Di bhum taneh daok gaok rilo kan kandah di gah Pei tinh Gia Lai, hu sa urang kamei jakar hu ruah bruk peih mbang ngui biak karei: pamedeih bruk bhap bini piah peih mbang ngui ka urang dam dara di palei pala. Rơ Mah H’Dịu, Bi thu Ndoan xa Đức Cơ, hu peih “Palei ngak bruk pak gak bhap bini di dam dara” piah peih mbang ngui ka dam dara. Meng akaok meti jien mek tame kuhria rah tapa tok meng dom trieu ndong yaok bilan ka dom urang kapul ndoan hu mbaok tame, min kayua caong khin praong di palei ngak bruk dak harei dak rilo dam dara hu mbaok tame. Bruk ini pambuak saong gah ngak mbang pablei salih, hop tac xa piah pato pakai bruk ngak; dak padang bhum pandap tamo kreim; padang labik parang, parang iek bruk pak gak pagam haong bruk rivang me-in. Danak dak ndih tame top 40 danak dak naih gheih di Mbang pakacah Peih mbang ngui dam dara bhum palei. Rơ Mah H’Dịu brei thau:

“Ini ieu lac bruk daong prein praong piah drei patui tame bruk dalam harei hadei, rik daong prein dam dara di drei dalam mbang ngak bruk kong ndoan jeng yau patagok hatai di rairah dam dara  , dahlak sahaneng brei rik daong jang veik, kayua dom bruk ngak di drei jeng daok sit dut haong dom ayut dalam bhum”.

Meng hadei jit Covid-19, bruk peih mbang ngui pambak praong di tinh Gia Lai, brei daong prein piah rilo dam dara khang hatai peih mbang ngui di bhum palei. Dalam nan, sa-ai kamei Rơ Châm Awưnh, daok di mbon palei Mrong Yố, xa Ia Ly. Hu 70 trieu dong phun jien mesraiy gam haong jien patak pataom di baoh sang, sa-ai kamei Awưnh saong pasang tame peih bruk ngak nong huu co. Karei haong bruk ngak tui jalan bhap bini patui tame urang ikak kaiy, ndap nda ngak tabiak dak harei dak hu akaok tabiak tani tanat, ba mai siam lagaih kinh te cambaih laih. Hadei tukvak ngak iek saong mek hu ilamo, sa-ai Awưnh patui veik peih praong bruk ngak, pagam adei sa-ai kamei dalam mbon palei gam haong gauk ba drei tame ngak, dak harei dak ba kophi hacih sa-at di mbon palei hu tame darak pasar. Kreh thun 2024, sa-ai padang Kongti TNHH Ngak nong Jrai Ialy, padang ngak kophi tui jalan kandauk, pasang iek asar siam tui tanut Organic saong VietGAP. Ndap nda “Jrai Ialy Coffee” ba tabiak dak harei dak mek hu hatai je di urang blei pandar; tal bilan 12/2024, hu mbaoh tangin brei tanut OCOP 3 patuk pakat huyen, hu akaok tabiak tani tanat, peih tabiak jalan peih mbang ngui karo kajap.

“Urak ini dahlak hu daok masraiy jien piah blei jamraik piah ngak kophi hana. Meng phun jien ini dahlak hu patagok samar dalam jalan sahaneng di urang kamei jaman ini. Ye meda hadei ini brei pambuak veik haong dom adei sa-ai kamei ngak tui jalan ngak ini”.

Gah likuk dom bruk peih mbang ngui di dam dara dom bangsa takik tinh Gia Lai lac bruk daong gauk di dom kapul Ndoan saong sarak daong di Karja. Dalam tinh urak ini hu 932 kapul brei mesraiy jien tapa kenh Kapul Dam dara, daong labaih 40.000 baoh sang rahra mesraiy gam haong jien brei mesraiy labaih 2.300 ty dong. Langiu di nan, Tinh ndoan saong Mbang Pasang iek Kadung jien Dam dara Gia Lai peih mbang ngui hu brei mesraiy jien, daong rilo danak dak, daong tani tanat ka dom bruk kinh te dam dara bahrau. Sa-ai Đỗ Đức Thanh, Phaok Bi thu Thuong truc Tinh ndoan Gia Lai brei thau:

“Hu biak rilo urang dam dara kham merat uak drei tagok, daok di bhum palei, dalam nan hu roh duah saong duah thau, tut angan ka angan je jeng yau duah thau mai meng halei, ba mai ka urang blei pandar hu hatai je ngan haong dom ndap nda hu ngak rilo di bhum palei. Hu dom dam dara jeng hu duah bruk pambuak haong dom gah ngak mbang pablei salih, dom labik pabak, dom labik đầu mối piah duah akaok pablei tabiak ka ndap nda di drei saong tapa nan brei hatai je di angaok blah web meyao meyit pablei salih online jeng yau dalam hatai je di urang blei pandar”.

Meda mboh sa rairah dam dara dom bangsa takik di tinh Gia Lai dak harei dak daok salih jalan sahaneng, pablei salih, ngak tabiak. Tuk hu sarak piah ngak labik pambak tame, bruk daong di dom pakat gah, saong hu makna jang lac hu hatai je tame drei, jalan peih mbang ngui di mbon palei mbuon ceik glaong daok peih tabiak dom janih sambo bar that hadah saong ndung bak hatai caong takre./.