Dahlau di tuk pambak praong tabiak bruk ngak dalam bhum ĐBSCL, Mintri Ngak nong saong Patagok palei pala hu pilih ruah ngak iek danak dak di 5 labik lac Cần Thơ, Sóc Trăng, Kiên Giang, Đồng Tháp saong Trà Vinh. Bahrau ini, bruk ngak iek 50 ha hu ba tabiak ngak di HTX ngak nong saong dịch vụ Tiến Thuận, ban Cần Thơ ye mboh năng suất saong chất lượng jeng tagok, saong brei mboh bruk patrun tathuak nerak sang kreih camin meng 2 tal 6 tấn sa ha.

Ong Trịnh Văn Khôn, urang ngak nong daok di xã Trung An, huyện Cờ Đỏ, ban Cần Thơ brei thau, tapa dom tal pasram ka jalan ngak tui danak dak 1 triệu ha, rahra thau cambaih bruk pandar pajaih padai xác nhận, abih takik padai pajaih tuk tam darak, ngak tui jalan dauk – thu pablak gauk, khik iek jit ruak palai pajoa saong pataom mek pong nerang tui bruk ba tabiak. “Dahlak ngak dom pluh thun ini mai min dahlak mboh bruk ini biak siam, siam ka urang ngak nong. Tuk camereip drei brei pato pasram urang nong meng thau, meng ngak hu, daok meyah oh hu tal pato pasram ye urang ngak nong kan si ngak hu.”

Ong Trương Minh Hạn, Phaok akaok Kapul urang ngak nong xã Thạnh An, huyện Vĩnh Thạnh brei thau, palei peih ngak iek hu jak jeng danak dak 1 triệu ha padai chất lượng glaong di HTX ngak nong saong dịch vụ Tiến Thuận. Meng jak jeng di danak dak, lac jalan peih tabiak ka dom sang urang nong ba tabiak ngak rilo piah paglaong jien mek tame, patrun jien buh tame ngak, kadha praong lac peih bruk pambuak gauk di HTX haong doanh nghiệp pabak bruk ba tabiak dalam padang angan brah hacih. “Kapul urang ngak nong xã pambuak haong  Hợp tác xã Tiến Thuận ba tabiak ngak piah mikva drei hu mabaok tame haong mblang taneh ini, lac hadei di tuk yuak blaoh, pataom mek pong tame sang piah pala bimao, piah ka kol drei pabam mek khak piah buh veik ka taneh padai bilan thu đông thun ini.”

Piah ngak hu jak jeng danak dak, njauk ramik ngak veik gah padai brah tui jalan chuyên nghiệp saong padang dom HTX, kapul pambuak bruk haong doanh nghiệp meng blei tame tal pablei tabiak. Min bruk njauk caik hatai sangka dalam peih ngak danak dak lac rahra  brei thau cambaih jalan ngak “Abih hatai, Ngak tui, Samar drah, Pambuak gauk saong Pasang iek”. Amuk Phạm Thị Minh Hiếu, Akaok Chi cục pala drak saong khik caga phun pala ban Cần Thơ brei thau, piah rahra thau cambaih jalan ngak ye gah ngak nong hu peih dom tal pasram, ginum biai, tacei pato ilamu ka urang nong, paglaong ilamu khik iek, prein pambuak gauk di dom kapul urang nong, HTX ngak nong piah ginup prein pambuak gauk khang kajap haong doanh nghiệp. “Bruk trun pajaih brei hu jamriak piah ngak bruk trun pajaih njauk tui bruk ba tabiak lac mala 100kg di mangaok 1 ha. Ka 2 lac jak ba urang nong dalam bhum tame danak dak  brei ngak njauk jalan, njauk ilamu di Cục pala drak ba  tabiak blaoh.”

Meng siam lagaih di bruk ngak iek di Cần Thơ brei mboh lac trun jien sahui, trun tathuak nerak sang kreih camin, tagok năng suất, tagok kein laba di rahra. Urak ini, gah ngak nong Cần Thơ daok pataom tame ngak, pambak praong danak dak dalam ban tui panuac sanya haong Mintri ngak nong saong Patagok palei pala tal thun 2030 lac mek hu 50.000 ha. Danak dak 1 triệu ha padai di bhum ĐBSCL meda palahik bruk ngak sit sot, ngak tui hatai dalam pala drak, pablei salih padai brah, ba tabiak jalan ngak, bruk ngak ka urang nong tapa pambuak gauk piah paglaong yaom ka gah padai brah./.