Danak dak padang ngak pasiam ribaong A41, phường 4, quận Tân Bình hu ngak meng phun jien di kanja, tui kuhria abih tih lac jaik 347,5 tỉ đồng. Meng ribaong atah 837,5m, danak dak meda lac jalan tathuak ia praong ka mblang kapar haok Tân Sơn Nhất. Mbaok taneh mek veik di dom sang rahra lac labaih 8.041m2 ngan haong 142 sang njauk giải tỏa. 

Jaik 8 thun, tapa 2 mbang taom gaok haong rahra saong yaok pluh mbang taom gaok haong dom sang njauk giải tỏa di danak dak, min dua gah ka oh njauk gauk. Rahra ndom lac, po padang ngak danak dak daok mbeik veik jalan ribaong tui hatai, piah plaih dom danak dak di dom doanh nghiệp; peih jalan nao takai yaok gah 4m; yaom jien biyar ka oh lagaih ngak khat lahik biak praong ka dom baoh sang. Bahrau ini, di mbang taom gaok di harei 8/9/2023, di jabat UBND Phường 4, quận Tân Bình, rahra jeng daok ba tabiak dom panuac nan, gam haong nan ndom lac, bruk peih jalan nao takai yaok gah ribaong 4m lac oh lagaih. Ong Bùi Công Phan, sang daok di labik 5 jalan Đồ Sơn, Phường 4, quận Tân Bình brei thau: “Danak dak ini daok ngak suan adat hukum, ngak suan dom adat cambaih laih ka tanut chuan padang ngak di Hukum Xây dựng; blaoh ngak suan Hukum Kiến trúc saong Quy chế khik ramik kiến trúc đô thị TP.HCM. nan ye bruk ngak jalan nao takai 4m lac sa dalam dom bruk ngak suan praong brei mboh bruk ngak tui hatai drei eng di dom urang pan akaok padang ngak danak dak ini.” 

Tui amuk Nguyễn Mai Hoa, sang daok di labik 2/19 jalan Đồ Sơn, danak dak pasiam Ribaong A41 atah tok labaih 800m bo hu hình chữ y ngan haong 6 canah klau, 5 canah pak saong sa vòng xoay… Danak dak nao tapa labik rahra daok rilo, nan ye njauk hu jalan ngak cambaih laih ka bruk salamat jalan mbak saong kein laba di kanja saong rahra: “Mayah jalan nội bộ ye tok hu jalan nao takai 2m, jalan 12m tui Hukum Xây dựng, Hukum đầu tư công ye oh njauk yau dom saai eng drei ba tagok lac jalan pataom. Bo dalam sarak ka 07 di Hội đồng bhap bini ban brei ngak ye ini lac danak dak pasiam veik ribaong ye oh hu sa baoh panuac halei ndem ka bruk ngak bahrau jalan mbak, nan ye kol drei saong abih tih rahra di labik ini jeng oh njauk hatai haong bruk ini”.

Kanja pak ini jeng hu mbang taom gaok ndem biai ka bruk ramik veik dom bruk dalam Danak dak quy hoạch cambaih laih ka bruk padang ngak đô thị tỷ lệ 1/2000. Jaik abih dom baoh sang gaok bruk nan jeng taduan meneing dom khat lahik ka sang, taneh saong njauk gauk bruk peih praong jalan nao takai 2m yaok gah. Min, mbang taom gaok oh hu mbaok di dom urang hu thẩm quyền piah javap jaloi dom panuac sua tangi di rahra. Abih di nyu nan lac, jabat chức năng saong kanja palei jeng oh mbaoh tangin saong oh brei tapa biên bản piah jao ka mikva. Bruk ini ngak ka dom baoh sang biak suh sah hatai saong mboh medil ka mbang taom gaok. Amuk Lê Thị Sữa, daok di labik 3/2 jalan Đồ Sơn, P4, quận Tân Bình pandik hatai lac: “Tui quy hoạch, mikva hu pabak quyen ngak po sang, blaoh padang ngak sang tui njauk quy hoạch paje. Tal harei ini caong hợp thực hóa dom bruk ngak suan di Mban khik ramik danak dak, jabat khik ramik đô thị quận Tân Bình ye brei ramik veik quy hoạch, yau nan lac daok patui ngak suan. Mikva biak iek praong hukum min dom jabat chức năng quận Tân Bình ngak bruk biak oh lagaih”.

Rilo sang brei thau lac, yaom bồi thường, biyar jien, daong ba, tái định cư hu biak rilo srau kadau, oh yau gauk. Dalam nan, yaom biyar jien di danak dak hu brei thau di tukvak bilan 10/2019, tok samu 30 tal 40% yaom taneh di darak pasa lac oh njauk, oh lagaih./.