Rami ramik ka salah blaoh bruk hamu padai, tal jam taong 3 bier harei, 16 adei saai kumei urang bangsa Khmer daok di khom Soài Côn, Phường 2, ban sit Vĩnh Châu hu mbaok di sang saai Kim Thị Chanh Ly piah tame tal bac pak bai kadung kayua Pasak pato magru bhian miat – pato bruk ngak di ban sit Vĩnh Châu peih dalam danak dak bruk ngak negar ka bruk cak rok patagok kinh tế xã hội bhum mikva urang bangsa takik saong bhum ceik dalam masa 2021 -2030. Yaom lac bahrau bac hu labaih mateh bilan, min rilo adei saai jeng pak bai kadung hu biak naih. Langiu di nan, bruk peih tal bac di labik puk palei, hu ba kein lagaih piah ka rahra ba rup tame. Gam gam hu bac bruk ngak, dom adei saai daok hu daong jien 30 ribau dong dalam sa harei. Amuk Tăng Thị Sà Vol, khan brei thau lac: “Vaktu bac ye Pasak jeng ba kein lagaih ka drei, pilih ruah waktu bier harei meng bac, nan ye salah bruk ye drei caga tame tal bac piah pasram pak kadung. Labaih maong 3 tal maong 3 mateh lac drei tame ngak. Nac urak ini jeng mbuan paje, urak ini rilo adei saai jeng thau pak paje.”

Masa blaoh tapa, tỉnh Sóc Trăng hu pataom prein tame jhul pasamar bruk peih ngak dom danak dak, dom danak dak sit,… dalam danak dak bruk ngak negar ka bruk cak rok patagok kinh tế-xã hội dalam bhum mikva bangsa takik saong bhum veik, masa vaktu mang thun 2021 -2030, dalam nan hu bruk daong salih bruk ngak, pato bruk ngak ka mikva bangsa takik, patu di nan, dak harei dak daong ka mikva hu veik jien piah ngak mbang, patagok jien mek tame, dak harei dak yam tagok ngak mbang tani tanat dalam raidiuk di baoh sang kaga.

Ngan haong bruk daong salih bruk ngak brei ka mikva bangsa takik, rilo baoh sang mikva bangsa Khmer di tỉnh Sóc Trăng urak ini hu mbang ngui tani tanat, daong ka hu jien mek tame sang, hu kein lagaih piah yam tagok tabiak truh kan kathaot, tani tanat di dalam raidiuk. Gam haong dom danak dak, sarak bangsa, danak dak karei di Ndang, Kanja saong bhum palei, daong ka dom baoh sang kan kathaot di mikva bangsa Khmer dalam tinh trun yaok thun labaih 3%. Tỉnh Sóc Trăng kham marat, tal hujung puac thun ini, dom baoh sang kan kathaot di dalam tinh meda trun daok mala 8.500 kaga baoh sang.

Kapul pambuak gauk ngak nong Đại Ân, xã Đại Tâm huyện Mỹ Xuyên ieu lac sa dalam dom kreih camin dalam bruk peih ngak kinh te kapul nyaom pataom gauk. Ong Hứa Thành Nghĩa, akaok Kapul pambuak gauk ngak nong brei thau lac, rilo thun ini mai, labaih 30 urang dalam kapul pambuak gauk ngan haong labaih 100 ha mblang taneh pala padai jeng pilih ruah jalan pala, drak pajaih padai angan je ST24, ST25, pandar jalan pala drak meng mac, piah trun yaom manieng phun jien, parilo padai brah saong patagok yaom, pamaong tal bruk ngak salamat, khang kajap. Kapul jeng daok pambuak gauk duah jalan pablei ndap nda hu siam lagaih saong khang kajap haong doanh nghiệp Hồ Quang Trí, nan ye tani tanat hu kein lagaih hu mbaih. Tui kuhria, kein lagaih yaok thun mek hu meng 40-50 triệu đồng/ha. Ong Nghĩa brei thau veik: “Di bruk cak rok patagok palei pala bahrau yau ye urak ini hu pandar bruk cơ giới hoá abih tih paje. Di jalan nao mang anak tal ini, kol dahlak hulin daok taduan hu bruk caik hatai sangka daong ba di bhum palei ka jammaraik pruh jru, hu jammaraik pruh jru ini ye hu daong ka mikva urang nong dahlak trun hu phun jien buh tame ka bruk ngak mbang, pala drak.”

Oh padeih di nan, dom urang dalam kapul pambuak gauk daok pandar dom kein lagaih di taneh riya lagaih ka bruk pala njam patam, baoh karaoh, raong glang, nan ye hu cak rok patagok mboh di mata biak siam 2 bruk ngak ini. Ong Trương Tấn Lâm, Phaok akaok Uỷ ban bhap bini xã Đại Tâm, huyện Mỹ Xuyên khan brei thau: “Ong Đại Tâm urak ini ye dom bruk ngak dalam xa hu sa hợp tác xã ngak padai, 14 kapul pambuak gauk, dalam nan hu 6 kapul pambuak gauk ngak padai brah, 1 kapul pambuak gauk ngak njam daok gilac veik 1 kapul pambuak gauk raong limo. Tui taong yaom ieik glang dalam bilan, jien mek tame yaok akaok manuac labaih 79 triệu đồng sa thun.”

Kuhria tal harei 30/9, tỉnh Sóc Trăng brei lang jien masaiy di gialng jien hu labaih 274 tỷ đồng, mek hu labaih 78% piah peih ngak danak dak bruk ngak negar ka bruk cak rok patagok palei pala bahrau. Tapa 3 thun peih ngak 3 danak dak bruk ngak negar hu ba mai dom kein lagaih dalam bruk cak rok patagok kinh tế-xã hội, patruh eik patrun kan kathaot, dak harei dak patagok dalam raidiuk, mbang ngui di rahra, mbaok mata di puk paga jeng salih bahrau, siam hadah jang./.