angaok brei phun jien piah blei. Ong Lê Phúc brei thau:“Piah ngak jeng bruk pacang caga ruak kik hu siam dalam rahra ye njauk patagok bruk klauk jru saonga njauk ngak yau habar piah klauk ginup ye tuk nan prein pacang caga ruak kik meda hu tani tanat saong khik hu biak siam. Min nyu hahuan dalam tukvak katut panak, mayah hu vắc xin ye peih bruk klauk ka nyu ginup ka uranaih. Kol dahlak huac di abih lac dom uranaih ka oh hu klauk mbang halei, urak ini kurang vắc xin ye cambaih laih nyu ngak kan kandah tal prein yava di uranaih.”

Tui dom chuyên gia y tế, kurang vắc xin meda ngak kan kandah biak trak damak tal dom jak jeng di danak dak klauk jru peih praong. Gilaong huan pacang caga ruak meda tamuh tabiak tuk uranaih oh hu klauk jru pacang caga ruak ginup, njauk tukvak ba tabiak, bruk ini meda mbuan ngak brei tamuh tabiak jit ruak gilac veik./.