Bruk kapul pambuak gauk pak yot kayua sa-ai Linh Thị Hoa, daok di palei 4, xã Mường Lai, huyện Lục Yên, tỉnh Yên Bái ngak po, meng lavik mai hu jeng labik brei ka rilo adei sa-ai kumei mai tal ini ba gauk ngak dom janih pandap ngak meng tangin hu ngak meng phun kreim, phun giang, ngak jeng muot, tamo, yot..., piah pandar saong piah ngak pandap alin. Bruk ngak ini hu daong pamedeih veik bruk ngak meng kan, bo daok ba jien tame tani tanat 200 rabau đồng sa harei ngak ka 6 urang ngak. Sa-ai Linh Thị Hoa brei thau: “Bruk ngak biak lagaih haong urang kumei praong thun kayua daok di palei oh ngak hagait hu, Cty oh hu, oh ngak hagait hu, tok hu mbon ceik haong hamu puh. Nan ye bruk ngak langiu ini, duah hu jien tani tanat”.

Meng dom bruk ngak cambaih laih, yaok thun, dom sang kathaot, sang jaik kathaot di Mường Lai trun meneing, rilo sang eng drei ngak harak likau tabiak truh angan baoh sang kathaot. Pagap yau sang ong Nông Văn Bường. Puac thun 2022, ong Bường khang hatai ngak harak likau tabiak truh angan baoh sang kathaot, blaoh dalam thun ini, ong nao mesraiy phun jien piah peih praong bruk raong pabui saong manuk ada:“dahlak likau tabiak truh angan baoh sang kathaot, meng thun ini dahlak kham merat ngak mbang”.

Amuk Hoàng Thị Hà, Phaok akaok UB bhap bini xã Mường Lai, huyện Lục Yên brei thau, dalam thun ini, xã meda nao tal palei pala bahrau, saong daok pamaong tal bruk ba dom sang kathaot trun daok mala 13%: “Xã pataom tame dom bruk ngak cambaih laih yau bruk pathau khan, jak ba dom sang bhap bini, pambuak bruk haong Gilang pariak sarak karja huyện piah brei ka mikva hu mesraiy phun jien yaom laba lap di rajaei piah ngak mbang, pambak praong dom bruk cakrok kinh tế yau ye dom kapul pambuak bruk ngak di xã, dom palei ngak saong dom bruk patagok kinh tế di dom kapul, nyaom, piah tagok jien duah hu saong patruh eik patrun kathaot khang kajap”.

Gam haong caik bruk đầu tư di Trung ương, di tỉnh, dom sarak an sinh xã hội, phun jien xã hội hóa saong jien daong di dom urang ngak pahla brei ka bruk patrun kathaot, mBan Thường vụ Tỉnh ủy Yên Bái hu tabiak sarak 61 “ka bruk patui jalan paglaong siam lagaih bruk patrun kathaot khang kajap vaktu 2021 – 2025, patui jalan tal thun 2030”. Dalam nan ba tabiak 5 bruk ngak saong jalan ngak praong lac: patagok bruk pan akaok, ba jalan di dom pakat ủy, karja, bruk ngak, labik dang di hệ thống chính trị saong bol bhap rahra, parilo jalan ngak mbang duah jien, daong patagok sản xuất, paglaong jien mek tame ka sang kathaot, sang jaik kathaot...

Ong Triệu Văn Huấn, Bí thư Đảng ủy xã Mường Lai, huyện Lục Yên brei thau: sarak 61 di Tỉnh ủy Yên Bái daok hu pakat ủy, karja xã peih tabiak ngak njauk tui. Di Đảng bộ xã Mường Lai, hu padang jalan ngak patrun kathaot ka yaok thun, meng nan hu jao bruk ngak cambaih laih, jalan ngak lagaih ka yaok urang:“jak ba bhap bini patagok glaong di abih prein khang di drei, oh cang maong, oh pagam pambak tame, saong bhian pachreih ba, daong dom sang dalam bruk pato bruk ngak saong ba nao ngak bruk; ba tabiak jalan daong ka bhap bini piah patagok dom bruk raong glang, cakrok ngak nong, pala glai, abih di nyu lac bhain nao ravang, iek, pachreih ba, daong dom sang kan kandah, ieu, jak ba xã hội hóa piah ngak sang daok, pasiam sang taik tahak ka urang kan kathaot”.

Tỉnh Yên Bái kham merat patrun baoh sang kathaot 5% sa thun tui tanut chuẩn kathaot rilo gah dalam vaktu 2020 - 2025. Meng bruk ba tangin tame di abih hệ thống chính trị, abih di nyu lac di puk palei, bruk daok pamaong tal ini daok hu ngak jaik blaoh, rik daong ngak hu bruk ba Yên Bái jeng tỉnh cakrok patagok di thun 2025./.