Tuai caong khin nao ravang iek danao Thị Tường ye hu dom sang daok ngak du lịch sinh thái mek vỏ lãi ba nao. Tuai hu ba drei tame labik yau daok tamo, gheih mekre, bak ia di danao. Taphia nan, lac raidiuk yaok harei di rahra dalam palei haong dom bruk ngak meng kan mai, yau ye: trah ikan, caik halam, vó, lú... piah cap mek ikan, ring, hadang, jantak... Nan lac dom bruk ngak mbang duah jien di mikva, gam lac pandap du lịch piah duh ka tuai damuai.

 Hu meng bruk pataom veik phù sa di kraong Mỹ Bình, kraong Ông Đốc saong rilo kraong ribaong di 3 huyện Phú Tân, Trần Văn Thời saong Cái Nước, tỉnh Cà Mau, Danao Thị Tường praong 700ha, hu parabha jeng: danao angaok, danao kreh, danao ala. Danao Thị Tường hu pok brei angan lac labik khik ramik langik tasik di tỉnh Cà Mau. Di pak ini, hu biak rilo janih kaya ikan, abih di nyu lac, hu dom janih tok hu di danao yau ye: ikan vồ chó, lịch huyết. Bruk raong sò huyết tui hatai di danao meng rilo thun tapa, jeng hu daong ngak brei bruk mbang huak hu rilo janih jang piah duh ka tuai damuai. Ong Trần Minh Trí, urang tuai mai ravang iek danao Thị Tường khan lac: " Dahlak mai ini piah mboh piah thau ka gheih mekre di bhum kraong ia miền Tây. Blaoh hu mbang dom janih kaya ikan biak karei di bhum palei ini. Mai ini jeng hu pang, hu thau ka sajarah di danao Thị Tường".

 Bhum taneh joa lange vil val danao Thị Tường dahlau daih, lac labik pacang ka cách mạng. Labik ini hu jabat dang akaok di bruk cách mạng bhum palei pala Cà Mau tukvak 1960-1975. Labik dang takai di Tỉnh ủy Cà Mau hu caik di ấp Xẻo Đước, xã Phú Mỹ, huyện Phú Tân.

 Harei ini, tapen danao hu labik Căn cứ Tỉnh ủy Xẻo Đước hu padang ngak praong, siam. Labik Căn cứ Tỉnh ủy daok lac labik ilamu, sajarah hu yaom praong dalam bruk khik ramik, pato pakai ilamu cách mạng. Meng thun 2007, Labik Căn cứ Tỉnh ủy Xẻo Đước hu UBND tỉnh Cà Mau pok brei angan lac inem mek sajarah pakat tỉnh. Labik căn cứ hu jeng labik ravang iek hu angan tuk tuai mai tal. Amuk Lê Hoàng Yến, urang daok di phường 5, ban Cà Mau brei thau, tuk mai ravang iek, amuk hu langyah brei thau ka sajarah, ka bruk dang tagok mesruh di anek manuac bhum taneh ini: "Mai ini duah thau, dahlak mboh hu bruk sajarah,  brei mboh veik bruk dahlau daih dom anai, dom cei nao mesruh. Mai ini mbang dom janih kaya ikan di labik ini dahlak jeng mboh biak takre".

Di danao urak ini hu sa HTX saong sa baoh sang ngak bruk ba tuai nao ravang iek, duah thau. Yaom lac eng drei dang tabiak ngak, oh ka hu ilamu ngak, min tuai mai tal danao yaok thun hu labaih 10.000 mbang urang. Ong Nguyễn Đức Thông, Phaok akaok UB bhap bini xã Phú Mỹ, huyện Phú Tân, tỉnh Cà Mau brei thau: "Xã thau lac, du lịch lac gah ngak kong oh hu thak pui. Meng kein lagaih hu blaoh, xã pataom tame ngak brei cakrok du lịch di danao pambuak haong Labik inem mek di Tỉnh ủy. Gam haong nan, xã hu padang HTX piah ngak du lịch di danao. Tapa taong yaom, sa thun dalam xã hu yaok pluh rabau tuai mai ravang iek".

Meng langik tasik gheih mekre di bhum kraong ia, gam haong labik Căn cứ Tỉnh ủy Xẻo Đước dahlau daih, biak lagaih piah cakrok du lịch. Min tukvak tapa, bruk ngak du lịch di danao rilo meng lac tamuh tabiak tui hatai saong oh ka hu buh jien tame ngak siam. Nan ye, gah du lịch saong karja palei njauk pasang iek, taong yaom piah buh jien tame ngak, piah mek hu kein laba labik du lịch sinh thái biak gheih mekre ini./.