Xã Xuân Phú, huyện Xuân Lộc lac labik praong, hu tal 12 bangsa daok  haong gauk. Dom thun tapa, gam haong bruk  ngak brei palei pala jeng đô thị, ye bruk tội phạm, bruk siam mekre salamat puk palei jeng hu rilo srau kadau. Pachreih tui bruk abih bhap bini pakacah gauk khik caga sron mbon puk paga, palei negar, dak padang raidiuk ilamu di labik daok, puac thun 2011, kapul urang kumei khik caga puk palei bhum bangsa di Xuân Phú hu padang tagok.

Meng di tuk bahrau padang tagok, hu tal 15 adei sa-ai kumei tut angan tame kapul. Dom urang dalam kapul hu rilo bangsa karei di gauk, min rilo abih lac urang bangsa Chơ ro. Tuk camereip bahrau tame bruk ngak, kapul gaok rilo kan kandah kayua oh ka hu bhap bini jia tame. Yau nan min, hadei di sa tukvak katut panak, dom adei sa-ai kumei padang hu hatai jia saong iek praong di mikva tapa dom bruk bo adei sa-ai ngak brei ka mikva. Amuk Trương Thị Ngọc Hạnh – Akaok kapul urang kumei xã Xuân Phú – akaok kapul urang kumei khik caga puk palei bhum bangsa xã Xuân Phú brei thau: "Bruk di kapul urang kumei dahlau di abih lac pacang caga kol tội phạm. Dalam tuk ngak bruk, kol dahlak hulin nao pasang iek, duah thau bruk  an ninh trật tự dalam xã, pathau khan adat hukum ka mikva thau, abih di nyu lac mikva bhum bangsa; langyah dom bruk kandah gauk, meriak gauk dalam bhap bini, bruk taong paoh gauk dalam sang; ba jalan pasiam dom menuac khut, nao suan jalan, abih di nyu daok lac labik plaih nyaik, labik daok ka uraniah, ka urang kumei njauk taong paoh, njauk urang ngak pap,…"

Yaom lac raidiuk daok rilo kan kandah, bruk khik iek tuk melam biak glaih glar, mbuan gaok bala, min kayua bruk sron mbon salamat ka puk palei, dom sa-ai jeng kham merat yam tapa. Sa dalam dom urang abih drei ka bruk ngak, njauk ndom tal sa-ai Thị Mai, urang bangsa Chơ ro, daok di ấp Bình Hòa. Yaom lac dom anek daok sit, dua diuk pasang daok ngak mbang pah, min sa-ai Thị Mai jeng kham merat rami ramik bruk sang piah hu mbaok tame ngak siam bruk di kapul: “Dahlak hulin haong adei sa-ai kumei dalam kapul rami ramik siam mekre bruk di sang haong bruk di kapul, tuk halei jeng thau, jeng ngak siam bruk di drei. Meng dom bruk ngak siam, lagaih, lavik lavik harei, kapul urang kumei khik caga puk palei hu jeng labik pambak tame, labik caik hatai jia ka dom adei sa-ai kumei dalam xã, dom urang gaok bruk taong paoh dalam sang, tacei jalan brei thau dom bruk, dom kadha pambuak tal quyền saong kein laba njauk adat hukum di adei sa-ai kumei.”

Dalam luac 12 thun tapa, kapul urang kumei khik caga puk palei xã Xuân Phú tuk halei jeng ngak siam bruk pathau khan, jak ba mikva dalam palei ngak njauk tui dom sarak di Đảng, hukum di Karja; jak ba rahra tacei tabiak kol tội phạm, padang puk palei siam mekre, salamat. Dom sa-ai kumei daok hu khan brei Công an thau jaik 500 khau tin hu yaom, pambuak bruk haong Công an taong tayah dom labik me-in mbia, tram menuk, pagui mek rilo kol co klaik drap ar ... Kuhria tal harei ini, kapul urang kumei khik caga puk palei hu mbaok haong gah chức năng peih ngak 40 mbang nao khik iek tuk melam; pato pakai, ba jalan ka 3 likei dam khut jeng menuac siam, langyah rilo bruk kandah gauk dalam sang… Bruk glaih glar, oh sahneng hagait tal rup drei di dom sa-ai tuk halei jeng taduan hu bruk pok meyaom, anit ranam di karja saong mikva dalam palei. Thượng úy Nguyễn Thế Anh, Phaok Trưởng Công an xã Xuân Phú, Công an huyện Xuân Lộc brei thau: “Meng labik lac dom menuac dalam kapul ilo meng lac urang bangsa Chơro, nan ye urang thau cambaih adat cambat, tanarakun, thau sap ndom puac menyai di bhap bini, hu jalan pathau khan, jak ba lagaih nan ye hu daong ba jalan siam ka dom menuac nao suan jalan, langyah dom bruk kandah gauk dalam mikva bangsa biak mbuan lagaih, rik daong patrun patakik rilo bruk ngak brei srau kadau puk palei.”

Langiu di bruk khik ramik sron mbon puk palei, tukvak tapa, kapul urang kumei khik caga puk palei daok hu ngak siam dom bruk ngak pahala yau ye jak ba padang ngak baoh sang anit ranam, alin hadiah pandap, brei jien bac ka dom anek saih kan kathaot takre bac da-a, jak ba alin hadiah jien brei ka dom sang kan kathaot hu menuac ruak kik, metai lahik… Amuk Trương Thị Ngọc Hạnh khan lac: “Langiu di bruk pambuak gauk nao pasang iek, khik sron mbon puk palei ye dom adei sa-ai kumei dalam kapul daok ngak siam dom bruk daong ka raidiuk mikva. Meng jien patak pataom saong jien jak ba, kapul hu pambuak bruk haong kapul urang kumei xã peih ngak siam bruk daong dom urang kan kandah, uranaih metui, padang 4 baoh sang anit ranam…., haong yaom jien abih tih labaih 1 tỷ đồng,…”

Meda mboh lac, meng bruk tabiak rai di kapul urang kumei khik caga puk palei di xã Xuân Phú hu rik daong biak praong dalam bruk khik kajap siam mekre salamat puk palei di xã palei pala bahrau kiểu mẫu. Mboh hu bruk rik daong nan, Kapul hu Mintri Công an, Kapul urang kumei pakat negar Việt Nam, karja dom pakat alin hadiah rilo harak meyaom. Thun 2020, kapul urang kumei khik caga puk palei xã Xuân Phú hadah mbaok meta hu daok dalam top 6 dalam 196 điển hình tiêu biểu di taneh ia nao pataom mbaok di Nyaom biai pataom iek veik bruk abih bhap bini khik caga sron mbon puk paga palei negar hu peih tabiak di Hà Nội. Ini lac bruk hadah mbaok meta di abih urang dalam kapul kayua bruk ngak hu makna di dom adei sa-ai kumei hu pambak tabiak dalam bhap bini saong hu bhap bini dak harei dak anit ranam, caik hatai jia./.